المشاركة الأصلية كتبت بواسطة mimomea

شكرا اخي الكريم نيت مان عالطرح القيم متل العادة
هيدا الموضوع بيرجع حسب الظروف لكل شخص
فكرمال هيك مستحيل نقدر نجزم اي خيار هو الافضل
لانو في رجال بتنجذب او بتفضل المرأة تكون موظفة ومش ضروري يكون الهدف مادي
وفي رجال ولو كانت احوالهن المادية متوسطة او اقل من متوسطة بيفضلوا الزوجة تكون ربة منزل
فما في قاعدة ثابتة
وفي كمان نفس الشي في نساء الهن نظرة بتختلف عن بعضهم حسب كل شخصية

بالنسبة الي ما بحب أقعد وما أعمل شي بحياتي وعندي طموحات كتير وعندي امل اني حقق البعض منهم
بشوف حالي ما بقدر اعطي كل شي حقه اذا اشتغلت بالوقت الحاضر او من قبل
كوني ضد يكون عندي عاملة بالبيت تساعدني
فالوظيفة ما بتناسبني لانو كتير مرهق اني اشتغل داخل وخارج المنزل وخاصة ان كان الدوام طويل
ومع دوام اولادي ما بتزبط لانهم بيجوا الضهر وبعض الايام عندهن بعد الضهر مدرسة
وبهيدي البلد بدهن متابعة وكون صديقة الهن كرمال ما ينجرفوا وراء التيار
وبالرغم انهم بيساعدوني وبيتكلوا على انفسهن كتير وبتكل انهم يجيبولي اغراض من السوبرماركت وبعلمهن الطبخ وكل شي حسب عمرهن وطاقتهن
بس بحس انهم بحاجتي بهالعمر
ممكن بعدين فكر وتتغير نظرتي وتتغير الظروف الله اعلم
بس حاليا لا لانو وقتي ملان بضل متابعة اولادي بالمدارس وبروح بحضر معهن مرات حصص مدرسية واي اجتماع او احتفال برافقهن ان كان بالنهار او بالليل
وباخدهن وبجيبهن عالنشاطات بعد المدرسة بس يكون عندهن وكل ولد عنده اقل شي نشاطين او تلاتة من سباحة وخيل وتزحلق عالجليد وكاراتيه وعزف عالناي
غير الدرس العربي الهن يوم بالاسبوع
ومع كل هيدا معطيي نفسي حقها وعم طور من حالي لو ما اشتغلت اقل شي بفيد اولادي ومحيطي
فعم كمل دراسة لغة لاحصل على دوبلوم باللغة للترجمة ودوامي بالليل وحاليا اجازة لبعد شهرين برجع بكمل
من بعدها اذا ربي كتبلي عمر عندي مخططات اني ادرس ديزاين لانو من انا وصغيرة كنت ارسم تصاميم لازياء نسائية وتابع كل شي بيتعلق بالتصاميم وما درستها للاسف لانو ما كان متوفر هالاختصاص بمنطقي اضطريت اختار اختصاص علوم اجتماعية
وهلئ بهالبلد عندي فرصة اني ادرسها


وكمان بحب تابع كل شي بيخص الديكور والهندسة المعمارية
و من خلال متابعتي لهيك امور حبيتها ورسمت خريطة بيتي على طريقتي واعطيتها للمهندس نفذها متل ما هي
ورسمت لاخي كمان خريطة واي شي بيستشيرني بس بدو يعدل على البيت وكمان صديق اخي طلب مني ارسمله

وبحب اتعلم كل شي طبخ عالمي
وبقول عطول رح ضل اتعلم واتعلم ما دام عم اتنفس هالشي بيرضيني لو ما اشتغلت فيه

اقل شي عم ضيف الي شي وهالشي مكسب لاولادي لانو عم اعطيهن من اللي بعرفه
حتى وقتي هون بالمنتدى بستفيد منه بأمور كتير

مع انو بمر أوقات بحالة ركود وما بكون الي جلادة اعمل شي

الخلاصة من كل هالكلام انو المرأة بس بدها تحقق ذاتها في الف طريقة وطريقة ان كانت ربة منزل او موظفة
وهون الرجل لازم يكون واضح معها ويعرف شو في براسها
لانو صعب يقنعها تكون ربة منزل وهيي طموحها انها تمارس مهنة معينة
هون بتضيع هويتها ورح يأثر سلبا على حياتها الزوجية

وفي من النساء اللي بتقدر توفق بين الوظيفة وبيتها ومثال صديقتي انما دوامها قصير جدا ومتوفر حضانة للاطفال بمكان عملها وزوجها بيساعدها بالبيت والاولاد ومرات ام زوجها بتعمل حسابها بالاكل فكرمال هيك ماشية امورها تمام ماشاءالله

احترامي