منتدى عالم الأسرة والمجتمع - عرض مشاركة واحدة

08-11-2016, 10:59 PM

#4002

مهره

عضو المنتدى الفخري

تاريخ التسجيل: Aug 2003

المشاركات: 17,491

رد: كوفي تجمع الصبايا 4

الصيف كان قاتل .. وخلّص على كل زرعاتي.

من حوالي ثلاث شهور الحيضان ومدخل البيت الخارجي الأمامي والخلفي بائسين وما فيهم حياة.

الحمدلله الجو بدأ يتحسن .. والنسمات اللطيفة هلّت .. ورحت اليوم واشتريت زريعات جديدة .. وستدب الحياة حوالين بيتي من جديد.

مبدئياً خذت فل وياسمين وهبسكس.

بس في شغلات ما أقدر أسويها بروحي .. فهالمرة يبالي مزارع عشان يعيد تسميد الحيضان وتجهيز التربة.
.
.
.
الجديد..

عندي حوض في الجهة الخلفية من البيت .. في السنتين الماضيات زرعت فيه كزبرة وبقدونس وجرجير ونعناع.

اللي حصل إن المحصول من هالخضرة كان كثير على استخدامي الاعتيادي .. مع إني كنت أعطي أمي منه.

فاليوم كنا نرمس أنا وزوجي عن هالموضوع .. وقلت له ملاحظتي بخصوص كثرة الخضرة اللي زرعناها سابقاً قياساً باحتياجنا الفعلي .. فاقترح عليّ إننا نزرع نص الحوض .. والنص الثاني نبني عليه قفص دجاج.

اقتراح الدجاج هذا أنا طرحته عليه من كم شهر ورفض .. بدون إبداء الأسباب.

.. وأنا كبّرت عقلي وما جادلت وقلت السالفة مب مستاهلة أعمل منها قضية.

ونسيت السالفة مع الوقت .. لكن سبحان الله الظاهر لي نصيب أربي دجاج.

__________________

اللهم طِيبَ الأثر .. وحُسْنَ الرحيل.

التعديل الأخير تم بواسطة مهره ; 08-11-2016 الساعة 11:01 PM