اه يالمدارس
عجبني الدائره غير الاعتياديه التي ناقشتيها هنا
العلاقات الانسانيه
بصراحه في جو المعلمات تختلف عن اي بيئه اخرى
لربما بسبب تواجد عدد من النسوهرفي مكان واحد طيله اليوم الدراسي
والمكان ضيق حيث لو تتصلين بالهاتف لسمعك كل من بالغرفه
وبوقت تصبحي ملزومه بالجميع ان احضرتي شوكلت وزعتيه على المل
اي زواج او مناسبه تدعي الجميع له
ان عزمتي فلانه وعلانه زعلوا الباقي
باختصار يصيرو زي قروب الوتس لشرح الفكره لمن لم يفهمها
ومافي قروب وتس يضم ناس من مختلف الافكار و الميول الا تصير فيه مشاكل
ونفس الشي المعلمات
وتبدا الاحزاب ورمي الكلام و النفاق او الصراع الظاهر
واللقافه واه من اللقافه شي مو طبيعي
غير اللقافه تصيد الاخطاء لو تدري انك جايه ماحضرتي فضحتك عند العالم
بقول لك سالفه قديمه جدا
او ماتعينت كنت بريئه جدا بشكل ماتتصورينه شكلا وخلقا وطبعا
رجعتني زميله لي للبيت بعد نهايه الدوام قلت لها انا مو مثبته البيت مره وعطيتها العنوان ماوصفت لها وين نروح ووين نجي
ثاني يوم لقيت ابتسامات صفراء و الغرفه كلها واضح انهم قبلها كنت ماده حديث شيق لهم
غير الالفاظ في وحده كانت جدا جدا قليله ادب ومن زود الميانه ترمي كلمات ياهبله ياغبيه انتي يا مدري ايش يقال لك انها نكته و المشكله الباقين يشوفونها عادي طبعا نكوتيه ومرحه ويحبونها وياويلك اذا اعترضتي على اسلوبها
المهم هالانسانه قطعتها واصلا تغيرت اماكن عملنا لكن للامانه خرصت ماوصلها لقيتها صدفه بمناسبه اول ماشافت وجهي انتي هنا واشوف المكان مظلم هههه ابتسمت تسليكه لها وش اقول ناس مزحها ثقيل دم
غير الي ينطو بوجهك ليه سويتي كذا ليه مارديتي على فلانه ليه تسمعي كلام المشرفه ليه حاطه هالميك اب ليه ماتزوجتي ليه مانخطبتي وليه وليه
غير الغيره و الحسد غير الي تفتكر انك تشتغلي عندها
فلانه جيبي لي هذا فلانه وقفي على صفي شوي فلانه انزلي جيبي لي طبيه فلانه وقعي لي فلانه مدري ايش
ماانكر ان فيه ناس كويسه لكن للاسف قليله
وسبحان الله قله من صداقات المدارس تستمر
عندي صداقات من المدارس يمكن صار لها 15 سنه
لكن في الحقيقه مادري عن عمق هذه الصداقه او انها استمرت فقط لاننا حرصنا على التواصل
مشكله هالمباني المتوحشه على قولتك انهم مايتركوا احد بحاله
وان انعزلتي يجيك من يشكي لك ويدخلك بدوامه مشاكله
غير الجمعيات والقطات الماديه وجدول القهوه و الفطور
تحسي انك ببيت حموله ومطلوب منك دور اسبوعي
غير اذا الشغل تراكم عليك
واكثر شي يغث لما تلقي انك تكرفي بس عشان منتي حامل ولا متزوجه
ومطلوب منك غصبا عنك ماتقولي شي تقديرا لزميلك الحامل
طيب هي حامل مو معاقه بعيد الشر عنها وكل سنه تحمل وتولد انا وش ذنبي
بصراحه جو المدارس بالجهه الي ركزتي عليها كان قاسي علي جدا جدا
مشكلتي كانت اني هاديه جدا وبحالي وكانوا يطلعوا علي اشاعات اني نفسيه ومغروره وشايفه حالي ويروجوا هالكلام
لدرجه وحده شفتها مؤخرا قالت فلانه بصراحه كنت اكرهك تخيلي قالت كذا قدام فوق العشرين حرمه
كنت اقول وع فلانه هذي شكلها نفسيه بس لما عرفتك حبيتك وش عقبه يالحبيبه عقب ما هزاتيني قدام العالم
و الباقين طبعا جايز لهم احراجك ههههههه
الغيره و الحسد يتم التصريح بها عادي يعني الي عندها راي فيكي لازم تقوله بوجهك ومن وراك وبكل الجهات
تخيلي لما رحت جديده لمدرسه كنت ساكته ومبتسمه ومجامله
امسكتني مدرسه على جنب وش فيكي
قلت خير مافيني شي
قالت انتي زعلانه قلت هاه وش يزعلني
قالت المعلمات يقولون انها بس جالسه وساكته وتبتسم ههههه
من جد شر البليه ما يضحك
المدارس يبغى لها لهلوبه وحده تاكلهم بلسانها و بالحكي والكلام الزين
وحده مجامله و تعرف تاخذ حقها ومن اين تاكل الكتف
منافقه من الطراز الاول
اما الي كانت نفس حالتي فالله يعينها اذا ماطاحت بناس كويسه نفسيتهم طبيعيه
سعيده اني تركت هالعالم
فقد كنت فيه كاليس بارض العجائب
لايناسبني هالجو ولو استمريت بضع سنوات لكان اختنقت
الحمدلله يارب