رد: غُرف المعلمين والمعلمات
اقتباس:
المشاركة الأصلية كتبت بواسطة أبله دلال
قلم كحل
هذه بس ثلاث شهور ! عيشي معهم ثلاث سنوات وبيشيب شعر راسك
قطيات القهوه والفطور فعلا كلها محسوبيات واللي ماتتقهوى تصير مكروهه عندهم طيب كيفها هي ماتتقهوى !
والمرشدة الطلابيه هذا جزء من عدم مخافة الله وانا تطرقت وقلت ان بعض تصرفاتهم تجاوزات في الدين وتنافي حتى التربية الإسلاميه في حين انهن مربيات للأجيال ..
وللأهمية دائماً هم قروبات وغالباً كل قروب تترأسه "قائدة سيئة " هي سبب الفتنة والمشاكل وهم يتبعونها مثل القطيع وكلمتها تمشي ع الجميع ويخافون منها علماً ان احياناً بعضهم طيبات القلب لكنهم يتبعونها ويجارونها ليكسبون ودها ويكونون ضمن مجموعتها بسبب ضعف شخصياتهم
وأعتقد هذا من أهم الأسباب ..
لأن لو كل وحده حكمت عقلها وتصرفت بما يمليه عليها ضميرها وأخلاقها وأبدت رأيها بكل صراحه ومنطقيه وترفعت عن اسلوب التبعيه والقروبات والتعنصر ماكان صار كذا وتمزقت المجموعات وكثرت المهاترات
|
الحمدلله إنها 3 شهور ولا كونت سيبتها لهم ..
من جد ليه دي الأخلاق اللي مدري كيف ..
حتى افتكر مرا اضطريت اتأخر شويا عن حصة انتظار يمكن 5 دقايق اللي اتاخرتهم وكانت في ابله عندهم انتظار ( الحصه مقسومه على فترتين فتره هيا تمسكها والفتره التانيه أنا ماسكتها )
ما امداها تشوفني جايه ع الفصل تخيلي قابلتني في نوص الممر وقالتلي ( كان ماجيتي احسن من اول وانا انتظر الخ الخ الخ ) .
طيب ياحلوه . الوحدا مايصير تتأخر لظرف ؟ يعني لا كونت اهرج مع صحبتي ولا ماسكه خط سوالف وانا اتقهوى زي مايعمل اغلبهم ..
اللي قهرني انها جلست تزعقلي قودام الطالبات والمعلمات . يعني الفصول أبوابها مو مقفله وأنا صرت فرجتهم . جدا كرهتها ..
...
ومرا جات متدربه تبكي من الطالبات لانو زي ماتعرفي أحيانا الطالبات يستضعفوا المتدربه ويعملوا حركات تنرفز ..
جات الأبله الاساسيه وتهديها ( ياحبيبتي ماعليكِ منهم , هما أصلا تربية شوارع وماعندهم أخلاق ومايبغالهم الا العين الحمرا )
انا صرت كذا O.o نعم . ابله محترمه لها مكانتها وتعتبر قدوه تقول كذا ؟
ليه الطالبه مو بني آدم ؟ وما اعتقد في وحدا أعرف من الأبلات بطباع المراهقه وانها ابدا ماتجي لا بالشده ولا بتكسير الراس .. وحتى لو غلطانه وتبغى تهدي زميلة المهنه المفروض ماتشحن نفسها جهة أحد . لا وزياده تصير جلسه محترمه بطولة الشاي والكيك والفصفص والقهوه والحلا . شوفتي الطالبه الفلانيه ؟
والله ترى قليلة ادب لا تعطيها وجه حتى لو شاركت طنشيها , ولا الطالبه الفلانيه يَ لطيف شايفه كيف حواجبها انا ما ادري كيف أمها سامحتلها تعملها .. ولا يؤ يؤ لو تشوفي ابله فلانه . تجيها هدايا بالكوم من الطالبات , ولا شوفي ابله علانه مو راضيه تحوط فلوس لحفلة التخرج وتقول ظروفي ماتسمح لي وهيا شاريه لزوجها سياره وكمان سفرتها على البلد الفلاني في الإجازه ..
..
انا ما اعرف هل تنتقل العدوى بمجرد مايصير للوحدا مكان في الغرفه أو هيا أصلا كانت كذا ولقت اللي يشاركها ..
..
اعتقد ساعات الدوام الطويله تخرب نفسيتهم وبالتالي تعاملهم مع التانيين .
وكمان ضغوطهم خارج العمل يكون لها أثر واضح جواه ..
فاقترح مدامهم كذا كذا عاملين تجميع لفلوسهم من بعض . يجمعوا لحاجات تفيدهم وتشغل وقت فراغهم في الغرفه ..
بحيث انو ماتصير فشات الخلق لا على بعض ولا على التانيين ..
وطبعا ما أنكر انو في ابلات ينحطوا ع الجرح يبرى .
__________________
اِهدنِيْ فِيْمن هَدَيْت ..
