كيف اسيطر على الاولاد
السلام عليكم ورحمة الله وبركاته ...
زوجي عنده ولد من طليقته عهمره 5 سنوات يدرس بالروضه وعايش عند امه
وانا عندي ولد من طليقي عمره 3 سوات وعايش عند ابوه
ونجيبهم في الويكند الاثنين مع بعض ..
حابه اعرف كيف اقدر اسيطر على تصرفاتهم واعلمهم على الصح ..
الاتنين يحبو بعض وعودناهم ان انتو اخوان ..
لكن في اشياء تكون غلط تطلع منهم ما اقدر اسيطر عليها لان كل واحد يتربى بمكان مختلف وعندهم بعض السلوكيات الخطأ ..
مثلا .. ولد زوجي ماشاء الله هاديء .. لكن اذا طلب شي واحنا رفضنا لاي سبب كان يقوم الولد يبكي ويصرخ ويرفس كل شي قدامه الين ابوه ينزعج ويعمل الي يبغاه ..
انا هنا اتضايق اقوله لاتعلم الولد انه اي شي يبغاه منك ياخذه بالبكاء والصراخ .. ياتقوله من البدايه لا وتفضل على رأيك عشان مايتعود ياخذ حاجته بالصراخه وكأنه عرف مفتاحك .. او من البدايه تلبي طلبه بدون رفض.. >>> فهنا انا اتنرفز واحاول ما اتدخل لانه مو ولدي بس بنفس الوقت ودي اتدخل ومثلا يديني زوجي القرار في هذي المواقف لاني ما اتحمل اجلس على اعصابي واخلاقي تقفل ..
والعاده الثانيه الولد صار عمره 5 سنين ويدخل المدرسه مايعرف يروح الحمام لوحده . اقوله لازم يتعود الين متى احنا نوديه الحمام مثل الصغار ولما اقوله يلا انت كبير روح الحمام بنفسك يقوم يصرررخ الين يجي ابوه ويوديه ؟؟ وماياكل بيده لازم احنا نححط اللقمه بفمه ؟؟
احاول ما اتدخل لان اعرف اسلوبي مع الاطفال ماحيعجب زوجي لان فبعض المواقف اكون حازمه معاهم وبعض المواقف لا .. يعني ماحيتقبل اني اعامله كولدي .. اخاف ياخذها كغيره او كره للطفل وانا والله اني دايما اقول لازم اعامله زي ولدي عشان راح تجي لولدي زوجة اب وابغى ربي يديني زي ما ادي ولده ..
وبالنسبه لولدي ماشاء الله عمره 3 سنين وحركته كثيره ومايحب يجلس يدخل الغرفه يلعب بأغراضي واغراض زوجي يدخل المطبخ يلعب بالتلاجه يدخل الحمام يلعب بالمويه يعني يحب يستكشف وماشاء الله اشياء كثيره خربت على يده .. وزوجي احس يتضايق من دا الشي ..
وانا ودي اسيطر واعلممهم بس احس ما اقدر ..
ضميري يأنبني اني اعلم ولدي ولما يعمل غلط اخاصمه واضربه على يده وولد زوجي لما يغلط ما اقدر اعمله شي .. فصرت اخلي الاثنين ياخذو راحتهم احس السيطره عليهم وتعليمهم صعب في الويكند فقط .. ما اقدر اعلم واحد واضغط على واحد وقت الغلط والتاني لا ..
__________________
لاتسعى لتصحيح ظن احد بك ££ خالقك ينظر لقلبك وهذا يكفيك
التعديل الأخير تم بواسطة ويبقى الحنين ; 23-01-2017 الساعة 11:46 AM