رد: كيف اسيطر على الاولاد
بالنسبة للحمام ،
بعدما تطبقين النصائح أعلاه بعد فترة ( أسبوعين) على الأقل من صنع هذا الجو اللي نصحتك به أعلاه" جو من الأمان و الراحة ، ما فيه صراخ و لا محاسبة و لا أي توتر أو خوف أوقلق".
وأيضا هذا مهم :
خلال هالفترة لازم ( واجب) أنك و الأب تتكلمون بنبرة هادئة ما ترفعون الصوت، وتستخدمون كلمات إيجابية و محفزة،
مثلا لا تنادين الطفل إلا بلقب إيجابي بعدين اسمه ،
و لا تبخلين أبدا بالألقاب حتى لو حسيتيها صارت قصيدة من طولها مثلا
" حبيبي قلبي البطل الشاطر حمودي ، وش رايك تفوز بأنك أحسن ولد يعرف للحمام"
و هو بالحمام و أنت بشغلك مثلا بالمطبخ أو غرفة قريبة (عشان مايضيع وقتك بشغل البيت) علي صوتك بالمدح له، و هو خارج امدحيه بمبالغة: معقولة ! أنت بطل و رهيب.
الحيلة اللي استخدمها مع أطفال أقاربي اسميهم بشخصيات كرتونية تكون أبطالهم المفضلين مثلا،
أنت بطل مثل كذا بكرتون كذا.
المهم هذي الألقاب أو "القصيدة" خليها على لسانك حتى تصير تلقائية مع أتفه و أدنى تصرف،
طاحت علبة المويا بالسيارة و أنتم مسافرين " حبيبي قلبي حياتي البطل الشاطر حمودي ممكن ترفعها" وكذا ،
تدربي عليها لين تصيرين تقولينها بسرعة و تلقائية بدون جهد أو شعور، فتصير جزء من عادتك و شخصيتك وهذا مفيد مب بس على صعيد الأولاد لا على صعيد كل علاقاتك الاجتماعية ! لسانك تعود يقول كلام لطيف مهما كان الضيق و الكدر و الغضب و الحزن و الاستياء وكل مشاعرك السلبية بداخلك، تصيرين ترتاحين نفسيا لأنك تعودت على الاسترخاء مب التوتر.
دائما بالغي و بالغي بمدح الأطفال ووصفهم بمواصفات و خيالات و توقعات لمستقبل باهر:
أنت ذكي ، أنت رهيب، لغتك مرة جميلة، أنت مرة نظيف، أنت تعرف تسوي كل الأشياء صح،
أنا أحبك قوة مرة (بالغي بوصف مشاعرك أقصى ما تقدرين)، و حسسيهم أنهم ملوك البيت و أنهم أرهب ناس و قياديين و أبطال بالمدرسة و بكل شيء.
إذا مب مصدقتني خلي عندك ورقة و قلم و اسردي الحال بعد هالتصرف يوميا لمدة شهر، وشوفي.
( أغلب الشخصيات العظيمة تصنع بالصغر،
و للأسف أغلب الشخصيات الضعيفة كذلك).
مع إن الوقت مافات للي يبي يتغير.
التعديل الأخير تم بواسطة الأمانة ; 23-01-2017 الساعة 02:45 PM