أعذروني بتجاوز الردود و بعلق على هذا الرد أول
اقتباس:
المشاركة الأصلية كتبت بواسطة ملكاتو
مافي اشي اسمه لطيفة في التعامل وماافرق بين رجل وامرأة
كيف يعني ماتفرقي ! قال هذا طبع فيني
حبيبتي غيري طبعك والزمي حدودك عند التعامل مع رجل
لا تخضعي في القول حتى لا يطمع اللي في قلبه مرض
مايحتاج تشكري وتدعي وتصيري مؤدبه زيتدة عن اللزوم مع الرجال
صوتك لا يطلع إلا للضروره
لا يلبس عليك الشيطان الحق بالباطل ويقول لك هذا من باب الأدب واللطف
وبعدين تجي هنا في المنتدى وتقولي ماادري كيف احط حدود وانا منزعجه ومدري ايش
لا تكلمي الرجال ابدا وشوفي تصير فيه حدود ولا لا
قلت لك من اول المشكلة فيكي مدري ليه حاسه ان الرجال يحاولو يتقربو منك وفي نفس الوقت انتي حاطة حدود وفي نفس الوقت مو حاطة حدود والأمور عندك ملخبطة
واحد زايد واحد يساوي اثنين ، مافي خضوع مافي حديث مع الرجل الا للضرورة ولو كان فيه إمرأة تفي بالغرض تذهبي لها
كل مواضيعك تدور حول نفففففففس المحور
وكل ما حلينا موضوع رجاتي فتحتي موضوع مشابه ........
|
اللي فهمته من كلامك شيين :
الاول : انو الوضع عاجبني والحل بسيط و في يدي وانا قاعدة ألف وأدور وكل شوية أجي أشتكي.
الثاني: عندي احساس انه الرجال بيتقربوا مني وانا حاطة حدود، وفي الحقيقة انا مو حاطة حدود وكلامي مع الرجال فيه خضوع بالقول ولذلك هم كذا معاي.
بالنسبة لأول شي، أنا لو عاجبني الوضع ليش أجي أفتح موضوع؟!
استهبال ولا تضييع وقت ولا أيش بالضبط؟!
ولو عاجبني الوضع صدقيني ماراح تشوفيني هنا حتشوفيني هناك مبسوطة
وأنا أشوف كيف يتعاملوا معاي و يبحثوا عن رضاي واني اعطيهم وجه
راح اكون فعلا مستمتعة بالوضع والاهتمام ومحاولات الكلام معاي.
لكن هذا كله تفكير غير صحيح عني، وعلى فكرة عندي مساحة حرية كبيرة واقدر أسوي اللي يعجبني ومع اي احد .
والموضوع مو سهل مثل ماتتوقعيه ولا حله سهل، لأني فعلا انا ما اعرف كيف اتصرف معاهم
يعني كثير مرات أحاول أحسن الظن وما أحط ببالي اني أكون انسانة تسيء الظن بالرجال او اني متعقدة منهم بتعاملي معهم ، ليش وانا ماشفت منهم شيء أبدأ بالتعامل الشديد والسيء؟!
وترى انا والله رسمية مع الرجال والله رسمية بس يمكن نبرة صوتي تعبر عني غلط وماتخدمني لو كنت فعلا جادة ورسمية.
مرة صاحبتي قالت لي : إنتِ مريحة والكلام معاكِ مريح ،تخلي الواحد يبى يتكلم معاكِ
ونفسها هذي صاحبتي مرة أرسلت لها تسجيل صوتي لصوتي وكان أول مرة تسمع صوتي
لأني تعرفت عليها في قروب الجامعة وبعدها طبعا تقابلنا في الجامعة، المهم عجبها صوتي مرة وقاعدة تمدح فيه .. ومرة في القروب كانت كل وحدة ترسل صوتها بتقول اي شي، لمن أرسلت انا الكل علق ويمدح.. نبرة صوتي هيا كذا تشد حتى البنات ، أيش أسوي؟!
أخشن صوتي لما اتكلم مع الرجال ولا كيف؟!
أتصنع بأسلوب مو أسلوبي؟!
لمتى وانا اخشن صوتي واتصنغ اتكلم بأسلوب مو أسلوبي؟!
وبالنسبة للشي الثاني انا انسانة مرت بمواقف كثيرة في هذا الموضوع ومثل ماقلتي كل مرة أشخاص مختلفين .. وفعلا انا حاطة حدود ، عمري في حياتي ما ضحكت مع اي واحد صار لي موقف معاه ولا عمري سولفت معاه في خارج حدود الشي بيننا سواء كان عمل او خدمة يقدمها لي زي السائق مثلا ، ولا عمري مزحت معاه ولا اي شي من هذا .. مو هذي هي الحدود ولا فيه شي تاني ؟!
واسلوب الكلام طبيعي يكون رسمي لأني ما بتكلم في مواضيع ولا قاعدة اسولف عليه حتى تطيح الميانة بيننا .. عموما الله شاهد على كلامي مع الرجال قبل البشر
وانا ابدا مو من النوعية اللي تطيح الميانة مع الرجال