انتي متأكده قرأتي موضوعي بالكامل ؟
او جايه تنتقديني بهالسرعه ؟
بناتي مو كبار . وحده ٦سنوات والثانيه ٥ سنوات
وياسبحان الله . لو اخذت بناتي وجبت لي شغاله . قالو الناس هذا مافيه خير
اخذ بناته وهم صغار ولاخلاهم يتربون عند امهم وبعدين ياخذهم . قبل يومين حضرت زواج وكل من حولي والله انهم قالو ابيض وجه انك ماحرمت اطفالك من امهم . وفيه معلومه حاب اضيفها وتأكدت منها . قبل ساعه اتصل بي ابو طليقتي يسلم علي . وقال ياابو ؟ ترى يبقى بيننا الطِيب والعشره . قلت لاتشيل هم . نعم يبقى بيننا الطِيب والتقدير والحشمه وانتم اجداد وأخوال اطفالي . ولاهو انا اللي اجحد العشره الحلوه اللي بيننا . هذي اقدار مكتوبه . والمسلم يرضى ولايعترض على اقدار الله . طبعاً يااخواني وأخواتي اللي تزوجها عنده ٣ بنات وولدين . والوالدين اعمارهم ٦ سنوات وخمس سنوات والبنات صغار .وزوجته الأوله معاه . والرجل على ماسمعت انه مو حق خراب او غيره . واكد لي الخبر اخوال اولادي
نهاية كلامي / انتم اخواني واخواتي . فوالله مايجي الواحد هنا بالمنتدى ويفضفض ويشكي همومه إلّا انه هدفه يبغى يستفيد منكم . وانتو ماتشدون على بالنصايح والارشادات إلّا لمصلحتي وأنا عارف . ولكن فيه اعضاء يكون كلامه حارق وجارح . فأقسم بالله هي لو فيها خير . ماكان انا قررت على طلاقها . فوالذي نفسي بيده انها من يوم خرجت من حياتي وتأكدت انها تزوجت . كأنك اخذت مويه وأطفأت بها نار قِدامك . انا ارتحت نفسياً وانشرح صدري . ورب القرآن احس براحه وكأن صخره انزاحت من قلبي . نعم انا اعترف غلطت عليها . وأستفدت كثير وكثير وكثير من هذي الأخطاء ومستحيل وألف مستحيل اغلط على الزوجه الجديده . خلاص انا تعلمت من اخطائي ومستحيل يتكرر الخطأ . وخاصه انا استفدت والله كثير من نصايحكم . والله يجعل كل نصيحه منكم بموازين حسناتكم . فالمسلم مايخذل اخوه المسلم وانتو وقفتو معاي بتوجيهاتكم وانا استفدت . انا من الرجال الكتوم . اخفي همي بصدري. مااحب كثر القرقره
تؤمنون بالله ورسوله .(ونعم بالله) من يوم صارت المشاكل بيني وبينها قبل ٩ شهور وتطلقت وتزوجت وراحت والله يستر عليها . ماكلمت احد من زملاي بموضوعي ولااحد يدري عني اصلاً عن مشكلتي . اجي الدوام وتلاقوني اضحك صناعي . وأحاول ماابين نفسي . مااحد له صلاح بمشكلتي . وأنا اتكلم عن زملاي بالعمل . واحنا كرجال . مانحب نظهر نفوسنا ضعوف قدام زملانا بالعمل. انا ماني ضعيف اجلس اشتكي قدام زملاي . انا قررت اشكي همومي واحزاني وآلامي هنا بالمنتدى . لأني الشاهد الله جميعنا بالمنتدى اخ وأخت متعاونين ونسند بعضنا بالتوجيهات . والله العظيم ان لكم فضل بعد الله بأني استفدت كثير بتوجيهاتكم . لكن زعلي من بعض الاعضاء تكون الكلمه كأنها سهم تخترق القلب . خلاص انا غلطت . وانا بشر ماني ملائكه . فالنصيحه امانه تكون بذمتك . ماتكون كلمه جارحه وتطعن بها قلبي . والمشاكل اللي كانت بيننا . زي ماقلتو مو هذاك الغلط اللي هي بالغت فيه . فالحمدلله يمكن شر . والله اراد بي وبها الخير . فالحمدلله على كل حال