رد: لا أفهم معنى رسائلها!
ما تابعت مواضيعك السابقه وحتى موضوعك هذا ما قريت منه إلا شي بسيط
ودي بس أعلق على الحوار اللي دار بينكم البارح
يحسب لك محاولاتك للاصلاح واعترافك باخطائك وتقصيرك ويحسب لها تجاوبها معك ولو كانت ما تبيك ابد كان ما تحاورت معك أصلا واعتذرت من البدايه عن التحاور معك ولكن ألمح بارقة أمل بمجرد تجاوبها معك
مضمون الحوار مهم وتطرقتوا لنقاط مهمه وأساسيه
ولكن بصراحه وارجو انك ما تتضايق من كلامي, رغم أهمية كلامك واعترافك بالتقصير والاخطاء ... الخ
ولكن اسلوبك جاف إلى حد ما وكان ممكن تكون أكثر ليونه معها وتوصل نفس المضمون بدون تغيير وبدون ما تغفل أي نقطه مهمه
ابذكر لك بعض الأمثله من الحوار ..
بدأت كلامك بالشوق لها, وهذا شي حلو ولكنك ما استمريت ولا عطيتها كم كلمه عن حبك وشوقك لها وكان من الافضل الاسهاب بهذه النقطه, ولكنك عطيتها كلمه وحده وبعدين دخلت بموضوع بهذلة العيال على طول
كان ممكن ما تتكلم عن العيال أبدا وتخلي كل كلامك مركز عليها هي وعنها, فهي يهمها معرفة موقعها بحياتك والتأكيد على حبك لها ورغبتك بها لأجلها وليس من أجل تحسين وضع عيالكم
هي ما يجهلها وضع العيال لانها شايفه هالشي بنفسها وعايشته, وشي طبيعي لو رجعتوا بتكون النتيجه الطبيعيه وقف شتات العيال وبهذلتهم
تكلمت أكثر من مره عن مستقبلها المظلم بعد الطلاق وكأنك توصل لها بطريقه غير مباشره بأن مستقبلها المشرق مرتبط فقط باستمرارها معك وهذا فيه شي من الغرور منك وربما ينفرها منك هذا الاسلوب
كان من الافضل ترك الكلام عن مستقبلها بعد الطلاق لانها فكرت أكثر منك بنفسها ومآلها
وأن يكون كلامك عن مستقبلكم انتو الاثنين وانك ما تتخيل الحياة والمستقبل بدونها وانك راح تتعب بدونها وان مستقبلك المشرق مرتبط بوجودها بحياتك وانك تحب وترغب بشده بأن تكون شريكه معك بهذا المستقبل ببيت يلمكم كلكم مع عيالكم اللي جبتوهم للدنيا بكل حب وان تعيشوا بحب وانسجام .
سألتها أكثر من مره إذا كانت مستعده لتعديل أخطائها
وكان من الافضل أن تتكلم عن نفسك فقط بأنك مستعد لذلك وانك بدأت بتطوير نفسك
وتقول لها بأنك تتوقع منها ذلك بدون سؤال مباشر وانتظار جواب منها, لأنها لو رجعت لك أكيد بإذن الله بتعدل اخطائها وما راح تقول لك تراني ابرجع اسوي نفس الأخطاء !
ذكرت بكلامك انها انفعاليه وتسب وتشتم
كان من الافضل أنك تقولها " يا حلوك وانتي رايقه "
ذكرت بكلامك أكثر من مره هدوء وعقلانيه, وكان من الممكن أن تكتفي مره وحده بذكر كلمة عقلانيه ولا بأس من تكرار كلمة هدوء, فتكرار ذكر كلمة عقلانيه قد يوحي لها بأنك تنظر لها ناقصة عقلانيه .
يمكن تقول لي ولكن كلامي عنها من ناحية الانفعال والشتم والسب والتعجل وشتات العيال ... الخ
وغيره وكل الاشياء اللي انتقدتها صحيحه وهي تعرف انها صحيحه, فما المانع اني اذكرها ؟
اقول لك هذا وقت اصلاح وليس وقت عتاب وتعداد أخطاء, وانت سبق انك عددت عليها اخطائها وملاحظاتك عنها بمناسبات سابقه فلا داعي لذكرها بحوار اصلاح, ويمكن لو الحوار هذا جر لحوار ثاني تفصيلي أكثر من هذا وشعرت بأنها موافقه مبدئيا على العوده, يمكن حينها أن تحرجها بذكر أخطائك ( تبدأ بنفسك ) وتتعهد بعدم تكراها
ثم تقول لها أتوقع منك أن تفعلي نفس الشي بدون تعداد شي من اخطائها ابدا لأنها تعرفها من خلال كلامك المسبق إلا إذا طلبت منك ذكرها, عندها يمكنك التكلم عنها بذكر كل خطأ مره وحده فقط بدون تكرار للكلام وبإيجاز قدر الامكان
لأن الناس كلهم وحتى أنت وانا ما يحبون اللي يعدد اخطائهم حتى لو كانوا يعلمون علم اليقين ان الكلام كله صحيح ويحبون لو انذكرت اخطائهم أن الكلام يكون مختصر ومحدد بنقاط موجزه بدون تكرار أما المدح فتكلم إلى أن تمل .
التعديل الأخير تم بواسطة سـلـطـان ; 11-08-2017 الساعة 01:02 PM