لا احد منكم يخفي ان الام نبع الحنان والحب والكل يتفق على ذلك، وايضاً قسوتها حُب، لكن اللي اشوفه في امي مختلف جداً وبعيداً كل البعد عن صفات الامومه، امي للاسف الشديد لا تتحلى بحسن الخلق في التعامل واسلوبها عدواني مع ابنها الاكبر وانا يئست والله العظيم حاولت اكسب رضاها حاولت احتويها ولا زلت احاول، طبعاً عشت مع جدتي بعد ماطردتني بلا سابق انذار وسبق طردت اخي الصغير البريء لازعاجها منه، بعد طردها قلت في نفسي بغيب شهر شهرين ماراح ازورها لعل يلين قلبها لكن هذي اطباعها ماتتغير كعادتها تعلّي صوتها وتناديني ب "إبن الكلب" وكل مواضيعها ذم اهل ابوي وغيبة، طبعاً ابوي وامي مطلقين وتكره ابوي واهله بشكل فضيع مع انهم حليلين ومافيهم الا كل خير لكن هي فيها شي محيّر مدري وش اللي مخليها عدوانيّه عجزت اعرف سبب واحد، وايضاً وصلت كراهيتها لاختها واخوها بسبب دفاعهم عني، اللي ابي اوصل له اني مش عاق ولا ازكي نفسي و قد اكون مقصر معها وفوق هذا حاولت بكل السبل اكسب رضاها وتلبية طلباتها لكن مافي فايده ف مهما خدمت ومهما سويت تعاملني بسوء اخلاقها وتهينني وتستحقر اهل ابوي ولا اتوقع احد منكم يتحمل هالشيء بكره وراي زواج كيف اتصرف معها ؟ السؤال اللي يطرح نفسه كيف بتزوج كيف بتقدّم بدون امي؟!! اخاف الناس ترفضني بسببها ويهمهم البيت اكثر من الرجال نفسه، سبق اشتكت علي عند عمي وهو المسؤول عن حل قضايا العائله لاني لم ألبي طلبها حتى تحترمني،، ارجوكم ارجوكم لحد يقول مهما كان هذي امك انتو ماعشتو التجربه وماراح تحسون بالشي الا لما تجربون الموقف، الجدير بالذكر ان العم هذا عنده بنت احبّها وانا اخشى من نظرته لي واخشى الرفض، حتى اشتكت لاني مااعطيها فلوس وانا موظف على قد حالي اتقاضى راتب لا يزيد عن اربعة الاف وهي تملك راتب تقاعد 7500 وفوق هذا ابوي يعطيها 3000 مصروف لاخواني واعتقد مو ناقصها شي... كان من الافضل اعطيها لكن مثل ماقلت لكم رفضت لسوء تعاملها وقد اعطيتها هديه من طيب خاطر ولا زالت كما هي، غير كذا اسعى لجمع المال لانشاء مشروع أأمن فيه مستقبلي والخوف كل الخوف من نظرة العائله لي اخاف يفسرون اني عاق بوالدي وانا الحمد لله بار بأبوي وربي عوضني بجدتي الحنونه وراضين علي وماانسى وقفتها لي يوم تقول لي اعتبرني امك، واللي مريحني ان اغلب عايلتنا عارفين ان البلا مو مني بس بشكل عام بعضهم يجهلون وممكن ياخذون عني انطباع سيء خصوصاً عمي اللي ذكرته لكم، لذا احتاج نصيحتكم الطيبه هل ازورها واتحمل مساوئها واهانتها اللي محد يحتمله ! ام اخذ بكلام والدي وجدتي وازورها بين فتره وفتره لطالما سببت لي مضايقات نفسيّه ؟ وشكراً لكم