هلا بنات...انا وزوجي كان بيننا خلافات وصلت انه يقول اللي بينا انتهى وانه بيشوف حياته.. وانتقل لمدينة ثانيه يشتغل صارله كم شهر..
باختصار صرت اشتغل عالعلاقه لحد ما صارت نوعا ما كويسه ... بس مازال في حدود وفي غموض اوقات احسه يقرب و اوقات احسه يبعد ويرفض اننا نطلع لحالنا بس مع العيال عادي مافي اشكال( يعني احس اننا احنا كويسين بس مش مثل زمان-علاقتنا غريبه)... وانا عارفه انه عنده علاقات بس ما اعرف طبيعتها و ما واجهته(عرفتتها من التفتيش من وراه)... وطبعا انا متحمله المسؤوليه كامله البيت والعيال وهو ما يكلف حاله يسأل حتى لو بمسج..بس يجي اخر الاسبوع يقضي الويكيند معنا..دوره صاير مادي فقط.. ما يقصر وموفرلنا طلباتنا
بآخر زياره لمّح لانتقالنا انا والعيال معه!! وانا الان محتارة هل اترك اهلي والمنطقه اللي متعوده عليها علشان شخص شغّال خيانات وعلاقات.. انا وصلت لمرحلة الاكتئاب من التوتر اللي عايشته...
اوقات اقول اروح وانا مستفيده اخذ اللي ابيه منه .. واوقات اقول ليش اضغط على نفسي علشانه وهو مو عاملي حساب.
اول كنت اقول يحبني ومرده لي بس.. اوقات اقول اللي يحب يعمل حساب حبيبه ويهتم لأمره ..واوقات يجيني شعور انه يجاملني ..وما ودي اكون الزوجه ام العيال اللي يركني في البيت وهو مستمر بخرابيطه...هو صحيح وضّح رغبته في انتقالنا بس مو شرط حباً فيني يمكن علشان عياله مع العلم انه مو حولهم او يمكن علشان المجتمع ..او يمكن يبي احد يهتم فيه ويلبي احتياجاته بغض النظر عن السبب في الاخير هو المستفيد...وانا ما ودي اكون الزوجه المطيعه اللي تجي على نفسها...افكر اتناقش معه اني ما انتقل الا لما تكون علاقتنا طبيعيه زي الناس ويحسسني بأهميتي عنده بس في احتمال اننا نرجع لورى.

اتفق معكم ان الأفضل لنا كعيله انتقالنا عنده... بس تشوفونها عدل اني انتقل وهو عامل حدود بينا وصاير غامض كثير اشياء ما اعرفها وغير كذا علاقتنا فيها حدود يعني متزوجين بس حاسه نفسنا اغراب... حتى كتاباته في السوشيل ميديا تحسسني انه مو مرتاح ... واوقات احسه عادي معي..تناقضات... ما اعرف كثير افكار تدور في بالي وكثير تحليلات وتفسيرات للوضع لأن مافي اي نقاش بيني وبينه وكثير امور معلقة ما تكلمنا فيها... ولا وضحناها... يعني نفسي اقعد اتناقش معه ودي اوضح له اني ما اقدر انتقل واحنا علاقتنا كذا ..ودي اعرف دوري في حياته وليش مستمر في علاقاته... وايش نوع هالعلاقات واحسه ما يحترمني خصوصا انه وحده من اللي يعرفهم تعلق كثير عنده بحسابه واحس بينهم ميانه شي يقهر اني مو قادره اخش في عينه..مو حاسه بالأمان ولا بالاستقرار ...عقلي شغّال بس يحاول يفسر تصرفاته..انا حاسه انه حاطني في جيبه ..اتمنى تكونون فاهمين تضارب المشاعر اللي عندي...انا صحيح متماسكه ظاهرياً بس جداً تعبانه نفسياً ..