السلام عليكم
انا لأول مره بشارك فى المنتدى الجميل جدا ده ونفسى انكم تساعدونى فى حل مشكلتى اللى ها أعرضها عليكم لأن بثق جدا فى أرائكم . ومشكلتى بتتلخص فى الأتى
انا عمرى 27 سنه . خطبت بنت عندها 19 سنه ماكانش فيه اى علاقه بينا قبل الخطوبه لكن بجد حبيتها من أول نظرة واتقدمت لخطوبتها وبعد الخطوبه بيومين اتنين صارحتنى بحاجات غريبه وهى انها بتحب واحد تانى جدا وان اهلها اجبروها على الموافقه على وكانت صريحه معايا جدا وانا كنت سعيد بصراحتها دى وعرضت عليها انى افسخ الخطوبه واظهر لأهلها ان دى رغبتى انا فرفضت وقالتلى ان مفيش امل ان اهلها يوافقوا على انها ترتبط بالإنسان اللى بتحبه وانها كمان مش هتلاقى انسان احسن منى علشان ترتبط بيه لكن طلبت منى انى اسامحها وكمان اساعدها فى انها تنسى حبيبها ده ووعدتنى انها كمان هاتحاول تنساه .
وبالفعل بذلت كل جهدى انى اخليها تنساه ودا بالعطف والحنان معاها لأنى فعلا حبيتها بجد
وفعلا دلوقتى هى نسيته تماما وانا متاكد من كده
لكن هى دلوقتى طلبت منى اننا نسيب بعض علشان هى حاسه انها اجبرت على الإرتباط بى وقالت اننا نسيب بعض لفترة بس علشان تفكر فى وكأنى متقدم لها لأول مرة بدون اجبار من اى حد وساعتها توافق على بإرادتها مش غصب عنى .
لكن انا خايف انفذ طلبها ده وبعد كده ما أقدرش ارتبط بيها تانى لأنى فعلا بحبها جدا
أرجوكم دلونى أعمل ايه فى المشكلة دى
وشكرا