تايهة وبدي المساعدة بمشكلتي رح أطلق.......
السلام عليكم
يا جماعة انا الموقع عجبني كتير وحابة اطرح مشكلتي عليكم وبتمنى انكم تساعدوني بسرعة وانا رحت لقسم المشاكل المحلولة لكن ما كان في مكان فارغ للمشاركة ما بعرف ليش؟؟؟ المهم
انا بنت عايشة ببلد اوروبي من تلات سنين وعمري 20 سنة والان الحمد لله متزوجة من 7 أشهر تقريبا وهلا حامل بخمس أشهر وانا وزوجي اخدنا بعض عن حب رغم انو اهلي ما كانو موافقين بس انا الي اصريت على الزواج منه لاني بحبه والحمد لله اهلي وافقوا بالاخير وبفترة زواجنا مرينا بمشاكل كتيرة متل اي مشاكل بتصير بين اي زوجين ببداية الحياة.......
ومن بين هاي المشاكل بعد زواجي بشهر صارت زعلة قوية بيني وبينه فطردني من البيت لبيت اهلي ونويت بعدها الطلاق منه فاهلي عصبوا بالبداية لكن بالاخير صلحو الوضع ما بيني وبينه لانه اتاسفلي ووعدني انو يكون كويس معي فرجعتله والحمد لله صار كويس فعلا.......وهلا صارت مشكلة جديدة بيني وبينه انو في وحدة من عائلتنا بس من قرابة بعيدة أذت عائلتنا كلها وصار عليها سمعة مو كويسة من كل الناس فقررنا الابتعاد عنها ومقاطعتها للابد فيوم من الايام كنت عند امي نايمة بزيارة فجلست الماما وزوجي عشان تشرح لزوجي سبب قطيعتنا منها وصارت تبكي الماما لانو الماما بتعزعها كتيروتقريبا الماما كانت متل الام لالها فمو سهل عليها مقاطعتها فلما شرحت لزوجي كل شي طلبت منه انو ما يحكي لحدا اني حكيتلك فقالها طيب فقلها بس بدي اطلب طلب من زوجتي امامك يا مرت عمي فحكتله اطلب فقال انو زوجتي ما تدخل هادا الموضوع على البيت فقالته اكيد رح يصير متل ما بدك ان شاء الله.........
فبعد اسبوع زرت الماما مرة تانية وانا عندها بعثلي زوجي مسج وبقلي ابعتيلي رقم هاي المرة الي قاطعناها فقلتله ليش فقلي ما الك دخل وابعتيه فقلتله ما عندي اياه لاني محيته من موبيلي فحكالي انتي كذابة وبدك تبعتيه هلا فحلفتله والله مو معي فقلي خلص انا رح ادبره بمعرفتي فانا صابني الجنون ساعتها بانو هاي المرة ما الك دعوة فيها وسمعتها مو كويسة فكيف تحكي معاها وانا زوجته مقاطعته فعصب علي وقلي انت ما الك دخل انا بدي اطمن عليها وعلى الاولاد فقلتله انت مو طلبت مني اني ما ادخل الموضوع بس انا ما دخلتو ليش انت الي دخلته فقالي انا ما دخلته وانا ما حدا بياخد قرار عني اني أحكي مع مين او ما احكي مع مين وقلي بالاخير بكرة رح يوصلوكي اغراضك عند امك وابقي عندها وسكر الخط........فرجع حكى مع الماما وقالها انو بنتك مو مرباية وبكرة حيوصلوكي اغراضها وسكر الخط بوشها وحلفت ماما بعديها انو ما ارجعله لو شو ما صار وكل عائلتي كمان قررت هادا الشئ وانا ايدت هادا القرار بالاول لكن بعد مرور تلات اسابيع بديت احن لاله لانه الحمد لله صحيح هو كان متعبني شوي بس كريم كتييير وحنون علي وبحبني موت فبعد التلات اسابيع طلب انو يحكي معي فوافقت فقلي بترجاكي ترجعي لبيتك انا مالي استغناء عنك وانا اسف وانا كنت بلحظة عصبية وما كنت اقصد ووالله رح اخليكي ملكة بيتك ولو بموت مرة تانية ما بطالعك من البيت بس ارجعيلي انا محتاجلك ........فهون بلش الصراع بداخلي اني كيف بدي ارجعله والماما واهلي رافضين انو ارجعله وهم يقلولي انو هو اهان كرامتك وهادا انسان ما بيستاهلك ابدا بس بالاخير قالولي انو اذا بترجعيله لا نحن بنعرفك وانت بتعرفينا اذا بدك تجي زيارة بتجي شوي وبتروحي ونحن ما النا حكي مع زوجك ابدا فهون صار الصراع الي رح يموتني وانا حامل يعني المسالة مو مستحملة معي ابدا .......اصبحت بين نارين ما بين امي وخواتي الي انا متعلقة فيهم كتير وبين زوجي الي وعدني انو يتصلح وما يعيدها مرة تانية والمشكلة اهلي مستسهلين الطلاق كتير وانا بهاي اللحظة محتاجة اكون بقرب زوجي الي بحبه وبما انو اول ولد بحياتي مو حابة اكون فيه بعيدة عن زوجي فشو اعمل وشو اساوي رح اموت الا شوي.....
وصات الخبطة حواي مرة بقول بدي ارجعله وما بقدر استغني عنه لاني بحبه وعشان طفلي الي جاي ومرة بقول لا ما بدي ارجعله لانو اهان كرامتي وانا سامحته كتير واهان كرامه اهلي وانا الي الله وهون ببلاد اوروبا الحمد لله الانسان ما بحس حاله انو عايش عاله على حدا ابدا لانو كل شي موفر بس مو المصاري الي انا عم افكر فيها عم افكر بمشاعري واحاسيسي الي رح تتدمر بعد طلاقي ........قلولي شو الحل بتراجاكم ردو على مشكلتي وبردولي النار الي جواتي...
ملاحظة( الماما مرت بمشاكل كتير بحياتها بانو اتزوجت تلاته بحياتها الاول وهو بابا وخلفت منو انا واختي واستشهد بعدين واتزوجت مرة تانية وخلفت كمان بنتين وانسجن واطلقوا والمرة التالتة اتزوجت وطولت 9 اشهر بس واطلقت لانو طلع انسان مو كويس فانا بقول يمكن الماما خايفة علينا كتير وكرها للرجال يمكن عم بيأثر علينا بس أنا شو ذنبي بدي أعيش حياتي طبيعية متل ما كنت أتمنى ) شو رأيكم؟؟؟؟؟؟