السلام عليكم اخواني و خواتي..
لا ادري من اين ابدا .. من اليوم ؟ ولا من شهر؟ ولا من سنة؟..!
انا ودي افضفض الصراحة اسمحولي بتطول السالفة.. و ابيكم تحكمون
تزوجت من سنه و اربع شهور من شاب بالثلاثين حسن الخلق و ملتزم لله الحمد و هو وحيد امه و ابوه ماله اخوان ولا خوات.. امه مريضه و ابوه ريال عود و ماله شغل بشي يعني كل شي على راس زوجي هو الابن و البنت و الزوج و الاخ و الاخت لوالدته .. اكيد فهمتوني.. المشكلة مو هني بالعكس و النعم فيه,, المشكلة مع بداية زواجنا سافرنا اول ما عرسنا لثمان ايام ولم يدخل بي قلت اكيد ما عنده خبرة ولا سوالف من قبل.. ما علقت رجعنا ديرتنا لقينا امه حالتها تعبايه و بدت المشاكل من مستشفيات و ضغط نفسي و كنا عايشين في شقة مع اهلة مؤقتا لي فيها غرفة و حمام اكرمكم الله و ما كنت ماخذة راحتي لان غرفتنا يم غرفة اهلة يعني عسى ما كحينا الا اسمعونا.. و طبعاً ما دخل علي الا بعد ما تزوجنا بثلاث شهور و كانت نفسيتي تعبانة و شاكة في نفسي .. شلت اهلة فوق راسي و كنت اودي امه مراجعاتها في المستشفى وقت محاضراتي لان يكون مشغول،، و تحملت امة المدخلة في اغلب امورنا حتى الطلعة محسوبا علي و عليه وين رايحن متى رادين .. يلا تاخر الوقت .. و انا صابرة بس ما انكر ان وصل حدي بعض الاحيان و ابطها عند زوجي ابكي من الي فيني و هو يقولي ميخالف تحملي و انا اتحمل علشانة...
سافرو بالصيف الي طاف علشان الوالدة تتعالج و خلوني لان كانت فترة امتحاناتي و انا الي شجعته على السفر قلت له لا تحاتي انا بكون بخير ان شاء الله و راح الحقكم واالله ان كانت اصعب فترة مريت فيها بس تحملت علشانة و اقول اجري عند رب العالمين..
و فوق كل هذا لما لحقتهم كان الهم اكبر مع امه .. لان كنا 24 ساعة امجابلينها ما نقدر نشم هوا حتى.. لين ردينا بالسلامه ..
هالفترة كلها مرت و الريال مادري اشسالفتة ما يقرب مني الا من وين لي وين .. و اكون انا الي طالبة منه .. وايد يدقرني كلا حجتة ان تعبان و يبي ينام انا تعبت الصراحة لي احتياجاتي من هالناحية
كنت اقولة خنروح نهاية الاسبوع نغير هالجو المضغوط الني جد وايد مضغوطه و ما حسيت اني عروس ..ماكو فايدة
المهم الحين في هذه المرحلة انتقلنا بيتنا الجديد الي انا لي فيه طابق خاص يعني الخصوصية و اخيراً ولكن يا فرحة ما تمت .. الوالدة اتعبت و جبناها فوق عندنا خصصنا لها غرفة و معااها سستر تراعيها و انا ما علقت .. بالعكس حدي متعاونة.. الحين يا اخواني يكتب لكم الي امتعبني على شكل نقاط علشان حاسة اني ضيعتكم..
1- زوجي بارد جنسياً .. ما دخل علي الا بعد 3 شهور
2- وايد اتضايق من نفسي لما اطلب منه الجنس و احتقر نفسي لما يردني
3- كثير التدخل و التذمر في امور البيت الي هو ما المفروض يتدخل فيها
4- كثير الطلعات و ما اشوفة الا وقت الغدا و بعدها ينام العصر و بعدها يرد يطلع
- و هذا الي خلاني اكتب هالموضوع ان صارله اكثر من شهر ما ينام معاي بنفس الغرفة بحجة ان السرير كان صغير و جبنا اكبر صار عذرة مابي اضايقج لما امي تطق الباب الصبح معني ما يبت طاري هالموضوع !!
انا حامل و ولادتي بعد 5 شهور .. و هو ما ينام معاي الحين باعذارة هاذي و بعدين لما اولد بكون 40 يوم عند اهلي و بعدها بكون عذرة ان الياهل يسبب له ازعاج ف بنام بغرفة ثانية و راح تستمر حياتنا كل واحد بصوب

يا اخواني تعبت من هالعيشة ما يبيني اشتغل و لا حتى التحق لي بدورة علشان الهي عمري شوية .. كل ما جبت له طاري يجاوبني انت جابلي بيتج اول و بعدين قولي دورة
انا امفكرة اروح انام في بيت اهلي كم يوم لاني جد احس مالي اي داعي في هالبيت و بعد كل هالتضحيات
هذا حالي في سنة و نص زواج.. فما بالكم بعد 10 سنين اشبيكون؟