مشكلة محتمل يتعرض لها أحد الوالدين .. الأم أو الأب .. والأخص الأم .. لانها بطبيعة الحال تكون الأقرب لأبنائها من الأب .. وهي إحراج .. أكثر من كونها مشكلة بحد ذاتها .. وما أعتقد اني أول أم تتعرض لها .. بس حسيت باحرج شديد وانا اواجه تساؤلات بنتي اللي بلغت سن يسمح لها تحاورني بانفتاح .. إلى أن سألتني سؤالين ما عرفت بشو أجاوبها على الرغم من اني عاطيتنها هي واخوانها الحرية في إبداء آرائهم بمطلق الحرية ولكن بحدود الأدب ..

قد تنتقدوني بطريقة تربيتي لأبنائي .. مثل كل اللي حوالي .. ولكن اللي أترجاه منكم تتفهمون طريقة تفكيري ..

وإليكم نبذة عني وطريقة نأتي اللي أثرت بشكل غير مباشر بطريقة تربيتي لأبنائي ..

تزوجت وأنا لم أكمل ال 16 سنة من عمري .. يعني في الوقت الحالي .. يسمونهم أطفال .. طان الزواج بموافقتي .. لاني كنت اريد أهرب من البيت اللي كله قمع .. وارهاب اذا اني ابديت أي رأي خاص فيني بأي مشكلة ممكن تعترض أي بيت في الدنيا .. وكانت الردود علي .. اني بنت مب مؤدبة .. واذا تكلموا الكبار فالصغار ينطمون ويسكتون .. واطلعي من الغرفة .. وما يخصج بسوالف الكبار .. اول سيري خلصي دراستج بعدين تعالي تكلمي معانا .. وهذا كله لاني آخر العنقود .. اللي احس انه يكون مظلوم من الكبار ..

المهم .. وصلت لسن ال 16 .. وعلى الرغم من عروض الزواج .. اللي ماكانت تخلص .. لاني وبشهادة الجميع .. مشهود بجمالي .. وأدبي وحسن تعاملي مع الناس .. وكنت محبوبة ولازلت بفضل من الله من اميع .. وأولهم كبار السن .. بس أنا اخترت زوجي من بين ألف .. لانه الشي الوحيد اللي ما يقدرون يقمعوني فيه هو اختياري لشريك حياتي .. وهو يقرب لنا .. وأناكنت أحس تجاهه بالحب العذري ..

المهم تزوجت .. وبعد سنة ونص كانت عندي أجمل بنت في الدنيا .. أنا تركيزي بيكون عليها أكثر لاني مرتبطة بها عاطفيا .. لاني أحس اني ربيتها وربيتني.. المهم كبرت البنت .. وكنت أنا وياها ما أحس أني أم .. كنت أحس انها لعبة وجتني على طبق من ذهب . وماحسيت انها بنتي الا يوم بلغت .. هنيه حسيت اني أتقرب لها أكثر .. وصرت أصارحها بكل شي ((لانها ماشالله عليها .. عقلها وايد كبير .. واللي يقعد معاها يتحراها بنت كبيرة)) .. وأحيانا نتعاون انا وهي على ابوها .. بس في حدود المزاح .. فاهمين بعضنا .. لدرجة كبيرة .. من دون مانتكلم .. بس تكفينا نظرة العيون نعرف شو اللي يدور في الخواطر ..قامت تقول لي أشياء صعب ان أي بنت ي مثل سنها تقولها لأمها .. أشياء ولا في خيال أي حد ممكن يتصوره .. صار اللي يجمعني فيها علاقة صداقة أكثر منها علاقة أمومة .. هي غانيتني عن الصديقات .. ,انا غانيتنها عن الصديقات .. بس ما أسوي لها أي حواجز بينها وبين صديقاتها الفعليات .. لدرجة أنها يوم تتكلم عني عند صديقاتها .. الكل يحسدها على اللي هي فيه .. ويوم تقول لهم ان امي تقول لي كذا .. أو أنا قلت لها كذا .. ما كانوا يصدقونها .. لين أثبتت لهم بطريقتها الخاصة ..

وأنا من أول يوم طحت عيني عليها .. في غرفة الولادة .. أقسمت بيني وبين نفسي .. اني ما أخلي هالبنت تتزوج لمجرد انها تشرد من الضغوط اللي يمارسونها بعض الأهالي على بناتهم .. يخلونهن يدورن على المعرس .. بشكل أو بآخر .. علشان لا تستعجل في الزواج .. وتكون لها فرص أكبر لتكوين مستقبلها العلمي .. وبعدين إذا كتب الله .. بيشرف النصيب .. لا تستعجل على الطلعة من البيت .. ولا انها تشل الهموم من طفولتها .. وكانت لها حياة مليانة دفئ وحنان وشقاوة .. وعوضت نفسي ببنتي عن اللي كنت مفتقدتنه في بيت اهلي قبل الزواج..

وأنا استوقفتني مشاركة الأخت مستحية .. وهي تقززها من الزواج والمتزوجين .. بسبب ان ثقافتها الجنسية كانت مبهمة لين صارت في الأول ثانوي .. وانا ما اريد أشوف بنتي .. أو أحس انها تفكر بهالطريقة .. وهي اللي خلتني أكتب عن المشكلة اللي انا متعرضة لها الحين ..

سؤالين بنتي سالتني أياهم قبل أسبوعين .. ومن ذاك اليوم .. وانا أحاول اني أغير الموضوع وأتهرب منها .. بس بطريقة ما تخليها تحس اني أتهرب .. أو أني محرجة من أي سؤال توجهه لي .. لاني ما عمري قفطتها في أي شي أو أي استفسار توجهه لي .. تكون الإجابة ندها من قبل لا تكمل السؤال .. الا هالسؤالين ..

السؤال الأول: شو يعني الاغتصاب؟
السؤال الثاني: شو يعني علاقة جنسية؟

وبالنسبة للسؤال الثاني .. سألتني وجاوبت هي عليه بطريقة عفوية وبريــــــــــــــــئة .. ((يعني الجنسية والجوازات)) .. أنا كتمت الضحكة .. ومشيت الموضوع من دون لا أرد عليها ..

افيدوني .. شو هو الجواب المناسب .. ولا تقولون لي خليها تقرأ كتب .. لانها بصراحة كسوووووووووووووووووووووووووووووووووووووووولة بمسألة القراءة غير القصص .. وما لها بارض انها تمسك كتيبات أو كتب .. أو انها تدش على النت علشان تقرا مواضيع المنتدى .. أخاف انها ماتفهم .. وانا مثل ما استشفيتوا من خلال كلامي .. احب اني اوصل لها المعلومة بنفسي .. قبل لا تاخذها من أماكن غلط .. ومن جهات ما أثق فيها .. على الرغم من ثقتي ببنتي وطريقة تفكيرها وسلوكياتها .. بس أخاف عليها وأغار عليها.. بشكل جنوني ولو من كلمة تجرح مشاعرها ..

علموني على الطريقة أو المفردات اللي أستخدمها معاها .. لتوصيل الفكرة لها .. بس بأسلوب مقنع .. بليز لاتهملوا رسالتي .. واعتبروها استنجاد بنتي .. علشان لا تتعقد وتخترب نفسيتها .. مثل بعض النماذج في الحياة ..

وأتمنى انكم تعتبرونها بنت من بناتكم .. وكأنكم توجهون لها الإجابة .. بس عن طريقي أنا ..



والشكر الجزيل لكم ... والسموحة على الاطالة ..