أعرف ان الموضوع للشباب لكن بذكر تجربتي للفائدة..
يوم الشوفة كان ملخبط و ما صار اللي توقعته، أول ما فتحولي باب المجلس استقبلني بابتسامة وهاذا الشي يساعد كثير (^_^)
دخلت مع أم خطيبي وخالته وأنصدمت باخواني الكبار واخوانه الصغار قاعدين وفي حريم واقفين عند الباب يشهدون الحدث (خواته وأمي و ماعرف من)!!!!
طبعا أنا ارتبكت وعقلي مو مركز أبدا وكل همي اني أطلع من المجلس!
جلست على كرسي و هو على كرسي ثاني جنبي
ما قدرت أشوفه ولا هو قدر يشوفني لأني كنت أشوف اخوي وأشوف الحريم ومنزله راسي، و هو مسكين مرتبك من اخواني والحريم ويحاول يشوفني وما يقدر، ما قدر يكلمني ولا قدرت أكلمه..
خالته حاولت تفتح مواظيع عشان نتكلم لكن أبدا، ما كان في أمل حد منا يفتح فمه إلى أن سلم و طلع و أنا منصدمه و هو منصدم منهم و من الموقف، لأنه ما اتوقع اللي صار واتوقع اني أدخل مع امه وخالته ويشوفني ونتكلم دقيقة وأنا اطلع!! وحسيت انه بكون مرتاحه معاه اذا ما كان كل هاذا الجمهور يشوفنا واحنا في هالموقف، طبعا بوجود أحد مثل امه أو اخته..

فنصيحتي لكل شاب مقبل على هاذا اليوم انه تسأل اهلك عن اللي بيدخلون معاكم المجلس و تأكد انو محد يدخل معاكم غير احد المحارم اللي البنت ترتاحلهم مو العايلة الكريمة كلها ماشاءالله!
الخطوات يوم الشوفة:
- استقبلها بابتسامة خفيفة
- حاول ان تجلس في نفس الوقت اللي حتجلس فيه
- لا ترتبك عشان ما ترتبك البنت
- اسألها عن حالها ودراستها اذا كانت تدرس أو شغلها اذا كانت تشتغل
- ابدي اهتمامك باجوبتها واختصر الكلام
بعد هذا استاذن واطلع وان شاء الله الأمور تتيسر وبعد هذا اليوم انت تركت انطباع حلوا للبنت وبتتعلق فيك أكثر..

تحياتي.. الشقراء