جلساتنا يالبنات
أي هين مايليق الدلع اللي علي انا وهالشوشه
ولا تكفين انا وركبي السود وش الدلع اللي بيليق علي !
واللي تعلق على جسمها واللي على صوتها واللي على لونها
طيب يعني انتي مخسوفه خسف مافيك شي يفتح النفس ؟ ولووو وش دعوه
شعرك؟
طيب عيونك؟
طيب بشرتك وش اخبارها ؟
طيب جسمك؟
طيب صوتك؟
طيب شفايفك؟
طيب اللولو اللي بفمك ماتحسين انه حلو
طيب لو قلنا كل ذولي مو فيك
شعرك
تعالي قوليلي عن شعرك؟
مو ناعم مو طويل ؟ تحسين انه مايليق بوحده دلوعه؟
طيب الحين كل المستحضرات اللي فمحلات التجميل وعند المشاغل ماتحل مشكلة شعرك المستعصيه؟؟
لاحظي هنا اني ماتكلم عن علاج؟ انا اتكلم عن تجميل واخفاء ماياخذ وقت اسابيع وشهور زي العلاج
طيب شعرك خشن مثلا ؟؟
ماتسشورينه؟ ياكثر اللي شعرهم خشن وكله جمال مثل مين ؟
انا واثقه انه ماتمر مناسبه الا وتقولين شوفي فلانه شعرها الليفه صاير يجنن وشوفي علانه الصبغه مخليه شعرها يهبل وشوفي ذيك يجنن الكيرلي عليها واللي قاعده هناك التجعيد مخليها
حلوة جدا وهاذي اللي جنبنا شعرها على طبيعته مجرد مسشوره كم خصله منثوره على جبينها وطالعه
شيء جنان
طيب وين هالشي فيك أنتي ؟؟
كل البشر في شي يحلي شعرهم الا انتي ؟؟
....
فكري تقصين صوره وتاخذينها معك المشغل وقلتي ابي هالقصه وهااللون وهالتسريحه؟؟... ولا عايشه بتحطيمك لنفسك وقلة ثقتك بنفسك طول ايامك لين يجي عرس ولا مناسبه وتطيرين للمشغل تقصين وتصبغين وتسشورين ؟؟ وتشوفين روحك ذيك الليله ولا كل الجميلات ؟؟ وبنفس الوقت كل ماشفتي وحده حلوه ومرتبه اتجننتي عليها كنها من تصبح الصبح لين تنام وهي كذا ماكنها من اسابيع تجهز الفستان والاكسسوار والميك اب المناسب والتسريحه وغيره وغيره ؟؟ ليش دايم تفكرين كذا ؟؟ ليش ماتقولين ان الكل شايفك حلوه وطالعه غير هالمره؟
طيب بالامانه لما كشختي آخر مره ورحتي زواج :14: او مناسبه بالله مو من اول ماتدخلين تحسين رقبتك طايله شوي هههههههه والثقه فوق وودك تسولفين وتحسينك مبسوطه من جوا وودك الكل يشوفك وتشوفين نظرات الاعجاب بعيونهم حتى لو ماقالوا البنت تعرف من نفسها اذا كانت اثارت الاعجاب او حتى الدهشه لتغير شكلها لو شي بسيط
طيييب تمام؟
صدقيني ..ولو فعلا فهمتي اللي قصدته وطبقتي الفكره وتعمقتي بالاحساس بيجيك هالحلى كله وينصب فوجهك وابتسامتك وعيونك...
والحين مالك عذر .. مافي اكثر من القصات والتسريحات
مليون قصه تناسب كل رسمه وجه لكن روحي للشخص المناسب
ولما تروحين لهالشخص لاحظي انه مايعرفك يعني لاتخلين الكوافيره تقرر عنك لازم تتفقين معها حتى لو خذيتي وقت طويل تتناقشين فيه معها او حتى لو كلمتيها ورجعتي بيتك وفكرتي زين وتوصلتي للقصه اللي تريحك ورحتيلها يوم ثاني
عشان ماتطيحين فمطب الموضه والخربطه حتى لو شفناها تجنن عليك مابتجيب نتيجه لان الشخص اللي المفروض يشوفها حلوه عشان تجيب مفعول هو انتي مو غيرك
بمعنى اذا كنتي انسانه عمليه وماعندك وقت لاتختارين قصه مثلا تدريجها لازم يستشور لامحاله ولا مايطلع مرتب؟؟ او مثلا من القصات اللي اطراف الشعر تنقص باشكال مثلثات صغيره او الاطراف تقصها بالشفرها وغالبا هالشي ماتلاحظينه تسويه وهي تقص بدقايق وانتي ماحسيتي اسالي عنه لانه يعدم اطراف الشعر رغم انه يطلع حلو لكن المشكله انك لازم تجددين اطراف الشعر كل كم اسبوع وخصوصا اذا بتسشورين كل يوم وبكذا بتخسرين من طوله في حالة كنتي حابه يطول..وبكذا مابترتاحين ونكون ماستفدنا شي
اوممكن تقص لك قصه ستايلش زياده عن اللزوم وعلى الموضه وانتي بطبعك ولبسك تميلين للنعومه مو للحوسه الكثيره والخصل الملونه ومية طبقه ويوم مرفوع يوم منزل يوم على جنب ..فاذا سوت لك شي مايناسب شخصيتك حتى لو ناسب شكلك مابترتاحين لانك بتحسين انه مو انتي او تلقائيا بترجعين للتمشيطه الهاديه والتسريحه الناعمه وتضيعين القصه ومابتطلعين حلوه لافنظر نفسك ولا فنظر الناس
يعني لازم تقتنعين غصب عنك ان مو كل شي ناسب شكلك بيناسب شخصيتك وطبعك ولا كل شي يناسب شخصيتك وطبعك زي اذا كنتي مجنونه شوي بيناسب تصميم وجهك .. اتمنى تكونين اقتنعتي
....
واللف الحين مافي اسهل منه في لفافات كهربا ماتاخذ معاك خمس دقايق وفي اللفافه اللي تجي زي السشوار تشبكينها فالكهرب وتلفين فيها وفي برضو الفير اللي تشبكينه فالكهرب يلفلف الشعر ويطلع يجنن
وبرضو الخصل تحلي كثير والحين مافي وحده تقدر تقول ماتناسبني لان صارت بكل الالوان بدايه بالثلجي ودرجات البيج والذهبي مرورا بدرجات الاحمر والعنابي والفوشي ونهايه مع الاوان المجنونه الاخضر والازرق والموف وغيرها ..ودرجات الشوكولا الحين طايحين فيها للسمر تطلع تجنن مع الشعر الاسود او البني الغامق
وبرضو اذا شعرك خفيف في مليون حل .. منها تلفيف الشعر وتلوين بعض الخصل يعطي كثافه .. التجعيد برضو يزيد من حجم الشعر .. برضو قص اطرافه الشعر ثلاث درجات وكل درجه بينها وبين اللي قبلها نص سم هاذي اوعدكم انها تعطي حجم اضافي للشعر عن تجربه... بعد اكسسوارات الشعر تبعد التركيز عن الشعر نفسه .. والحركه اللي يسوونها الكوافيرات فالتسريحات اللي يحطون قطعة شعر منفوشه جوا ويحطون خصل شعرك فوقها اكيد عرفتوها تقدرين انتي بنفسك تسوينها .. اقسمي شعرك فالعرض يعني من الاذن لعند
الاذن الثانيه وخوذي الخصل الاماميه بس من الجزء الخلفي ومشطيها بالعكس بفرشه يعني من الاطراف للجذور كل خصله اكثر من مره لين تنتفخ لين تخلصين من الاذن للاذن بس الخصل اللي فالبدايه يارب فهمتوا وبعدين تنزلين الجزء الامامي من الشعر عليها ولاتمشطينه رتبيه ترتيب بالفرشه بدون ماتخلينها تتخلل شعرك وحطي اكسسوار حلو وكم خصله على وجهك وبتطلعين حلوه..وابعدي عن عزل الشعر سواء من النص او الجنب لانه يبين خف الشعر ... وفيه بخاخات حسب الوان الشعر تلقينها بمحلات التجميل تبخينها على فروه الراس اذا كانت مساحات الفراغ كبيره تعطي حجم اضافي ومهما كانت نوعية التسريحه اللي بتسوينها بيطلع شعرك حلو بدون الفراغات بس للامانه مادري عن حكمها اذا محرم لان فيه نوع من الغش او لا ماعندي فكره ولا اسويه لنفسي لكن اشوفه ... وبعدي عن الوان الشعر الغامقه لانها بتبين خف الشعر وبرضو تبهت وجهك... اتمنى من بين هالحلول البسيطه تلقين شي يناسبك.. والمنتديات الحين كلها ماتخلى من قسم متخصص بزينة المرأه خصوصا الشعر واكيد بتستفيدين منها ... والحلول كلها ماتمنع انك تحاولين تغذينه وتعاليجنه ومابياخذ منك ذاك الوقت ... واذا عشان زوجك.. سواء ماتبين ريحة زيت او ثوم او بيض او أي خلطه للشعر اقرب صيدليه خوذي فيتامينات أي انسان يقدر يستخدمها واحرصي بس على الاكثار من شرب الماء عشان ماتتعب الكلى والافضل تستخدمينها ثلاث شهور وتتركينها ثلاث شهور هذا كلام الدكتوره عشان مايتعود جسمك عليها او تفقد مفعولها .. برضو الفيفول او حبوب الحديد لها دور كبير بالمحافظه على صحة الشعر..وكمان في امبولات الصبار والفواكه والاعشاب اللي تستخدمينه قبل النوم تفركينها بفروة شعرك خمس دقايق وخلاص .وبرضو في انواع الزيوت المعطره للشعر تقدرين تستخدمينها بدون ماتزعجك الريحه وهذا كله عشان ماتنطون بحلقي وتقولون الريحه وازواجنا وماعندنا وقت وفوق هذا كله مالك غنى عن النوم الصحي والغذاء اللي بيحقق لك نتيجه اسرع ...
وقبل اخلص من فقرة الشوشه المنفوشه ... بقولك لاتنسين معطرات الشعر وهاذي الحين مافي اكثر منها عند نكتار وزهور الريف او انواع المسك فمحلات العود اللي مخصصه للشعر عشان تكمل طلة شعرك مع الريحه الحلوه ..واذا ماتبين بس بعد ماتتحممين فالشطفه الاخيره حطي نقطتين دهن عود مع مويه واشطي شعرك وبعد ماتطلعين بخريه وهو مبلول عشان تثبت الريحه وسشوري وياسلام على ريحتك
مممم يارب ماكون اعرف شي ونسيت اكتبه ..والحين خلصنا من حوسة شعرك يالدلوعه
يتبع