السلام عليكم... الله يعينك عليها بصراحه...لكن مو يمكن تكونين أنتي السبب

أخاف لاتكونين من الحريم اللي يتعاملون مع ازواجهم وازواجهم يتعاملون معهم بحب وحنان واهتمام قدام الاهل

وهالشي بحد ذاته لاعيب ولاحرام

لكن في امهات مساكين جهال وقلال حيله يتقطع قليبها على وليدها الغالي وهي تشوف كل دلعه واهتمامه وحبه لزوجته يناولها الكاس بيدها ويجيبها تجلس جمبه ولا يقوم يجلس جمبها.. بين وقت ووقت يهمس باذنها .. يناديها حبيبي قلبي حياتي ... وهي تناوله اللقمه بفمه وتدلع عليه وتضحك له وحركات لها اول مالها آآآخر ........بس ماينصح بهالشي ابد لانك بتثيرين غيرتها وعلى اقل تقدير بتثيرين حزنها وواتفه شي يصدر منها تنهيدة مدري هي حزن ولا ضيق ولا خوف من هالولد اللي كنه راح منها

كثير قرينا وسمعنا قصص عن بنات تطلقوا بسبب حمواتهم ...سمعت عن وحده حماتها ماتخلي زوجها ينام عندها تخيلي ؟ ينام عند امه او فالمجلس تحت .....

حطي فبالك شي ((لما تجيك ريح قويه لاتحاولين تصدينها بكل قوتك..بكل بساطه امشي مع اتجاه الريح عشان ماتحسين فيها ولاتتعبك ))

يعني بدل ماتخبين الملابس وتشترين من وراها وتحاولين تسوين اشياء تعجز عنها ...

ليه ماتشوفين وش اللي تسوينه انتي ويسبب جنونها خصوصا وانك انتي بعظمة لسانك قلتي انك انتي الوحيده اللي تعاملك كذا .. وش معنى يعني ؟

ااظن واحد من هالاشياء
1- زوجك ولدها المفضل ؟
2- تغير عليها بعد زواجه فيك صار مايعبرها ؟
3- تدلعينه ويدلعك قدامها ؟
4- ظروفها تغيرت فجأه.؟ مات زوجها لاسمح الله ...فقدت عملها مثلا ..
في اشياء كثير لازم تفكرين فيها
بعدين انتي ماقلتيلنا اشياء مهمه
انتوا بس اللي ساكنين معها او الكل ؟ وليش سكنتوا معها ؟طلبها او رغبة زوجك؟
طيب مستواها التعليمي ؟ يعني حركاتها دهاء وكيد نسا ولا جهل وقل حيله ؟
متى بدت هالتصرفات؟ من اول ماتزوجتي ؟ ولا صار موقف معين او ظرف مر انقلبت بعده ؟؟

اقدر اعطيك طرق كثير تكيدينها وتطفشينها وتحرقين دمها ؟ بس حرام ام وكبيره وقليلة حيله
لاتقهرينها ..تخيلي امك مكانها وشوفي وش اللي ضيق صدرها وخلاها تترك هيبتها ووقارها وماتحترم سنها وتسوي حركات كذا تخلي حتى ولدها يكرهها ؟ اكيد شي مو سهل

اقسم بالله اني احس بحزن ماتتخيلين ؟؟ وربي يشهد ان عيوني دمعت عليها ..ماسوت كذا الا من حرقة قلبها
يمكن اكون ظالمتك مدري ...


لي رجعه ان شاء الله ..بس تكفين جاوبي على اسئلتي بصدق وحياديه وان شالله ماتشوفين االا اللي يسر خاطرك

على فكره ....ماجبتي طاري حالتها الصحيه وسنها ؟ عندها مرض نفسي مثلا ... سنها صغير نوعا ما يعني 45 ..50 ولا عجوز مره