علشان كده بحثنا ولفينا ودورنا علشان نلاقي الحلول اللي -إن شاء الله- أبدية للتخلص من شبح الشعر الزائد اللعين اللي بيطارد جمالك كل شوية
وعلشان نبقى بنتكلم صح هنعرض لك كل طرق إزالته بعيوبها ومميزاتها وإنت اختاري اللي يناسبك...
والمرة دي هنتكلم عن 3 طرق وهي:

1. الحلاقة الرطبة.

2. الحلاقة الجافة.

3. الماكينة الكهربائية


الحلاقة الرطبة


الطريقة دي بيستعملها الناس اللي ما عندهمش وقت وبتحقق لهم نعومة فورية ولكن الحلو ما يكملش لأن الشبح إياه هيطاردك تاني بعد يومين أو أربعة ويا ريت هيطاردك وبس ده هيطاردك بصورة أكثر خشونة كمان.

ولكن إذا كنت مصممة على استخدام الطريقة دي فخذي النصيحة دي علشان تحصلي على أنجح حلاقة رطبة وهي إنك تبلي الشعر لمدة دقيقتين على الأقل لترطيب الشعر وبعدين تبدئي عملية الحلاقة أو تنفذي الطريقة دي بعد أخذ دش لأن الشعر في الحالة دي بيكون لين جداً ولكن ابتعدي تماماً عن الوجه وفي المناطق الحساسة مثل تحت الإبطين لأنها هتسبب لك مضايقة لأن الشعر بينمو أكثر كثافة وملمسه بيبقى خشن.



الحلاقة الجافة








والطريقة دي كمان سريعة جداً وممكن تستخدميها في أي مكان حتى وإنت بره البيت لأنك مش محتاجة إلا ماكينة الحلاقة فقط ولكن نتيجتها أقل نعومة من الحلاقة الرطبة والشعر هيطلع تاني بعد يومين أو أربعة على الأكثر وهيكون خشن جداً زي الحلاقة الرطبة بالظبط.. وطبعاً الجلد بيكون جاف وخشن ولكن إذا كنت مستعجلة ومفيش قدامك غير الطريقة دي فمن الأفضل إنك تنفذيها بالليل لأن الجلد في الوقت ده بيكون أقل انتفاخاً من النهار وده بيسهل العملية وبيعطي نتيجة أفضل..

على الرغم من إن العملية دي مش مؤلمة إلا إن الحلو ما يكملش لأنها بتتطلب التزام متواصل للحفاظ على مظهر خالي من الشعر.

الماكينة الكهربائية

الطريقة دي من أكتر ال

طرق استخداما في مختلف أنحاء العالم لأنها طريقة نظيفة ومفعولها بيدوم من 20-30 يوم على حسب نوعية الشعرة. الطريقة دي بتشد الشعر من منبته ولكنها عملية مؤلمة لأنها تشبه الملقاط..

وهي مناسبة برضه لنزع الشعر خارج المنزل أو أثناء السفر لأن -زي ما قلنا- مفعولها بيستمر فترة طويلة..

وممكن تقللي الألم ببعض الطرق زي إنك تدهني المنطقة المراد نزع الشعر منها بقليل من زيت القرنفل لأن المعروف عن زيت القرنفل إنه بيخفف الألم وخاصة آلام الأسنان فادهني المنطقة دي واستني خمس دقائق وبعدين ابدئي في نزع الشعر وهتشعري بفرق كبير.

فيه نصيحة تانية وهي إنك تشدي الجلد بإيدك التانية علشان تسهلي عملية انزلاق الماكينة الكهربائية على الجلد.


الخروج بأقل الخسائر الممكنة من المعركة

بعد عملية نزع الشعر بأية طريقة

غالبًا ما بيكون فيه احمرار وتهيج للجلد وخصوصا للي بشرتها حساسة.. وعلشان كده بهديك بعض الطرق الطبيعية اللي بتساعدك على التخلص من آثار المعركة.. إحم أقصد عملية نزع الشعر بالطرق غير الطبيعية:-

• لو استخدمت طريقة الحلاقة في المناطق الحساسة وظهر احمرار فأذيبي قرصين إسبرين في نصف لتر ماء مع إضافة نقطتين جلسرين ومرري المزيج على الأماكن الملتهبة بعد قليل.

• اخلطي قليل من ماء الورد مع عصير الليمون والنشا لصنع مزيج تدهن به الجسم بعد نزع الشعر وده هيمنع تهيج البشرة.
تعتبر الوسائل الطبيعية في نزع الشعر المتمثلة في الحلاوة والشمع من أكثر الطرق المتعارف عليها في نزع الشعر أمنا واللي ما أثبتتش نجاحها وبس بل أثبتت كمان فعاليتها وأنها تستمر وتستمر وتستمر. متهيألي كفاية كلام كتير وندخل في صلب الموضوع بقى
نبتدي من الأول خالص ونقول إن فيه شوية حاجات لو عملتيها قبل استعمال الطرق دي هتوصلي لأفضل النتائج


بعض الطرق لتخفيف الألم

1)علشان تخففي الألم وفي نفس الوقت تزيلي الجلد الميت والشعر الصغير جدا... اخلطي خميرة مع عسل وخفيفيهم بشوية ماء ورد وليمون صغيرين...... وادهني المنطقة اللي عاوزة تشيلي منها الشعر واتركيها لغاية لما تجف وبعد كده ابدئي في نزع الشعر.



2) دوبي 3 معالق سكر في "نصف كوب ماء"...... مع قليل من الخميرة وحركيها جيدا وامسحي بيها المنطقة المطلوب إزالة الشعر منها وانتظري حتى تجف وبعدين انزعي الشعر.


3) وممكن كمان إنك تدهني المنطقة المراد نزع الشعر منها بقليل من زيت القرنفل.


4) أما المفاجأة اللي بتهديهالك "هويدا" هي........ معجون الأسنان!!!!! حطيه على المناطق الحساسة زي الوش مثلا لمدة 5 دقائق وبعدين امسحيه تماما وهتلاقي الألم ضعيف جدا أو حتى مالهوش وجود خالص.


5) وممكن كمان تستخدمي قشر الرمان وده بعد طحنه في الخلاط أو المطحنة وبعدين تنقعيه في مية لمدة ساعة وبعدين تصفي المية وتدهني المنطقة اللي إنت عايزاها وتسيبيها لحد ما تنشف علشان بصيلات الشعر تتشربه تماماً والخليط ده بيهدي البشرة جداً وفي نفس الوقت بيؤخر ظهور الشعر مرة أخرى وبيساعد على عدم تهيج واحمرار البشرة عند نزع الشعر.


أولا: السويت
اضطريت أسميها كده علشان

الناس، وأنا منهم، بتتضايق من اسمها التقليدي "الحلاوة".

ندخل بقى في الجد، الطريقة دي مفضلة عند بنات كتير مع إنها مؤلمة ولكنها طبيعية بالإضافة إلى أنها رخيصة الثمن وفي نفس الوقت بتدي نعومة حريرية.

وممكن صنعها بالسكر والمية مع قليل من قطرات الليمون أو بالعسل الأبيض أو الأسود بدون إضافات أو سكر ومية وقرص أسبرين -علشان تخفيف الألم- أو ممكن تشتريها جاهزة من الصيدلية وتريحي نفسك والشعر بياخد أكتر من شهر يعني هتشيلي الهم ده من دماغك لمدة شهر.

ولكن بننصحك بشوية ملاحظات لازم تاخدي بالك منها أثناء استعمال الطريقة دي:

• لو كنتِ بعد الشر من الناس المصابة بدوالي الساقين فالطريقة دي ما تنفعكيش خالص.

• راعي إن السويت ماتكونش سخنة قوي وإن حرارتها ما تزيدش عن 40 درجة مئوية وإلا هتكون سبب في تهيج الجلد وحرقه. وارتفاع درجة حرارته كمان بيسبب حدوث تمدد في الأوردة وتورم وتبقي بعدها عرضة للإصابة بدوالي الساقين.
  

افردي "السويت" على الجلد في طبقات سميكة حتى لا تترك أثرا لعملية الشد والجذب، وفور الانتهاء من إزالة الشعر مرري "لوسيون" مطهر على طبقة الجلد الخارجية أو استخدمي نصف ليمونة بدلا من "اللوسيون"، ومع إنها هتسبب ألم وقتي إلا أن مفعولها المطهر أكيد. وبتؤدي كمان لنعومة وتفتيح لون البشرة، وده اللي احنا عاوزينه طبعا.

ثانيا: الشمع


الطريقة دي هي الأنسب استعمالاً والشعر بينمو بعد خمسة أسابيع تقريباً والجلد ما بيتأثرش لأنه بيكون ناعم جداً والشعر الجديد بيقى ناعم كمان، ولكنها طريقة مؤلمة ونصيحتي ليكِ إنك تسحبي أشرطة الشمع بسرعة وبقوة عن الجلد وبعدها تحطي زبادي على المنطقة اللي نزعتِ منها الشعر لتهدئة احمرار الجلد أو استبداله واستخدام أي كريم مرطب...

وإذا كنتِ من البنات اللي بيعانوا من وجود عروق أو دوالي في الساقين فالطريقة دي مش مناسبة ليكِ زيها زي السويت تمام. ومكونات مزيلات الشعر الشمعية عبارة عن شمع عسل نحل وبارفين وزيوت ومثبتات تساعد على لصق الشمع على الجلد، وهو بيشيل الشعر من جذوره..

وبيستخدم الشمع الحار أو القاسي لإزالة شعر الوجه وأعلى الفخذين وتحت الإبطين علشان بيقدر يشيل الشعر القصير جداً اللي بيظهر في المناطق دي، والنوع ده من الشمع بيحتاج لحرارة عالية علشان يلين؛ فخدي بالك عند وضعه على البشرة علشان ما تتحرقش بعد الشر!!. أما الشمع اللين فيستخدم لإزالة شعر الساقين بالإضافة للشعر الموجود في مناطق أخرى من الجسم.


شوية نصايح

وكمان دول شوية نصايح لوقف نمو الشعر ولمنع ظهور الحبوب والاحمرار:


1- انقعي ترمس في مية لمدة

6 ساعات وخدي المية بتاعته واحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر...... واستمري على ذلك لمدة 3 أسابيع يوميا.

2- استخدمي نبات السعد -هتلاقيه عند العطار. خدي 3 معالق من مسحوق النبات وضيفيه إلى "لتر ماء" وحطيه على النار لغاية ما يغلي ثم يترك لينقع لمدة ربع ساعة.... ثم يوضع على الجسم كغسول بعد إزالة الشعر لمدة 6 أيام متواصلة من كل شهر.

3- خذي زيت زيتون وادهنيه على جسمك... هتلاحظي إن الشعر نموه بيتأخر ولما يطلع هيطلع خفيف ولو كان الشعر سميك هيطلع ضعيف جدا.

4- اخلطي "قليلا من الماء" مع بودرة التلك واعملي منها عجينة لينة توضع على المكان المنزوع منه الشعر وسيبيها حتى تجف واغسليها كويس ودي بتخفف من الاحمرار والحساسية الناتجة عن نزع الشعر.

5- لتتخلصي من مشكلة حساسية واحمرار بشرتك بعد إزالة الشعر الزائد من الوجة املي طبق غويط بالثلج وضيفي ليه 4 أكواب لبن وبعدين غطسي حتة قطن في الطبق ده وضعيها على المناطق اللي بتعاني من الاحمرار واتركيها لتجف.... ثم ضعي طبقة أخرى بعد 15دقيقة وكرري العملية مرتين لتعود بشرتك إلى حالتها الطبيعية السابقة.

__________________