السلام عليكم، أختي الصغيرة اسمحي لي سوف أتحدث لك بلهجة قريبة من العامية ولن أستخدم الفصحى فالهدف أن تصلك كلماتي فتخرج من قلب أخ كبير إلى أخت صغيرة يهمه امرها،
شلونج ريتاج شخبارج، أول شي أحب أن أناديج بأختي الصغيرة لأني أكبر وايد منج ومثل ما يقول المثل المعروف أكبر منك بيوم أفهم منك بسنة، خلاص يا رتاج اتفقنا على هذا المثل، ثاني شي، انتي الحين ما شاء الله في عمر الشباب وطبيعة هذي المرحلة الي تعيشينها وهذا السن الحساس لازم تمرين بأمور ما عمرج عرفتيها ولا شفتيها، أنا يا ريتاج الي عجبني في كلامج البراءة والصراحة وما فيه لا لف ولا دوران، علشان جذي حبيت أنبهج لأمور يمكن انتي الحين غافلة عنها، سمعيني ريتاج:
أول شي انتي من مجتمع كويتي لهعاداته وتقاليده وقبل هذا وذاك هو مجتمع مسلم يحكمه شرع الله، والانسان الي تكلمتي عنه هو بعد من مجتمع مسلم له عاداته وله تقاليده ولازم كل واحد فينا يحترم العادات والتقاليد ويتمسك بالدين كثر ما يقدر وما يعطي للشيطان مجال يضحك عليه، أنا يا رتاج مثلج كويتي، وأنا مثل أخوج الكبير، لازم تعرفين وايد من العائلات الكويتية عندنا في الكويت ما تفضل تعطي بناتها للي غير ولد البلد يعني لازم يكون كويتي مثلها وهذا الكلام ينطبق على كثير من العائلات في المجتمعات الخليجية الثانية، فهذي هي أول مشكلة راح تواجهج مع أهلج لو تقدم لج هذا الشاب احتمال كبير يرفضونه لأنه مو كويتي وانتي طبعا ما تقدرين تقولين أنا أعرفه وراح تسكتين بعد ما تعلقتي فيه وتطورت علاقتج فيه ونفس الشي ما أعتقد أهل هذا الشاب راح يرضون لولدهم أن ياخذ كويتية ويترك بنت بلده لن بنت بلده أولى فيه منج، وأنت مثل ما قلت عمرج 18 سنة يعني فرصتج في الزواج توها وفرصة كبيرة وما في خوف عليج، لأن عندنا في الكويت ممكن الأهل يوافقون يعطون بنتهم لواحد مو من أهل البلد سواء كان خليجي أو من دولة عربية ثانية في حالة اذا كانت بنتهم عانس وكبيرة والحمد لله هذا الشي مو موجود فيج، فلهذا يعني العقبة هذي موجودة عندج وعنده في نفس الوقت فاختصري الطريج عليج وعلى هذا الشاب ودزي له مسج تعتذرين له انج ما تقدرين انج تستمرين معاه وعلشان تضمنين انه يفقد الأمل في التقدم لج قولي له ولد عمي خطبني وأهلي وافقو عليه علشان هو يفقد المل ويبتعد عنج، وانتي راح ترتاحين من مشكلة يمكن تكبر معاج وتتصعب ووحدة من خواتج أو امج تكتشف الموضوع بالصدفة فتفقدين ثقة أهلج فيج، وصدقيني يا ريتاج يمكن الله سبحانه وتعالى يرزقج بولد الحلال والزوج الصالح الي يغمر قلبج بالحب الطاهر العفيف وراح تحمدين ربج انج ما استمريتي في هذا الطريج المظلم المخيف، وأنصحج يا أختي الصغيرة الكمبيوتر استعمليه بس في مجال الدراسة في عمل بحوث أو قراءة مواضيع تنفعج في حياتج لكن ابتعدي عن أي شي ثاني وبالذات المحادثات مع الشباب لأنها راح توصلج لطريج انتي في غنى عنه، وتمسكي يا أختي ريتاج بدينج وأهم شي انج تحرصين على رضى رب العالمين لأنج اذا الله سبحانه رضى عنج توفقتي في حياتج وواضبي على دينج وصلاتج واقرأي القررآن والله يوفقج ويخليج حق أهلج، وتحياتي لج أخوج الكبير رومانسي2004، ملاحظة أي شي تبين يا رتاج تسألين عنه لا تترددين احنا هني كلنا أخوانج وخواتج، زين يا ريتاج، مع السلامة.