منتدى عالم الأسرة والمجتمع - عرض مشاركة واحدة

24-09-2005, 07:23 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

بعد ما تعرفت على نوع ومدى اهتمامك ببشرتك، تعالي نتعرّف على وصف بشرتك وإيه اللي ممكن تعمليه علشان تفضل بشرتك نضره وجميلة!

البشرة وأنواعها

• البشرة الدهنية :

عارفة إنها معاناة إن بشرتك تكون دهنيّة؛ بتحسّي إن على وشّك برطمان سمن بلدي، ويا سلام في الصيف والشمس طالعه ومركَّزه عليكي كأنها طالعالك مخصوص! واللا حَبّ الشباب والرؤوس السوداء واللا... واللا...! حاقولّك إيه ولاّ إيه؟! فعلاً معاناة... كفايه اكتئاب بقى لأن فيه حلّ لده، كلّه فْ خطوات بسيطة:

• اغسلي وشك على الأقل 3 مرات يومياً بماء دافىء وصابون.

• حمام بخار مهم جداّ والمداومة عليه شيء أهمّ لأنه حيساعدك تتخلصي من الرؤوس السوداء.

• عصير اللّيمون له تأثير رائع لقبض مسام الجلد ومنع تراكم الدهون الزائدة، وده معناه إنك تحطى القليل من عصير الليمون علي وشّك مرة كل يومين.

• البشرة الجافة:

برضُه مُعاناة !!! تلاقي وشّك خشن وبيحرقك، وساعات يقشّف وحاجة تخنق. والمشكلة الأكبر كمان إن البشرة دي مرعبة! بمعنى إنك لو استخدمت مكياج مش مناسب جلدك ح يلتهب وممكن ندخل في علاج ومستشفيات وقلق! إيه الأخبار ؟ أخدتي جرعة الكآبة؟ برضه ماتقلقيش؛ فيه حل:

• اغسلي وشّك بماء بارد ، وبلاش الماء الدافىء.

• استخدمي صابون فيه زيوت طبيعية زيّ زيت الزيتون، والمنظفات والكريمات والسوائل اللي بيدخل اللبن في تركيبها.

• اشربي أكبر قدر ممكن من الماء طول اليوم

البشرة العادية:

يا سعدها يا هناها اللي بشرتها عاديّة! اللهم لا حسد ولا قَرّ ! (دا بَسّ حِقْد) !!! صاحبة البشرة العادية مش بتحتاج تعمل حاجات كتير لبشرتها، بس لازم تأخد بالها إن بشرتها دايماً مهدَّدة بالتحول لبشرة جافة في حالة تكرار غسل البشرة بالماء والصابون.

• كفاية تغسلي بشرتك بالماء والصابون مرتين يومياً، الصبح وبالليل

البشرة المركَّبة:

النوع ده من البشرة مش معاناة بس، ده مأساة! لأنك بتلاقي أجزاء من بشرتك جافة و أجزاء تانية دهنيّة ، وبالتالي بيبقى اهتمامك بدل الاهتمام اتنين، يعني صراحة ربّنا يعينك... على فكرة ، برضه عندي حلّ:

• لما تيجي تغسلي بشرتك ركّزي على المناطق الدهنيّة أكثر من المناطق الجافة.

• ممكن تحطّي القليل من عصير الليمون على المناطق الدهنيّة.

• وعلي العكس ممكن تستخدمي المرطّبات علي المناطق الجافة.

__________________