ألــف وصـفة و وصــفـة
( الليــلة الثــانيــة)
يمنـــــــــــع وضع صور لذوات الأرواح
ولما كانت الليلة الثانية قالت عبير .....
ـ عبير :" يا ترى عندك وصفات تانية ممكن تخلي الشعر يطول "
ـ فينوس:
" أنا حاقولك على وصفتين سحريتين تطول شعرك بشكل ملحوظ ..
الوصفة الأولى:
اطحني 3 ملاعق كبيرة من الترمس وانقعيهم في كوبايتين مية سخنة من الصبح لغاية الليل ( طبعا الكمية دي قابلة للزيادة حسب طول الشعر ) .. بعد كده صفيه وادهني به شعرك وسيبيه عليه من الليل لغاية الصبح بدون شطف وده لمدة 10 أيام ..وعلى فكرة الوصفة دي بتساعد على فرد الشعر المجعد كمان ولو كنت عايزة تتجنبي أن الترمس يلصق في شعرك لفيه في شاشة ثم انقعيه...
الوصفة الثانية:
جيبي راس ثوم وقشريها مع مجموعة من الزيوت ( زيت أملا ـ زيت جوز الهند ـ زيت لوز ـ زيت خروع ـ زيت جرجير أو نوع زيت تحبيه ) حطي معلقة كبيرة من كل نوع من أنواع الزيوت دي وحطيهم على النار واخلطيهم ببعض مع إضافة الثوم عليهم بعد ما تفرميه بحيث يكون ناعم جدا وبمجرد ما يسخن اطفي النار وحطي الخليط على شعرك ولفيه بالبونيه الخاص بالشعر .. أو بكيس وسيبيه مدة 8 ساعات ثم اغسليه .. كرري العملية دي مرة كل أسبوع لمدة 6 أسابيع وياريت لو تواظبي على نفس اليوم اللي تبدئي فيه تنفيذ الوصفة دي .."
ـ عبير: " يا ترى عندك وصفة لشعر صحي قوي لامع ؟"
ـ فينوس " في أكتر من وصفة بالطبع ..
الوصفة الأولى:
دوبي 3 ملاعق عسل في كوباية مية سخنة وسيبيها لحد ما تبقه دافية وبعد ما تستحمي حطيها على شعرك .. وسيبيه على شعرك من غير غسيل .. كرري الطريقة دي بعد كل حمام باستمرار .. ودي كمان طريقة .. اخلطي صفار البيضة مع معلقتين زيت زيتون ومعلقة خل تفاح ( ممكن تزودي الكمية ) وحطيهم على شعرك مدة نص ساعة أو اكتر حسب ما تحبي وبعد كده اغسليه .."
ـ عبير " يا ترى في إيه كمان ممكن تقوله ليه سيدتي الجميلة؟ "
ـ فينوس " فيه وصفات تزيد من جمال وجاذبية شعرك وتجعله أكثر لمعانا ..اخلطي كمية من المايونيز ( حسب طول الشعر ) مع كمية من البلسم بحيث يكون كمية المايونيز قد كمية البلسم مرتين .. ثم بللي شعرك بالمية وحطي الخليط على شعرك ..وغطيه ببونيه الشعر اللي بيحميه من المية مدة ساعة تقريبا بعد كده اغسلي شعرك بالميه بس ..المهم أنك تقومي بتنفيذ الوصفة قبل الاستحمام ..
الوصفة الثانية:
وخدي كمان الوصفة دي ..اغسلي 20 نواة من نوي البلح بعدها جفيفهم كويس ثم احرقيهم على النار لغية ما يبقوا زي الفحم وسيبيهم يبردوا شوية ..اطحنيهم بعد كده ثم أنخليهم ..و حطيهم في إزازة صغيرة .. وحطي عليهم شوية من زيت الزيتون وشوية من زيت الخروع وزيت الجرجير وزيت جوز الهند وسيبيهم حوالي 10 أيام ..وفي اليوم الحادي عشر حطيهم على شعرك بحيث يصلوا للجذور وسيبيهم لغاية الصباح ثم اغسليه .. كرري الموضوع ده مرة كل أسبوع وحتلاحظي الفرق"..
ـ عبير: " طب إيه رأيك......."
ـ فينوس: " آآآ عبير ...لقد أدركنا الصباح ..وبدأ الديك في الصياح ...ولنا لقاء في الغد إن شاء الفتاح "
وسكتت فينوس عن الوصف المباح ..
و إلـــى اللـــقـــاء فــــي اللـــيلــة الـقـادمـــة
التعديل الأخير تم بواسطة همسـ ; 28-10-2005 الساعة 09:01 PM