انا شاب عمري 20 سنه ، في يوم من الأيام قالت لي أمي : ابغاك بموضوع ، بصراحة خفت من طريقتها قلت أكيد اني مسوي شي ، قالت : بنت خالتك تقدموا لها ناس وأهلها ماعطوهم كلمة وانا اقولك الحين تبي بنت خالتك ولا لا . تفاجئت وقالت أمي : أنا ابيها لك وخالتك تبيك لها وش رايك . قلت : خلاص
كلم الوالد أبوها وحجزنا البنت . من يومها وأنا كل يوم أفكر فيها ، وكنت أقول في نفسي لازم أفكر فيها عشان مع طول التفكير فيها يزداد حبي لها .
المشكلة اني احس بفراغ عاطفي الآن وما أبي اسوي علاقات مع بنات لأني أدري ان نهايتها الحرام وانا كل يوم اتضايق بزيادة اشوف بنات وأقول : لا الحين لو سويت علاقة مع بنت وش نهايتها أكيد الحرام
بصراحة تعبت وانا اشوف اصحابي متعرفين على بنات وانا ماأبي اصير مثلهم بس أبي املا حياتي بحب بنت ادري اني في النهاية بتزوجها يعني ابي علاقة عاطفيه نهايتها طيبة وطرت علي فكرة اني اكلم بنت خالتي (زوجة المستقبل ) إن شاء الله لكن وشلون انا ماأبيها تكون علاقة بالسر لأني ماأرضاها لبنت خالتي ولا لنفسي وفي نفس الوقت ماأقدر اقول لأمي هذا الشي لأني منحرج مرررره من هذا الموضوع وانا بصراحة ماأدري هل أنا على خطأ بتفكيري هذ ولا لا
وبإختصار ابي اعيش حب حقيقي نهايته سعيدة لأني بصراحة أخاف اني اصير مثل اصحابي
اتمنى من كل من يقرأ موضوعي ان يعلق عليه .
أخوكم / رايح وطي