حتى لا تحكموا على ظلما ..
السلام عليكم .. من موضوعي السابق ,,( انا مطلقة و اريد اختبار الذي تقدم لي ) لاحظت من الردود ان بعض الأشخاص حكموا على ان انا عصمت نفسي 4 سنوات و الحين ابحث عن الزوج في موقع الزاوج ..
راح أقول لكم حكايتي .. و انتوا احكموا ليش أنا ابي اختبر الشخص أو ابي اعرفه أو يكون من اختياري و أكون اعرفه من قبل ..
انا تزوجت بالطريقة التقليدية .. تقدم لي و سألنا عنه ,, و قالوا ( اصلا يا بخت فلانه لو هالشخص كان يرضى فيها ) تخيلوا من كثر ما امدحوه و امدحوا اهله .. ,, و بعدين بعد 3 أسابيع صرته خطيبته على سنة الله و رسوله ( عقد ) ,, من يوم الملجة ,, و انا لاحظت ان امي مو متقبلته ,, و هو ينظر لها بطريقة غريبة ,,امي كانت راضيه عن زواجي و ما كان عندها اعتراض عليه قبل ,و بس يوم الملجة ,, ما قدم مهر مثل اللي متعارف عليه عندنا ’’ أقل بكثير يعني لو بافصل فستان العرس ماراح يكفي ,, فاشلون اجهز نفسي ,, !!
المهم بعد اسبوع ,, اول مشكله .. وين الشبكة يابن الحلال .. قال أبوج قال ان هو راح يشتري الشبكه ,, سألت أبوي و اقسم لي بالمصحف انه ما طلعت هالكلمة من لسانه .. و قلت خل اطنش ما تكبر السالفة ,, و لا فتحت هالموضوع معاه ,, قام هو و فاتح ابوي بموضوع الشبكة ,, فأبوي لما كبرت السالفة و شاف نفسيتي تعبت ... قام و شرالي طقم الماس سعرة 3500 دينار كويتي ,, علشان بس بنته لا تحس انها أقل من باقي البنات !!
و كان من المفترض انه العرس يكون بعد 5 شهور ,, بعدين كثرت المشاكل بينه و بين امي ,, و يعلم الله ان كنت ادري انه هو غلطان بكل مشكله تصير ,, بس كنت اوقف معاه و بعدين اعاتبه ان هو غلط و اقوله ان انا وقفت معاك لأن ما ابي تهتز صورتك جدام اهلي ,, و امي تمون و انا اعرف اراضيها ,و و هي عارفة هالشي لأن انا كنت اقولها ان ادري هو غلطان بس هو زوجي شلون اقوله جدامكم و جدام اخواني انت غلط .. مابي اجرح رجولته جدامهم ..
و كان ابوي يقول هذا عين الصح يا بنتي ,,
المهم بعدين كثرت المشاكل على السكن و العرس و التجهيز ,, قام و قاللي انا تعبت و انا ابي اليوم نطلع نتعشى و نتفاهم على كل شي أنا و ياج و ماراح نقوم لا خالصيين ان شاء الله .. و انا تجهزت و لبست و نطرته ,و ما أشوف الا ان راح بيت أهله .. و كانت ليلة اغتصاب اقل ما اسميها .. والله ان لما اتذكرها ابكي من الألم اللي شفته و اللي صار فيني ليلتها .. و بعدها رجعني بيت أهلي و لا كأنه شي صاير ,, و ظليت أبكي طول الليل بغرفتي ,و من بعدها قام كل يوم يسوي نفس الشي ليما اكتشفت ان انا حامل ,, و اهلي طبعا ما دروا عن هالشي الا لما قلت لهم ان انا حامل ,, و قلبوا الدنيا ,, و قالوا له عجل بالعرس .. و جهزت نفسي من فلوس ابوي طبعا باسبوع واحد خلصت كل شي ’’ قاللي ان اليوم راح اروح اشتري لج شبكه تعالي اختاريها معاي ,, و اهلي استبشرا خير ان بدأ يتغير و يتحسن ,و رحت أنا الغبية معاه .. الا هو بسلامته ما أشوف الا رايح شقتنا !! و قال خلاص ,, انتي زوجتي و شايلة ولدي في بطنج ,, ماكو عرس و لا خرابيط ,, و ظليت محبوسة بالشقة اسبوعين ,, مثل المسجونه لا اهلي يدرون عني و اهله الله ياخذهم ولا كلفوا على عمرهم يقولون حق اهلي ان بنتكم عند زوجها ,, كان أبوي و امي يتصلون عليهم وين فلانه يقولون لهم والله ما ندري لا عن بنتكم و لا عن ولدنا .. اذا عرفتوا قولولنا طمنوننا ,, و هم يدرون!!! .. و بعد اسبوعين قدرت اتصل على اهلي ,, اهلي حسبالهم ان انا متفقه معاه و ظلوا شهريين بعدها ما يكلموني ليما ابوي مرض و دخل المستشفى واتصلت عليه طبعا ما قدرت ازوره .. و رجعت المياه الى مجاريها بس بالتلفونات كنت اتطمن عليهم و كانوا يقولون لي ليش صابره على هالعيشة تطلقي و تعالي .. و بعدين بدأ الكورس الجديد بالجامعة يوم أداوم و عشرة لأ بسبب المشاكل و الحمل ,, و بعدها اختي مرضت رفض انه ازورها بالمستشفى ,, هني تمردت و طلعت من الدريشه كأني حرامي ومشيت ليما الجمعيه و طلبت تاكسي و رحت حق اختي بالمستشفى وزرت ابوي ,, لما شافني و حبيت راسه سلم الروح لباريها ,, حسيت هني ان كان ناطر بس يشوفني و يموت الله يرحمه .. و هني حسيت انه انا السبب في وفاة أبوي ,, و بعدها رحت اتصلت عليه و قلت له ان ابوي مات بسببي ,, كله منك .. قام و يه بيت أهلى و طقني طق اللي ايدي انشلت بسبب الطق اللي حصلته منه .. و بعد العزا رحت المحامي و طلبت الطلاق ,, و انتهى كل شي على جذي ,, بس خسرت ابوي و حملت لقب مطلقة ,, و اللي اكثر من جذي ان يمشون اهله عند الناس و يقولون بنتهم دلوعه مو مال زواج و مسؤوليه ,, بنتهم ما كانت مريحه ولدنا ,, هذا القهر ,,
بعد 4 سنوات من الجرح ,, اداوي فيه و احاول ان اضحك من قلبي ,, لقيت هالشخص و احتواني و احتوى جروحي و وعدني ان شهر 11 راح أشوف كل خير ,, و انا من أول مرة قلت له قصتي وشنو شروطي و شنو وضعي و كل شي ,, و كان راضي و موافق و قال انتي مدام مالج ذنب و انظلمتي الله يقدرني و تشوفين كل خير و ياي ,, انا متخوفة مو منه لأن اختبرته اكثر من مرة ,, انا ابي بس اعرف هل راح يكون الشخص اللي يعوضني و اعيش معاه سعيده و انسى صفحة المضي و ألامها ,, اخاف يكون بس كلام و وعود و بعدين يكشر عن انيابه و احمل لقب مطلقة تربيع !!!