اهلين حبيبتي..
ممكن تسمعيني شوي؟
اولا انا فاهمة شعورك ومقدرته ... وحاسة فيك وصدقيني أنا ما استغربت شعورك لكن معليش مو موافقة على اسلوبك..
معليش حبيبيت مهما كان فيه احساس بالكره والحقد والظلم ووو الخ فلازم تظل فيه عبارات محدودة لوصف المشكلة..
لأنه مو من الأدب أن البنت تتكلم على أمها بمثل هذا الكلام -واعرف انك راح تقولين امي غير- معليش حتى ولو! مهما كانت الأم ظالمة وقاسية فيظل فيه حد فاصل ما نعاه لأن هذا الحد مو حق الأم!! لا هذا حق ربي!
يعني مو لأن الأم تستاهل والا لا؟ ولكن لأن هذا أمر ربي فلازم نحترمها وش ما سوت!
ثانيا: تسمحين عزيزتي أقولك انك سبب معاملة أمك لك؟ بصراحة ولا تزعلين الحل سهل وقدامك بس عارفة بتقولين مستحيل!!!! وهو انك تصححين علاقتك بأمك! معليش راح نأجل موضوع الشاب الحين لأن تعاستك الحالية واصلة حدها بسبب معاملة أمك! وهذي المعالمة سببها تعاملك انت معاها! معليش اختي بعض الأمهات تحب تشعر انها أم ولا احترامها وتقديرها وكلمتها تمشي يعني هي بذاتها مي عاطفية صارمة وتحب تامر وتنهى وو فلازم نتعامل معاها بالأسلوب اللي تبيه مو اللي نبيه يعني لا اطالبها تصير مثل الأمهات الثانيات وكلام دلع وانت بنت الغالية وانت وانت .. الخ.. لا اتعامل مع امي بحسب طبيعتها.. اعرف هالكلام صعب!
بس راح اقولك ومين قالك ربي ما يدري انه صعب؟ ربي عنده علم مسبق بان فيه أمهات صعب التعامل معهم وعنده علم مسبق بان الام تحتاج لجهد نفسي خاص مو الأم بس كل الوالدين ولذلك قال... رغم انف أمرئ أدرك احد والديه او كلاهما ولم يدخلاه الجنة او بمثل هذا المعنى .. فكري زين بهالكلام! يعني ربي عارف ان الام والاب في مرحلة كبرتهم يصيرون اكثر عصبية وحساسين وووو الخ ولذلك ربط الجنة والمغفرة باللي يتحمل معاناة الصبر عليهم.. وانت كيد مرت عليك قصص الصحابة وكيف قسى عليهم اهلم بعد الاسلام! وحتى بعدين فيه آلاف القصص لناس كانوا يبون طلب علم وناس تبي تخصص معين وناس تبي نساء معينات واهلهم وقفوا بطريقهم تعنتا وقسوة ورغم ذلك صبروا ! هل تتوقعين انه راضين باللي صار وعادي عندهم اكيد انقهروا بس رضا ربي فوق! صدقيني فيه ناس لقوا ضرب وشتم وسخرية واستذلال ورغم ذلك كانوا قمة في البر!! شوفي حجم المعاناة بس ما شاء الله تحملوا خوفا من ربي...
صدقيني فيه كثير يعانون مثلك... وصدقيني في ناس أشد! بس انت ما تعرفين وش يصير بكل البيوت..
بس اللي أحب أقوله أنت لا تشدين مع أمك! انا أفهم شعورك انك مقهورة منها! بس معليش من صالحك انت انك تخففين التوتر اللي بينكم... انت في البداية هدي الوضع... لا تحاولي تثيري مشاكل... طلبت امر نفذيه لا تحاولين تعلقين على اي شي تقوله خليك هادية مرة مرة... مع الوقت اهي راح تهدا شوي... بعدين اذا شفت الوضع هدا حاولي تعاملينها كويس... يعني تلطفي بالكلام.. واذا تقدري-المشكلة اني عارفة انك ما راح توافقين بس والله مؤثرة والله وراح تشوفين! بس بأكمل حتىلو ما سمعت كلامي- اذا تقدري تعتذري! وتقدمي هدية!! راح يكون أفضل وأفضل..
و راح تشوفيني كيف تغيرت معاك! وصدقيني حتى يمكن راح تعتذر هي من رفضها للشخص اللي رغبتيه ويمكن حتى توقف معاك!! لانها حست انك معاها مو ضدها!
بصراحة انا ما أقولك اني موافقة على موضوع الشخص بس انا الآ مهتمة بعلاقتك بامك وموضوع الشاب ارد عليك فيه مرة ثانية...
بس صدقيني تصرفات أمك ردة فعل! ولو تغيرتِ معاها راح تتغير معاك..
وانت راح ترتاحين كثير مرة حتى لو ظليتي مقهورة على حبيبك اللي راح صدقيني راح ترتاحين من مشاكلك مع امك وراح تلقين منها تعزيز وتخفيف وراح تتغير حياتك جدا جدا وتشوفين!
تنبيه مهم لازم توقفين عنده :
مسألة حبيبك لازم تنسينها بما أنه تزوج! فصدقيني الزواج راح يغير مشاعره تجاهك... وصدقيني مهما كان متعلق فيك علاقته بزوجته ستحرك العاطفة فيه نحوها!! صدقيني يما فيه ناس يموتون في زوجاتهم!! زوجة وعشرة عمر وايام حلوة واضطر يتزوج ثانية!يعني مو باختياره ورغم ذلك حب الثانية وتعلق فيها!!! فكيف بأنسانة كل اللي بينه وبينها كلام تلفون؟!!
خذيها مني نصيحة ... مو لازم تتزوجين الحين ولا ضروري تاخذين اي واحد معليش اجلي الموضوع شوي بل انصحك بالتأجيل لأن ظروفك النفسية الآن ما تسمح.. بس ضروري والله لمصلحتك تقتنعين ان زواج الشاب هذا نهاية وجودك في حياته!! وأعرف أعرف أسماء وأشخاص بمثل علاقتك وأشد! وفيه حالة اعرفها واعرف تفاصيلها البنت لما شافت حبيبها تزوج انقهرت مرة مرة وحاولت تتصل فيه بطريقة ما! ما تصدقين كيف كانت ردة فعله!! مرة مرة سيئة! وهي قعدت سنيين!!!! مصدومة تقول مو معقول نساني بعد زواجه بهالسرعة ويرد علي هذا الرد!!! ليتني ما اتصلت فيه على الاقل اظل متعلقة بوهم ليتني ما عرفته اصلا كان انا الحين بكرامتي ليت وليت وليت!!
وانا اتوقع انك ماانت حتى الآن مقدرة كيف راح تتغير حياته... لذلك اقولك خذيها مني نصيحة انسيه تماما!!
الله يعينك ويفرج لك