السلام عليكم .... الأخوان ماقصروا وفوا وكفوا .....
لكن هذا لايمنع من الادلاء مابدلوي .....
عموما سأذكر لك برنامجي السنوي الى ماليزيا وارجوا انه يفيدك .... طبعا عند الوصول الى المطار بيستقبلونك كذا واحد من شركات التوصيل _ تكاسي _ لكن سعرهم غالي ..... نصيحه لاتاخذ منهم وبتلقى برا تكاسي على 60 او 70 بالكثير ..... في البدايه وبما انك في شهر عسل ا، جميل انك تسكن في فندق سان واي لاقون .... فندق جميل بصراحه وخلهم يعطونك غرفه تطل على المدينه المائيه ..... ويكفيكم ليلتين او ثلاث ليالي ، وبالنسبه للمجمع اللي تابع للهوتيل انا من وجهة نظري انه يعتبر ارخص او نفس اسعار التسوق في العاصمه كوالالمبور ويتفوق على اسواق العاصمه من ناحية الجوده مقارنة برخص الأسعار وهذي وجهة نظري .... وبعد كذا تطلع لكوالالمبور ، تقريبا نص ساعه او ثلث ساعه _ حسب زحمة الطريق _ واذا تبي فندق خمس نجوم ومحترم ونظيف وبنفس الوقت رخيص انصحك تسكن في استانا هوتيل ، على فكره لاتغلط بالهوتيل لأن فيه اسم مشابه ( وستانا ) بالواو ، استانا هوتيل هذا رقم الفندق ................................... الغرفه مع الفطور اخذتها الصيف الماضي بـ 250 ريال بس علما بانه خمس نجوم وموقع ممتاز وقريب جدا من مجمعات التسوق ومن البرجين ...........وبالنسبه للمطاعم فيه مطعم خيمة الصحراء / الطربوش / الشرق الاوسط كلها قريبه من الفندق ، مدة خمس الى عشر دقايق بالكثير مشيا على الاقدام ... من ناحيتي افضل خيمة الصحراء لأن عندهم اماكن مقفله بستاره تاخذ فيها راحتك اكثر مع عائلتك وعليهم سمك بصراحه خطير ولذيذ ، والقائمين على المطعم والطباخين عراقيين ، negara zoo هذا اسم حديقة الحيوانات وفيه وحده ثانيا طبعا لكن مقدر افيدك عنها لاني مارحتها لبعد مسافتها عن كوالالمبور . . نيقارا زوو يوديك لها التاكسي بـ 15 رنقت بس ،،،اطلب بروشورات من الفندق وبتلقى فيها كل اللي تحتاجه،، وبالنسبه للتنقلات الداخليه لايفوتك تجربة المونيريل ، واسعار المونيريل ارخص بكثر من التكاسي مع العلم انه متعه ......لاتنسى تروح السوق الصيني ، طبعا بضايع مقلده لماركات عالميه لكن مقلده بشكل متقن جدا وكاسرهم بالسعر لايلعبون عليك ، يعني طيح السعر الى اكثر من النص ، وعلى سبيل المثال المدام اعجبتها شنطه وبصراحه كانت روعه الشنطه لكن قال لنا سعرها بـ 100 وبالنهايه اخذتها بـ 15 رنقت
بالنسبه لما ذكر الأخوان الى بينينق ، من وجهة نظري انها مدينة ممله جدا واحسست بالكآبه فيها ولا اعلم لماذا وفنادقها على امتداد شارع على البحر ومافيها مجمعات تسوق حلوه ، عموما هي تبعد عن كوالالمبور 40 دقيقه تقريبا بالطياره ، اما لنكاوي مارحتها لكن كمناظر طبيعيه وهدوء ورومانسيه فعلا هي كذلك كما وصف لي احد الزملاء ،،، وبالنسبة للعمله ... انا افضل تصرف دولار واذا وصلت بالسلامه تصرف رنقت من هناك لكن لا تصرف من المطار تراهم نصابين ، افضل اصرف 200 رنقت من هنا حق المطار ومشوار التاكسي واذا كانت وجهتك الى سان وي لاقون ، عندهم صراف بالمجع التابع للهوتيل يصرف لك بسعر جدا حلو ،،، الشعب الماليزي شعب طيب وخلوق ومحترم جدا وخدوم ايضا ،، غالبية السكان هناك من الصينيين وهم اللي ماسكين التجاره او خل نقول اغلب المحلات لهم وبقية السكان من الهنود والماليزيين الاصليين .. بإذن الله راح تنبسط في ماليزيا ،،،، سافرت لكذا دوله سواءاً عربيه او اجنبيه لكن سبحان الله وبدون مبالغه لم اجد راحت البال والمتعه كما وجدته في ماليزيا في كوالالمبور وسان وي لاقون تحديداً لأن بينيق بصراحه من جنب العارضه ...
ادري اني طولت واكثرت واتمنى اني مانسيت شي ولو تذكرت راح افيدك ان شاء الله .
اخوكم أبو خالد
الله يعطيك ألف ألف عافية أخى أبو خالد كفيت ووفيت بارك الله فيك
وأرجو التقيد مشكورا بتعليمات الكتابة فى الموقع وخاصة هذا البند
4 ) يمنع منعا باتا ارفاق الروابط الخارجية حتى وان كانت لمواقع سياحية وكذلك أرقام الهواتف حتى وان كانت لسفارات أو ما شابه .. وكذلك الايميلات الشخصية .. وكل هذا واضح من شروط الكتابة بالمنتدى قبل التسجيل .
وللأطلاع على باقى الشروط على هذا الرابط
http://www.66n.com/forums/showthread.php?t=47473
شاكرا لك حسن تفهمك
التعديل الأخير تم بواسطة محمد الشرقاوى ; 22-11-2005 الساعة 05:32 PM