الأعضاء ما قصروا ..

خطوة أولى:

تنازلي هالمرة وأقرأي الخطوة الثانية ممكن تنفع مع زوجك. (وخصمي أكس من قسمك في الجدول اللي أقترح عليكي)

عاد كيف تتنازلين من غير ما تنزلين من قدرك ولكن بطريقة تكسر حاجز العناد اللي في زوجك:
حاولي مثلا الصباح قبل لا يصحى يروح العمل .. أكيد بيدخل حمام يتغسل، (لا تخافين مافي شموع في الصباح) ولكن شوفي واحد من أحمر الشفاه قديم مستغنية عنه وأكتبي له على مراية المغسل أي كلمة حلوة مثلا "صباحك ورد وحشني صوتك .. لسى زعلان" .. (عاد مو ذنبي لو المراية صغيرة أكتبي أسفة وبس). المهم، بهذي الطريقة راح تعطينه مجال أنه يبادرك بالكلام لأنه أنت كسرتي حاجز الكبرياء اللي عنده كرجل وزوج وفي نفس الوقت ضمنتي تشترين أحمر شفاه جديد لا تصالحتوا إن شاء الله.

خطوة ثانية:
بعد الصلح اتركي أمر الخروج معاه يوم الخميس من دون نقاش لمدة أسبوعين على الأقل يعني خليه يطلع خميسين من غير ما تقولين له أي شيء يعكر مزاجه ولا ترسلين له رسايل جوال ولا تتصلين عليه وهو عند أصحابه .. ولا رجع تعاملي معاه عادي من غير تكشير وخليه يحس أنه أشتقتي له.
بعد أسبوعين كرجل طبيعي إن شاء الله راح يشعر بالذنب تجاهك وجلوسك وحيدة بالبيت وطبيعي أنه هو يقولك أجهزي بنطلع. لو ما صار هذا الشيء أنتقلي لخطوة ثلاثة ..

خطوة ثالثة:
بعد أسبوعين من خروجه وتعاملك البشوش معاه إن شاء الله.
لو ما شعر فيكي .. خليه أسبوعين ثانية (أكيد بتقولين ياسلام مرة بالك طويل .. أكيد الشغله يبيلها طولة بال) .
خليكي على نفس المعاملة الطيبة والبشوشة وأبدائي وهو عند أصحابه أرسلي له رسالة أو رسالتين ..
(هذي الرسايل بغض النظر عن محتواها لها معنى عند الزوج .. تصحيه وتقوله فيه زوجة في البيت لحالها وأنت تاركها في يوم فراغك وجالس مع الشلة على بالك أنك لا زلت عزوبي فلا شعوريا تلقينه يرجع بدري وليس كالعادة). لا تسألينه ليش رجعت بدري؟ تعاملي معه عادي كما أتفقنا. (بس هاه مو أكيد أنه بيرجع بدري من أول أسبوع لكن صدقيني بيرجع إن شاء الله).
الغرض من تركه حوالي شهر كامل من دون مناقشة موضوع يوم الخميس وغيره أنه إنت زعلتي عليه وما كلمتيه فمن المؤكد حتى لو شعرت أنه مشتت في البيت إلا أنه عند أصحابه وفي خرجاته لهم لا يحمل همك حتى ينتابك شعور بأنك لا زعلتي بتنطقين في البيت على قولتك . وأيضا حسب فترة زعلكم أكيد أنه ضمن تماما الخروج الخميس من دون أن يفتعل مشكلة معاك للخروج إليهم. فحاولي أنك ما تجعلين يوم الخميس اللي معاك بالنسبة لزوجك كسجن (معاك حق تطلعين مع زوجك وكل شيء ولكن انا بأتكلم من منظور رجل). الحين أنزلي لخطوة أربعة والأخيرة إن شاء الله.


خطوة رابعة:
أكيد راح تطلعون مطعم عشاء ولا حتى كوفي شوب المهم لا تفاتحينه في موضوع يوم الخميس إلا بعد إتباع الخطوات الثلاث أولا ..
لا طلعتوا وفي منتصف جلستكم (انتبهي تفتحين الموضوع لا جى وقت الحساب ما راح يوكن فايق )
المهم عاد أختاري الوقت المناسب وانتم برى البيت لمناقشة الموضوع بطريقة هادئة ومن غير نرفزة وأقترحي عليه التالي بطريقتك في الطرح:
ما المانع أن يكون يوم الخميس مناصفة بينكم يعني تطلعون من مثلا 8 المساء إلى 10 المساء أو 10:30 المساء وبعدها يروح زوجك عند أخوياه لأنه أكيد تجمعات أصحابه بعد 10.
لو أنه قبل بالعرض والمفروض عمليا أنه يقبل لأنه بذلك سوف يتمكن من رؤوية أصحابه كل خميس من دون أن يفتعل مشاكل .. وبس عاد أفكاري خلصت ..


أدعي لي بس وادعي لذريتي بالهداية والصلاح .
سلام عليكم ورحمة الله وبركاته