منتدى عالم الأسرة والمجتمع - عرض مشاركة واحدة - ملف كامل عن البشرة(6)
الموضوع: ملف كامل عن البشرة(6)
عرض مشاركة واحدة
قديم 25-12-2005, 10:44 PM
  #2
princees
من كبار شخصيات المنتدى
تاريخ التسجيل: Mar 2005
المشاركات: 2,815
princees غير متصل  
الهالات السوداء

يعني إيه الهالات السوداء؟

قبل ما نعرف ازاي نعالجها لازم نعرف إيه هي الهالات السوداء، الهالات السوداء دي عبارة عن مناطق سوداء تحت العين بحيث يختلف لون الجلد حول العين عن الجلد في باقي الوجه.

ولازم كمان تعرفي إن فيه نوعين من الهالات السوداء.. فيه نوع بيصاحبه هرش وده بيبقى علامة من علامات التهاب مزمن أو حساسية بجلد الجفون والحساسية دي ممكن تكون بسبب استعمال أنواع معينة من أدوات التجميل السيئة أو استعمال أدوات تجميل خاصة بأحد المصابين بالحساسية أو التهاب مزمن في الجلد، وفي الحالات دي يستحسن الأول معرفة المسبب الرئيسي للحساسية ودي حاجة ممكن تلاحظيها بنفسك عند استعمالك نوع معين من الصابون أو البرفانات أو مستحضرات وأدوات التجميل بنفسك، إنت اللي هتعرفي إيه بيضر بشرتك وبيسبب لها الحساسية، وإيه مابيعملش كده، وفي حالة إنك ماقدرتيش تعرفي بنفسك لازم تستشيري دكتور متخصص في أمراض جلدية.

وفيه نوع تاني من الهالات السوداء ممكن التعامل معاه وعلاجه كمان وهو ده اللي هنتكلم عليه المرة دي..

أسبابها

1. الوراثة: الحقيقة العامل الوراثي بيلعب دور مهم جدا في الهالات السوداء؛ يعني فيه ناس مولودين بيها تقريبا أو على الأقل بيعانوا من الهالات السوداء منذ سنوات الطفولة الأولى وبتستمر طول حياتهم. وسبب المشكلة دي هو زيادة الميلانين في هذه المنطقة.

2. أسباب صحية: التصبغ في الجفن السفلي "الاسم العلمي للهالات السوداء" بيبقى ناتج عن رقة الجلد في المنطقة دي، وده بيؤدي إن المادة الصابغة للجلد بتبقى باينة قوي فبيبقى فيه اختلاف بين الجلد اللي تحت العين والجلد التاني.

3. أسباب متنوعة: ودول الحقيقة كذا سبب؛ أسباب بيئية، على سوء تغذية، على ضعف عام، وكده يعني وبنلخصها ليكم في كام نقطة:

1. تأثير الشمس الضار.
2. نقص الحديد والفيتامينات.
3. نقص الدهون في الجسم.
4. السهر وعدم النوم بعمق.
5. التدخين.
6. الهرش المستمر في الجفون واللي بيؤدي لاسوداد هذه المنطقة.

علاج الهالات السوداء

الحقيقة علاج الهالات السوداء بينقسم لشقين؛ شق بالامتناع عن الحاجات اللي بتسببها، وشق تجميلي اللي هو الماسكات الطبيعية.. وفيه كمان شوية وسايل مساعدة..


وسايل مساعدة

1.الرياضة في الهواء الطلق ودي بتزود مستوى الأكسجين في الدم اللي بيعطيه اللون الأحمر الزاهي وبيكسب الجلد لوناً وردياً.


2. النوم الكافي العميق والابتعاد عن السهر أو على الأقل مايكونش السهر كل يوم.

3. الامتناع عن التدخين؛ لأن النيكوتين بيؤدي لقبض الأوعية الدموية، وده بيؤدي لتلون الجلد باللون الداكن، وكمان بتؤدي المركبات الكربونية اللي في السجاير لتقليل كمية الأكسجين في الدم، فيصبح لون الجلد مضطرب.

4. عدم التعرض لأشعة الشمس مدة طويلة، فإن كان لا بد من ذلك، فيجب الامتناع عن التعرض المباشر للشمس من 11- 3 ظهرا، وإن كان لازم يبقى تحطي كريم حامي من أشعة الشمس الضارة (استشيري الصيدلي).

5. اعملي تمارين استرخاء لعضلات الوش بصورة مستديمة، استلقي لورا وحاولي تدلكي الوش في حركات دائرية وخاصة العينين.

6. احتفظي بجهازك الهضمي نضيف دايما، وتجنبي الإمساك والتخمرات؛ وده عن طريق تناول الفواكه والخضار الطازة.

7. خففي من تناول المنبهات مثل القهوة أو الشاي أو الكولا لأنهم بيحتووا على كافيين.

8. اشربي كميات كبيرة من المية والسوايل على هيئة عصاير فواكه طبيعية وتجنبي المواد الصناعية زي المشروبات الغازية والعصاير المحفوظة.

9. التقليل من المقليات والأكل المعلب والمجمد والتيك أواي عامة



ماسكات لعلاج الهالات السوداء

ماسك البقدونس



المقادير:

حزمة بقدونس.
نص معلقة زيت اللوز.

الطريقة:

اخلطي حزمة بقدونس صغيرة (الورق بس) مع معلقة زيت اللوز في الخلاط وحطيهم على الهالات السوداء لمدة نص ساعة وهتشوفي الفرق.

ماسك النعناع



المقادير:

ورق نعناع مخروط أو مدقوق.
معلقة ماء الورد.

الطريقة:

اخلطي ورق النعناع المدقوق مع ماء الورد وحطيه حول العينين مدة 5 إلى 10 دقائق.


زيت اللوز



دلكي المنطقة اللي حوالين العين يوميا بزيت اللوز قبل النوم.



شرائح الخيار

استخدمي شرائح الخيار ككمادات حول العينين مدة 20 دقيقة. وبعد الخيار حطي كمادات قطن مبلولة بمية الورد لمدة 10 دقايق وحاولي تعملي الحكاية دي كل يومين.

وبكده يبقى خلصت عددنا المرة دي عن التفتيح والتقشير يارب يعجبكم واستنونى مع الحلقة الأخيرة من ملف البشرة عن ماكياجك من الطبيعة
__________________
التعديل الأخير تم بواسطة princees ; 25-12-2005 الساعة 10:50 PM