اختي الكريمه ام اثير4
قلتي
لابد من مصارحه زوجك و تذكيره بالمثل القائل ان كبر ابنك خاويه


لا اختي عند زوجي ان كبر ابنك اصغر انت !!
زوجي ماينفع يخاوي عياله ابدا واذا بعتمد عليه بيضيع ولدي
هالفتره زوجي عايش حياته ويبيني اعيش معاه هالجو جو اللا مسؤوليه
جربت اعيشها معاه حتى اسعده ولقيت نفسي بضيع وبضيع عيالي لاني قمت احيانا ماشوفهم حياتي مع زوجي عباره عن سهر للصبح وطلعات برى البيت من كوفي لمطعم ويقعد يدخن باستمرار وفي الليل يبيها سهره معاه ويبي لبس ووناسه وانا اقول بسعده وبتحمل بس كل يوم ماصارت !!! شفيه انا لمن تزوجته ماكان كذا !!!!
اروح الدوام وانا نعسانه وتعبانه من السهر وصلاة الفجر معدومه ماصليها الا قبل اروح الدوام والسبه السهر
وغير عيالي ماعدت اشوفهم يا محبوسه معاه بالغرفه او برى البيت معاه واجي اخر الليل الاقي عيالي الصغار كل واحد نايم بحضن خدامه والباقي نايمين في الصاله على التلفزيون ولمن اشيك على كتب عيالي اللي يدرسون الاقي عليهم اختبارات مادرسوها وواجبات ماحلوها حياه فوضويه وضياع
ومادري عن عيالي وش كلوا ووش سووا ودرسوا والا لا !!!!
ويظل ضميري يانبني عليهم وزوجي يناديني يالله نكمل السهره طيب وبعدين وش اخرتها انا فرحت باول اسبوع دلع وطلعات وثاني اسبوع قلت يالله اكيد بيمل ولقيته على هالحال شهر ويبي يواصل حياة المراهقه والاستهتار واللا مسؤوليه نبهته وقلت له وعيالنا انت شفيك هذول من لهم !!! ولا كاني اكلمه وكانه توه عريس لاعيال ولا هم !!
غير ان عيالي اشتكوا من اهمالي لهم وقاموا يزعجونا يدقون باب غرفتنا بطريقه مزعجه وينخشون وعلى هالحال يبغون يزعجون ابوهم ويخلوني اطلع من عنده و كل شوي يطلبون مني شي ويكلمونا باي شي تافه المهم يخربون علينا
ولمن يسمعون اغاني لان زوجي ماتعجبه السهره الا باغاني يقولون لنا من ورى الباب حرام اغاني ويوجهون الكلام لي يمه الاغاني حراام ماتخافين من النار وقتها اسكر الاغاني واقول لزوجي احنا قدوتهم ونسوي الغلط
وهو عادي عنده واخر مره قالوا لي يمه ياريتك تتهاوشين مع ابوي ولا تتركينا على الاقل بتقعدين معانا مو تظلين محبوسه معاه بالغرفه ومن يشوفون ابوهم يقولون له يبه طلع امي احنا نبيها لا تحبسها
فكرهت هالحاله وقلت له خلاص انا ماراح استمر انا سايرتك بس انت ماعندك حد ونسيت عمرك ونسيت ان ورانا عيال
وقمت اشوف عيالي وادرسهم واقوم فيهم وهو له وقت بعد مااخلص تدريسهم وانوم عيالي كلهم اروح له مو طول اليوم وعجبه او بكيفه يسهر لحاله او مع شلته اللي خربته وحاليا اعتدل شوي مايسهر كثير حده الساعه 12 ومافي دش وخرابيط وباقي مشكلته التدخين وتاخير الصلاه يصلي بس لا في مسجد ولا في وقتها وان شاء الله الله بيهديه ادري
انها مراهقة سن الاربعين وانها فتره وتعدي بس طولت عنده لكن عندي امل يرد مثل قبل ومالي الا ادعيله والله يهديه


وبالنسبه لكلامك عن عدم اعتذاري لولدي فانا فعلا سويت هالشي وماعتذرت منه وكلامك سليم ميه بالميه

وبالنسبه للخروج معاي انا بعد سويت نفس اللي تقولينه بس هو عنده بدائل اذ انا بحرمه بيطلع مع ابوه واذا ابوه بيحرمه بيطلع مع ولد خالته والا عمته وفي بدائل
يعني انا اقوله عقاب لك ماراح اوديك هالمكان فالاقيه يطلع مع غيري واذ حرمته من الفلوس ربعه راعين الفزعه كل واحد يعطيه وهو يسوي لهم نفس القصه اذا واحد منهم امه والا ابوه عاقبه وحرمه من شي قلوبهم واحده ماشاء الله

وبالنسبه للصرامه مع ولدي في هالحاله ماينفع جربت اكثر من مره ومانفع كنت اقوله تعال معاي وبعدين اوديك المكان اللي تبيه واعطيك فلوسك ووالله انه يرفض ويقعد في البيت ولا يروح معاي ووقتها اعصب وكل محاولات ربعه باقناعي انهم ياخذونه ارفض واقولهم السبب حتى يفهمونه انه غلطان وانه على سبب تافه خرب على نفسه هالطلعه بس مادري هذي المشكله عجزت معاه فيها وابوه عجز معاه فيه عند عجيب حتى على حساب مصلحته يعاند

وبالنسبه لتسجيلهم في مراكز تحفيظ القران مايلتزم فيها اسجله فيها ويداوم اسبوع ويطلع يتملل بسرعه وبالنسبه للنوادي الثانيه يداوم فيها زين و ماشيه معاه ويحبها
ومادري اذا هالسن تخليه شوي ينفر من امور الدين ويحب الامور اللي تبهره من كمبيوتر والعاب ونوادي وسباحه
لاني ملاحظه عليه هو بس اللي كذا اخوانه عاديين ولو ماعجبهم بس يلتزمون بالمراكز الدينيه


اخيراً جزاك الله كل خير اختي ام اثير4 على المساعده وجعله الله في ميزان حسناتك
وتقبل الله دعائك والله يسمع منك

__________________