الى كل من يقول (الطلاق مو حل)
السلام عليكم
اخواني واخواتي
لاحظت من خلال قرائتي لردودكم على كثير من المشكلات عبارة (الطلاق مو حل)
صحيح ان ابغض الحلال عند الله سبحانه وتعالى هو الطلاق
وان الطلاق يهتز له عرش الرحمن عز وجل
الله يكفينا شره
لكن فيه شي مهم لازم الكل يعرفه
يا أخي الكريم..واختي الكريمه
اذا قرأت مشكلة عظيمه يستحيل معها ان تستقيم الحياه الزوجيه ... مثل مشكلة الهجر بالاشهر بلا سبب.... وان الزوجه حاولت تغيير الوضع ومعرفة الاسباب ولكن دون جدوى...واخيرا فكرت في الطلاق
ليش تقول ان الطلاق مو حل؟؟
مثل ما ربي شرع الزواج ومن اعظم واسمى اهدافه وحكمه ... التحصن والعفه..
كذلك سبحانه وتعالى شرع الطلاق اذا استحالت المعاشره الحسنه بين الزوجين
صح والا لا؟
يعني رجااااء
الشخص فيكم قبل ما يقول ....الطلاق مو حل.....لازم مايفكر في الطلاق من منظوره الشخصي ...يمكن يكون مرتاح مع شريكه والبيت ملياان اطفال ومر على زواجهم 10 سنوات واكثر وفرحوا ببعضهم وعاشوا اجواء رومانسيه في بداية حياتهم ....في هذه الحاله حتى لو حصل تقصير بعد هالعمر اكيد ماراح يكون الطلاق حل لان بينهم شي كثير ...والمشكله طارئه على حياتهم
لازم يفكر في وضع الانسانه اللي عارضه مشكلتها ...اللي توها ماراح لزواجها سنتين وتعاني من الهجران بلا اي سبب منها....لازم يفكر في نفسه يوم كان في وضعها في بداية زواجه وكيف كان مستمتع مع شريكه ...وهي ذايقه الجفا من البدايه .......ماحست انها متزوجه اصلا...هل بتقدر تكمل حياتها بهالوضع؟ تتصبر؟ تتوقعون ماراح يصيبها مرض من الضغط النفسي والقهر على نفسها وعمرها؟.....اوياترا راح يجي يوم وتنفجر بعد فتره ؟
الطلاق بعد مو حل؟
انا ما اقول حثوا على الطلاق لا والعياذ بالله
بس اقول لاتكتبون هالعباره انصحوا قولوا اي شي بس لاتقولون الطلاق مو حل ... لان اصلا الطلاق قرار صعب اتخاذه واللي مقبله عليه خايفه منه مو ناقصه اللي يخليها تتراجع وتترد وهي اصلا تحارب في معركه خسرانه لو رجعت
اسفه على الاطاله