أختي أم فاطمة
يوم قريت مشاركتج حسيت فيج وايد لاني عايشة في نفس الوضع
انا بعد مطلقه و عند بنت ما كملت سنه ... ما بقولج عن سبب الطلاق او حالتي النفسية لان هذا مو موضوعنا .. لكن بكلمج عن علاقة بنتي بابوها عشات تعرفين اني اعيش نفس وضعج

طليقي كان متزوج قبلي و عنده ثلاث بنات وولد و انا كنت الزوجه الثانيه .. و مع ان علاقتي مع زوجته و عياله كانت اكثر من ممتازة بس انفصلنا لاسباب ما يهمج تعرفينها
المهم .. طليقي يمر علينا كل شهرين او ثلاث شهور و مو دايما يخلي فلوس لبنته مع ان حالته المادية زينه و انا ما اشتغل و اهلي حالتهم متوسطة
المهم ...يوم يمر علينا يتم نص ساعه او ساعه بالكثير .. بس معظم هالوقت يقضيه في سوالف مع ابوي و اخواني (لانه يقؤبلنا من بعيد ) اما بنته فمن ارسلها عنده في الميلس تصيح لانها ما تعرفه و مو متعوده عليه فيشلها ابوي او اخوي و يردونها لي .. يعني ما تكمل عنده دقيقتين ... انا هالوضع يموتني لاني ما ابغي بنتي تكبر و هي ما تعرف ابوها فاسكتها و ارد اعطيها اخوي عشان يوديها لابوها بس نفس الموقف يتكرر كل مرة و كل زيارة ...
مثل ما قلتلج هو مو دايما يخليلها صرف و لو عطاها المبلغ يادوب يكفي شهر هذا لاني احاول اني ما اصرف وايد و اييب الضروريات بس.. و هو بعد شهرين او ثلاث يرد يمر علينا و يمكن بعد هالفترة كلها بعد ما يعطيها صرف
الحمدلله اهلي مو مقصرين معاي او معى بنتي بس طبعا انا انحرج اني اطلب منهم فلوس عشان اشتريلها شي.. بعدين حتى يوم يعطوني قلبي يعورني لاني حاسة انهم يعاملونها كانها يتيمة و انهم يزكون عليها ..و انا اموت مليون مرة في اليوم و انا اشوف عيال اخواني و خواتي و هم يتربون بين ابوهم و امهم و بنتي عايشة كانها يتيمة مع ان ابوها في الدنيا ... اللي ما مر بهالموقف ممكن ياخذ الموضوع على اني حساسة زيادة عن اللزوم بس مثل ما يقولون اللي ايده في الماي مو مثل اللي ايده في النار..
تدرين انا شو اللي يدمرني صج .... يوم اتخيل شو بيكون احساس بنتي يوم تكبر شوي و تشوف اخوانها وهم يتربون مع ابوهم (وعلى فكرة هو يعتبر اب مثالي لهم و طريقته في التعامل وياهم ممتاااازة) ساعتها كيف بتكون نفسيتها؟؟ شو بتحس؟؟؟ بتلومني و تحملني مسؤولية بعدها عن ابوها و لا بتفهم اني مو انا اللي اخترت هالوضع؟؟
الله يعلم ان ما في في قلبي اي حسد او غيرة من حد .. و اني اتمناله هو و عياله كل خير لانه ابو بنتي و هم اخوانها في كل الاحوال ... بس دايما الام تحاتي عيالها و تخاف عليهم و على مشاعرهم من اي شي ..

سامحيني لاني طولت عليج .. بس اعتقد اننا بنحس ببعض و بنفهم مشاعر بعض لاننا نمر بنفس الظروف..
ما اقولج الا خليها على الله .. الواحد ما ياخذ الا نصيبه و ماتدرين الخير وين .. و انشالله يوم بتكبر بنتج بتتعود على ابوها و بتتم وياه فترة اطول المهم انج ما تحاولين تبعدينها عنه او تكلمينها عنه الشر لانه ابوها قبل كل شي .. انتي دورج الحين انج تحاولين تعوضينها عن غيابه و تكونيلها الام و الاب لان هي مالها ذنب في اي شي و لا اختارت انها تعيش و تتربى في هالوضع ...

الله يعينج و يصبرج و يباركلج في بنتج و تكون هي العوض عن اي جرح عشتيه

سامحيني عالاطالة
أختج أم ميرة