رابعاً : في حال الرغبة بانهاء خلاف بينكما:-

- إذا كانت فوق الثلاثين في العادة حتنبسطإذا قلت لها ( يا بنت ) . مثلاً هي بتقول فيك و يخطيك . تقوم تقول لها مثلاً ( شوف كيف البنت فسرتها ) . أنا متأكدة إنكم حتستغربوا لأنها كلمة عادية و بسيطة بس لها تأثير .
- إذا غلطت عليها ما فيها حاجة و لا حتنقص من شنباتك إذا اعتذرت لها .
- لا تطنشها ... يعني مو أكثر من يوم واحد بعد كده كلمها و حاول تصلح الأمور ممكن حتى بطريقة غير مباشرة.
- حاول أن تعذر عصبيتها قبل موعد دورتها بيومين و في آخر أيام الدورة .
- لا تعتذر لها بطريقة ( أصلي أنا الغبي اللي قلت كذا و كذا ) و بعصبية و زعيق ...هذه طريقة مهينة أكثر من كونها اعتذار.
- إذا كانت المشكلة بين زوجتك و أمك فالحل الأمثل أن تسمع لأمك و تقول لها : معاك حق أنا أتفاهم معاها .
و تسمع زوجتك و تقول لها : معك حق أنا أكلمها . لأنك أكيد ما ودك تخسر أمك و لا تبي تخسر زوجتك.


في حال إنه المسألة كبرت و راحت لآهلها :
- نفس الكلام ..... لا تطنشها أكثر من خمسة أيام . خلال هذا الوقت تكون نفسها هديت و مستعدة للتفاهم و تكلمها على جوالها.

- إياك و استخدام الأولاد كسلاح ضغط لأنها حركة تدل على انعدام المروءة و قلة الأخلاق إذا ما قلنا عدمها لأنه فقط عديم الأخلاق هو من يتلذذ بحرمان أم من رؤية فلذات كبدها.

- إذا قالت لك كلم أبوي و تفاهمنا عن طريق أبوي ... لا تزعل ... إيوة ما تزعل لأنها أكيد راحت عند أهلها و بكيت لما اتنفخت جفونها ، و قالت هو عمل و هو سوى .و إنت حط نفسك مكان أبوها أو أخوها و جات بنتك و لا أختك و تبكي و تقول لك ..هو عمل فيني ، هو سوى فيني..... أكيد راح تعصب و تقول و شواربك تهتز من الغضب :" أنا أراويه ... أصلنا إحنا الغلطانين عشان إحنا عاملناه على إنه بني آدم محترم و عززنا فيه لحد ما تمرد و أهانك و إنت يالمسيكينة ساكتة و متحملاه .... تفو على وجه اللي ما يستحي ."
طبعاً تقوم هي وقتها تحس إنها كانت غبية لأنها كانت ساكتة لك من أول أو إنه أبوها لمن يوقف جنبها تقوم هي تحس إنك إنت خذلتها و ما وقف معاها وقت شدتها غير أبوها فاستحالة إنك تتوقع منها إنها تطنش سلطة أبوها اللي وقف جنبها و اللي حسسها بالقوة بعد ما إنت حسستها بضعفها و عدم أهميتها.
طبعاً وقتها ما راح تتجاوز سلطة أبوها و ما راح تتخذ قرار إلا بعد مشاورته .

- بعد ما ترجعها البيت... لا تتوقع إنه كل المسائل اللي كانت بينكم حتختفي بين يوم و ليلة بالعكس حتكونوا أول كم يوم شادين شوية بس بعدين تتصلح الأمور و ممكن أحسن من أول كمان.

- بعد كم يوم من رجعتها جب لها هدية قيمة .... يعني مو بس ورد .