مرحبا اختي
انا قريت مشكلتج
بصراحه اختي قعدي بينج وبين نفسج وفكري بعقلج مو بقلبج
ماتتوقعين ان شهر عقاب يكفي ان الوحده تعرف غلطها
انتي الحين جم شهر لج واهو لا سأل فيج ولا حطلج اعتبار
انتي بنفسج تقولين لاحاشم صغير ولا كبير
على الاقل خلي يحشم امه وأبوه شنو يعني عنيد
حرام حرام حرام اللي يسويه فيج
يعني تقولين لاخليتي دموع ولاخليتي اتصالات ولاخليتي مسجات
شنو يبي أكثر من جذي
بصراحه وبدون زعل مادري شلون أهلج ساكتين للحين
انا أشوف بنتي تتعذب جدامي وما أسويلها شي
حرااااااااااااااااااااااام وظلم
اختي فكري بنفسج شوي
انتي تقولين بنفسج ان اللي تزوجوا الحين حوامل
مافكرتي ان العمر ماشي
مافكرتي ليش انتي مرميه في بيت أهلج واهو قاعد يذل فيج
مافكرتي بنفسج شوي
شوفي بقولج شغله انا ما أعرفج ولا انتي تعرفيني
يعني لاتقولين انتي ماتحبين لي الخير اللي تقولين لي تطلقي
بالعكس لوما اني حاسه فيج ما أقولج هالكلمه
خلاااااااااااااااص اللي يبيعني أبيعه
شنو هذا أحس هالايام بعض الازواج يستمتعون واهم يشوفون حريمهم يتوسلون ويبجون
حبيبتي انتي فكري فيها والله هذا قاعد يلعب ومستانس وانتي قاعده تحرقين بأعصابج
هذا مو حاط اعتبار للي أكبر منه شلون بيحطلج اعتبار باقي حياتج
لا تقولين أحبه وعسى أن تحبوا شيئا وهو شر لكم
ليش دايما انتي اللي تدقين واهو لأ
ليش دايما انتي اللي تتوسلين واهو لأ
ليش دايما انتي اللي ترسلين مسجات واهو لأ
شنو اهو عنده كرامه وانتي لأ
خلاص لي اهني ووقفي كل اتصالاتج وكل مسجاتج
اذا اهو يلعب فانتي تبين حياة زوجيه واستقرار
انا ما قلتلج هالكلام الا لاني شايفه المده اللي تاركج فيها مو شويه
فكري بنفسج وربي يحبج وراح يعوضج باللي يستاهلج
وصدقيني ربي ماراح ينساج
راح يمشي الوقت وبيتزوج وحده تسوي فيه نفس ماسوى فيج
لاتزعلين من كلامي انتي اختي
وبالاخر احنا اهني نعطيج راينا اذا حبيتي اخذي بكلامي واذا ماحبيتي شوفي اللي يناسبج وسويه
بس أرد وأقولج قعدي بينج وبين نفسج وفكري بكلامي
ترى بعدين ماينفع الندم اهو بيعلقج ومتى ماشاف ان عذبج بما فيه الكفايه بيطلقج
وانتي بتمين تقولين ياليت انا اللي طلبت الطلاق من زمان وحطيت لاهلي ونفسي اعتبار وكرامه
طمنينا عليج يالغاليه
__________________
