السلام عليكم,
أعزائي أعضاء و ضيوف هذا المنتدى الرائع حابة أشارككم بمشكلتي التي أعتقد إنو ما إلها حل إلا دعواتكم الصالحة لي بإذن الله. من دون ما أطول عليكم مشكلتي هي ماما للأسف الإنسانة التي من المفروض إنها تكون أقرب لي من أي إنسان بالدنيا و تحس بوجعي هي للأف من تملأ حياتي و حيات أخوتي و أخواتي بالأسى. لما كنت صغيرة أخوتي و أخواتي الأكبر مني كان ينولهم القسم الأكبر فما كنت حاسة كتير بتعاستهم لحد ما كبرت و صار دوري هلق. ماما كل ما تزعل من حدا فينا بتدعي عليه إنو الله مايوفقه بحياته و يغضب عليه و أوقات كانت تدعي علينا البنات إنو ما نتجوز. وحالة عائلتي الأن كتير صعبة الله مش موفق ولا حدا فينا و حالتنا من سيء إلى أسوء. أنا طول عمري حريصة إني ما أزعلها و دايما كانت تقلي الله يرضى عليك بس هلق من دعويها على إخوتي و أخواتي حالة العيلة متدهورة أبي كبير الأن و ما فيه يشتغل متل زمان و أخوتي ما حدى موفق و أخواتي البنات ولا وحدة مجوزة مع إنو أصغر وحدة فينا عمرها 21. المشكلة إنو أنا و خواتي دائما مننصحها و منقول لها تدعيلنا بالخير و إذا حدا فينا زعلها تدعي الله يهديه بس ما في فائدة. لما تزعل من حدا ما بتكلمه لأيام و أسابيع حتى لو إعتذر ما بتقبل إعتذاره. لما أشكيلها عن مشاكلي بتزعل مني و لما وحدة غريبة تشكيلها بتظل معها و بتنصحها و بتظل متابعة مشكلتها لحتى تحللها إياها. الأن هية زعلانه مني و دعت إنو الله يغضب علي على شي أنا ما إلي زنب فيه و مش قابلة تحكي معي و كل شي بعمله بحياتي مش عم بتوفق فيه متل حال باقي إخوتي و خواتي. هذا جزء من تفاصيل كثيرة مش راح أقدر أكتبها لأنها كتيرة بس حبيت أفضفض لحدا لأنو الحالة اللي أنا عايشتها و نفسيتي التعبانة مش سامحتلي أعمل أصدقاء بلأضافة أنا ببلد غربة. الله يهدي ماما و جميع المسلمين. أسفة إذا طولت عليكم. تقبلو تحياتي.
أختكم صبية.