بقي على الزواج يومين وجميع الأهل والأقرباء مهتمين بالفرح والي من قرايبنا ومعارفنا كان برا الديره جاء وتجمعوا عندنا بالبيت وصار البيت حوسه شوي.

وخواتي يجهزن لليلة الفرح ويتفقن مع الطقاقات.
وكثرة الاتصالات على البيت من كل معارفنا وأنا في غرفتي ماطلع كثير مرتبكة شوي وبنفس الوقت مبسوطة .

ومن بكره صار عندنا غداء تجمعن خواتي وعماتي وخالاتي وازدحم البيت شوي .
وزادت حيرتي وارتباكي وصرت استحي حتى من أمي صابتني رعشة بيديني حتى كاس الماء ينتفض إذا مسكته وانسدت نفسي عن الأكل من الرهبة والقلق مادري ليش.

وبعد صلاة العصر أخذت أمي وخالتي وأختي الكبير ه شنطة ثيابي وشنطة الماكياج وجميع أغراضي وراحوا لم شقة زوجي ورتبوا الثياب والأغراض ورجعوا بعد المغرب .

وبعد العشاء قعدت معي أمي شوي بالغرفة وعلمتني بعض الأمور الخاصة ألي لازم إني انتبه لها بالزواج وقضيت هذيك الليلة وأنا ما نمت مادري وش فيني صابني ارق وقلق ورعده.

وفي يوم الزواج زادت الربكة عندي شوي وكثرت الاتصالات علي من صديقاتي وقريباتي وكلن يهنيني ويدعي لي .

وبعد الظهر جت لمنا الكوافيره وقعدت عندنا إلى المغرب وبعد المغرب راحن خواتي وخالاتي وعماتي لم قصر الأفراح وقعدت أنا
وأمي وخالتي الكبيره وأختي الكبيره بعد وأنا لو تشوفوني ميتة من الخوف .
:
وبعد العشاء كان اخوي الكبير عندنا وكل شوي والثاني وهو متصل على زوجي ويتواعدون متى يبي يجي وشلون يبي يروح وشلون يبي يتعشى ومن ها لكلام .

وقامت امي وخالتي وأختي يرتبن الكنبات ويحطن ورد وبخرن المجلس والبيت وأخذتني امي وحطتني على الكنب وقامت تشجعني
وتنصحني وفي لحظة سكتت امي وناظرت بي شوي أنا ما تحملت
وقعدت ابكي وبكت امي معي لأني حسيت إني ابفارقها وبكت أختي وخالتي وتعانقت أنا و امي شوي لين جاء اخوي وقال بسرعة رتبوا أنفسكم ترا العريس توه طالع من القصر هو وأبوي ربع ساعة وهم عندنا خلوا الصياح عنكم .

مسحنا دموعنا ورتبنا أنفسنا إلا اخوي يقول تراهم جو عند الباب أنا صراحة لولا ستر الله علي كان طلعت روحي من الخوف لو تشوفوني قمت أتصبب عرق والماكياج خرب والله ضحكت على روحي بعدين.

ودخل العريس علينا وأمي وخالتي يزغردن وقام وحط ايده على جبهتي وقراء دعاء العروس وجلس بجنبي على الكنب وأبوي واخوي يباركولنا ويدعون وأنا صراحة حسيت براحة نفسية يوم قعد جنبي وقمت أتنفس بقوه .

جابت امي عصير وعطتنا وشربنا وبعدين قام العريس وقالي يا لله يا لغالية خلينا نروح لشقتنا وجابت امي عباتي ولبستها وحبيت راس امي وقعدت تصيح شوي وسلمت على أبوي واخوي وخالتي وأختي وطلعنا من البيت وركبت سيارة زوجي .

وحنا بالسيارة أنا مرتبكة شوي وزوجي يسولف علي وينكت ويقول الله يوفق بينا ومن ها لكلام.

دخلت شقتي إلي أول مره أشوفها وصراحة شقه صغيرة لكن حلوه وجلسنا بالمجلس أنا وزوجي هو يسولف وينكت وأنا عيوني بالأرض مستحييه أسوي نفسي إني اضحك وأنا مادري وش يقول من الحياء ألي فيني.

شوي إلا ويطق الباب وراح زوجي فتح وصار المطعم جايب عشاء وحط العشاء زوجي قدامي من كل شي مشويات ومقبلات ومن كل نعمه .
أنا صراحة جوعانة بس منسده نفسي من الخجل والقلق أكلت شوي وقام زوجي يوكلني بيده وأنا مستحييه يا لله بالله ابلع اللقمة اقعد ساعة واللقمة بفمي مابلعتها من الحياء.

ومن بكرة سافرت أنا وزوجي لمكة وأخذنا عمره وكنا طول الخط أنا وإياه نسولف ونتصارح صراحة تجريت عليه شوي وحسيت أني اعرفه من زمن طويل .

وصلنا مكة وأخذنا عمره ورحنا لم الفندق وكان فندق خمسة نجوم فخم شوي وكان الوقت تقريبا الساعة 11 بالليل تعشينا وبعدين قام زوجي تروش ونام لأنه من الصباح وهو يسوق السيارة تعبان شوي

وأنا ماجاني نوم وكان بالغرفة يوجد كمبيوتر وخدمة الانترنت قمت وشغلت الكمبيوتر ودخلت على منتدى عالم الحياة الزوجية ورحت لقسم المطلقات والعوانس وتذكرت يوم كنت قبل اشهر قليلة وأنا اكتب بها القسم وكنت اشكي لإخواني وأخواتي معاناتي مع العنوسة .
والله تصدقون يوم تذكرت ذيك الأيام قلت ( مااجمل أيام العنوسة سبحان الله قبل كم شهر كنت عانس والحين صار لي يومين متزوجة وزوجي نايم بجنبي الله لا يغير علي اللهم أمين ...صحيح انه مع العسر يسر ما كنت أتوقع إني أتزوج والحين احمد الله واشكره )

هذه الخواطر هي إهداء مني لأخواتي العوانس والمطلقات لبث روح الأمل فيهن وليعلمن أن الله ألي خلقهن وهو المتكفل في رزقهن وصدقني راح تنسن كل شيء إذا تزوجتن وراح تصير عندكن ذكريات جميلة . ويمكن مانشوفكن ابد بها لمنتدى

----

اسأل الله العظيم رب العرش الكريم أن يرزقكن أزواجا صالحين مصلحين وان يرزقكم الذرية الصالحة اللهم آمين يارب العالمين .

__________________