اختي nonwa ... الله يعينج و يهدي خطيبج ان شاء الله

حاولي تهدين نفسج و لا تاخذين أي قرارات وانتي في حالة زعل او عصبية .. لانج بتندمين بعدين حتى لو كان القرار صح ... لازم تهدين و تفكرين عدل و تحسبين كل الامور و بعدها تقررين شو بيكون الوضع بينج و بين خطيبج


اول شي... ما في حد ممكن يقولج شو اللي تسوينه بالضبط .. لانج مهما شرحتي الوضع و شو اللي صار بيكون كلامج من طرف واحد و من وجهة نظرج انتي .. و يمكن خطيبج له اسباب تخليه يتصرف بهالشكل وياج و انتي ما تدرين عن هالاسباب


انا عندي كم نقطة اتمنى تفكرين فيهم

1. بعد ما تهدين شوي ... فكري في خطيبج نفسه .. في صفاته .. في شخصيته .. في تعاملج وياه (في غير اوقات الزعل او البعد) ... هل تعتقدين انه من البداية كان جاد في الارتباط ولا كان يتسلى؟؟؟


2. هل ممكن يكون شاف منج او من اهلج شي خلاه يتغير؟؟؟


3. هل ممكن يكون حبج في الاول و بعده يحبج لكن الطريقة اللي اتعرفتوا على بعض فيها ماثرة عليه و تخليه متردد في انه يكمل الارتباط؟؟ (و فكري في هالنقطة زين لان واااااااااايد من الشباب بعد ما يتعرفون عالبنية يشطون فيها و يقولون مثل ما عرفتني عرفت غيري)

4. هل فكرتي .. ان ممكن تصرفاته و بعده عنج مو بقصد انه يهملج او يزعلج .. لكن هي جزء من شخصيته.. لان على حسب علمي و تجربتي في نوع من الرياييل مهما كان حبهم للحرمة بس ما يحبون يتمون متقيدين بتلفونات و يارات و هالسوالف .. يعني يحبج بس بيتصل و يزور يوم يفضى او يشتاق ... و على فكرة الرياييل اللي هذا طبعهم غالبا ما يتغيرون بعد الزواج


5. هل جربتي انج تناقشينه في الموضوع في غير اوقات الزعل؟؟؟ يعني يوم يرد و تتصافون و في جلسة هدوء و صفا افتحي معها الموضوع بس بهدوء و من غير عتاب او صياح ... عشان تعرفين اسبابه عالاقل



الله يهديه و يسعدج وياه لو لكم نصيب مع بعض .... لكن اختي اتمنى انج ما تدعين عليه و لا تحطين هالافكار في بالج انه ظلمج و الله بيعاقبه .. لان صدقيني لو صارله شي لا قدر الله بتحسين بالذني و تفكرين ان يمكن هالشي اللي صارله سببه زعلج منه و انتقام الله من اللي سواه فيج .. فسامحي احسن ... و ادعي الله يصبرج و ينسيج و يعوضج باللي احسن منه لو ما كان لج نصيب وياه


تحياتي لج و اسمحيلي عالاطالة.