والله انا تعرضت لمواقف كثيرة يا اختي مشمشة طبعا قبل ما اتزوج.. واكثر اللي كانوا متقدمين لي كانوا شايفيني وكنت الف بالمية عاجبتهم.. ما يحتاج اقولك بحرينية وهذي تقاليدنا..

منها هالموقف.. مرة تقدم لي واحد وكان عمري 16 سنة وطبعا قبل اي سؤال وقبل النظرة وقبل كل شي رفضته لأني صغيرة في العمر ورافضة موضوع الزواج.. بعدها بسنة بالضبط رجع وتقدم لي,, فوافقت على النظرة الشرعية ..

وفي يوم النظرة قمت اسأله شاللي يحبه في البنت وشللي يرفضه فيها... قام يقول لي انا ما احب البنت اللي جذيه وما احب اللي تسوي جذيه..وووووووو,, انا رديت عليه: انا جذيه,, واللي يبيني ياخذني باللي انا فيه واللي مو عاجبه مو مجبور علي... قال لي لالا عاجبني والله بس ارضي فيني...

انا هني حسيته مو رجال ولا عنده كلمة ولا عنده شخصية ورفضته, وبعدها بسنة((هههههههههههه الأخ مو متنازل)) رجع وخطبني ورفضته طبعا..
والشي اللي يضحك بعد ما اتزوجت ارسل لي وحدة من جهته تقول لي فلان للحين يبيش ويقول لك تطلقي وهو مستعد يتزوجش ويعمل لك احلى عرس ويعيشك احلى حياة...!!!!!!!!!!

هذا يسمونه قمةانعدام الذوق والأخلاق..!!

المهم انا طلعت شوي برى الموضوع بس احب اقول انه بعض الأشخاص اللي تقدموا لي رفضتهم يا أما بسبب اعمارهم( اكبر مني بواجد او اصغر مني) او بسبب انه الشخص شكله ما يعجبني او انه متين وانا حدي ضعيفة, او انه ما عنده شخصية.. لحد ما التقيت بفارس احلامي الطيب الخلوق المتفهم زوجي وصديقي وحبيبي واخوي واهلي.. كل شي احبه فيه.. ما اخافه منه, بس اخاف اني ازعله او اجرحه واحترمه احس هذي الاشياء اهم شي في الزوج وفي العلاقة الزوجية الاحترام قبل الخوف..

المهم انا طولت بس بالتوفيق للجميع والله يألف قلوب جميع المقبلين على الزواج..
وادعوا لي يا اخواني بالذرية الصالحة..