الاخت ريمي....
خذي هذا الجدول البسيط وياليت باقي الاخوات والاخوان يضيفون عليه
بما أن المدة قصيرة يعني 3 اسابيع وتريدين تقسيمها بين باريس ومدينة اخرى اذن كما تفضلت المراقبة العامة افضل مدينة هي لندن....
باريس
مدينة النور والعطور...اجمل عواصم اوروبا......رائعة جدا والجو فيها حلو في الصيف...انصحك بالسكن في فندق قريب من منطقة الشانزليزيه......في فندقين مشهورين هناك وهما الماريوت والكونكورد.....لا تنسي زيارة فرساي...وهي ضاحية تبعد عن باريس قرابة ساعة....فيها متحف رائع وهو قصر فرساي......تحيط بالقصر حدائق خيالية في جمالها....جنة الله في ارضه......هذا المتحف ستقضين فيه يوم كامل
واذا انت تحبين الملاهي الترفيهية يمكنك قضاء يومين في فنادق الديزني ( مدينة ملاهي مصغرة عن ديزني امريكا )التي تبعد عن باريس حوالي ساعتين او اقل لا اتذكر بالضبط لاني لمن ذهبت لها كانو مغيرين الطريق لوجود اصلاحات فيه.....او تذهبين لها بنفس اليوم وتعودي لباريس ...
متحف اللوفر في باريس....اشهر متاحف العالم.....مهم جدا انك تزوريه...وسوف تشاهدين المومياء المصرية ولوحة الموناليزا......
برج ايفل.....من اهم معالم باريس...الله يعينك على طابور الانتظار..بس عادي الطابور في اوروبا راح تشوفيه على طول وفي اي مكان ( نظام صارم انشاء الله وزير راح يوقف معاك بالطابور وينتظر دوره )..عموما انا خفت اني امل من الانتظار بس لقيت انه مشي بسرعة.....وبعد ما تنزلي من البرج...راح تلاقي رسامين اسيوين على جانب النهر....(فاصلي في الاسعار معهم ).....وخذي مركب سياحية ( ممكن تاخذين لنش صغير فقط تتمشين او تاخذين رحلة مع الغذاء )
شارع الشانزليزيه....اشهر واكبر شارع في باريس....فيه قوس النصر وفي نهايته دورا الكونكورد...وقريب منه متحف اللوفر.....فيه مقاهي ومطاعم ومحلات تسوق.....المكان المفضل للخليجين....راح تشوفين الفنانين..والوزراء والامراء والشعراء والشيوخ واشهر الشخصيات العربي والخليجية...احلى وقت تزوريه بعد الساعة 10 في الليل تكونو خلصتو من المتاحف والاماكن الترفيهية....من 10 الى 1 او 2 لان في اوروبا كل شئ يقفل بدري
الحي الاتيني...يمدحوه البعض بس انا ما رحته بس سمعت عنه....روح جربيه
المطاعم العربية والسهرات راح تلاقيها في منطقة الشانزليزيه....مطعم فخر الدين واليزيه لبنان وغيرهم.....
بما انك لا تحبين الشواطئ فلا تروحين نيس لانها مدينة ساحلية......
بعد ما تقضي 10 ايام في باريس تاخذي قطار الى لندن عاصمة الضباب....حوالي 3 او 4 ساعات...القطار سريع جدا وممتاز من الخدمة والنظافة ( طبعا درجة اولى )...ما راح تملي من مشاهدة الطريق الاخضر والاشجار والحدائق.....طريق كله طبيعة خلابة
لندن...عاصمة الضباب.....كلها حيوية واثارة.....اشهر معالمها.....نهر التايمز ( رحلاته البحرية مرة حلوة ) متحف الشمع ( لا يفوتك مرة خطير وممتع ).....متاجر هارودز ( ملك لرجل الاعمال المصري محمد الفايد ).....وساعة البيق بن ....ومن اشهر الشوارع ايجوارد رود....فيه مطاعم ومقاهي عربية ...المروش واحد من اشهر المطاعم هناك......وشارع اكسفورد ستريت ...كله متاجر ومحلات تسوق
منطقة البكاديلي...فيها سينمات واسواق ومطاعم صينية كثيرة جدا
لا تنسي تروحي الطرف الاغر ...اشهر دوار في لندن كله حمام وطيور وتتصوري مع الحمام وتاكلينهم ( دايما يصورو فيه الافلام والمسلسلات المصرية )
حديقة الهايدبارك.....حديقة حلوة راح تستمعي فيها ...جوها العام حلو.....اشتري عيش او حبوب عشان تأكلي البط...متعة
اذا انت من عشاق الريف....فستستمعي بالريف الانجليزي ( تقدري تاخذي فيه يومين او تروحي بالقطار وترجعي لريدينق تبعد عن لندن ساعتين بالقطار ...هادئة وجميلة ورومانسية)
اتمنى اختي اني افدتك بمعلوماتي المتواضعة.......ترى انا زرتهم من 7 سنوات اكيد اتغيرو وفي اماكن جديدة
تمنياتي لك باجازة سعيدة جدا.....ولا تنسي تبشرينا بعد ما ترجعين وتعطينا اخبار رحلتك عشان الاعضاء والعضوات يستفيدوا

__________________
زمان يروح وناس تروح..تألمنا وعشنا جروح...
خسرنا كل شئ غالي....... عشانك يا عديل الروح....