اخوي فارس .. الله يعينك علىمشكلتك و يلهمك الحل اللي فيه الخير لك و للجميع بدون ظلم لاي حد

و الله مشكلتك هذي صارت وايد تتكرر في مجتمعاتنا .. لان التكافئ العلمي صعب انه يتحقق بين الطرفين ... و مع هذا ما اظن الطلاق هو الحل ... او على الاقل مو هو الحل الامثل ... فحاول تدور على حلول بديلة يمكن تقدر توجد نوع من التفاهم بينك و بين زوجتك عشان ولدك و عشانكم انتو الاثنين بعد .. لان الطلاق صعب على الكل .ز حتى انت اللي تتشكى وة شايف ان الطلاق بيريحك صدقني لو صار لا قدر الله و طلقت زوجتك بتمر بفترة صعبه في حياتك .. خاصة لو طلقتها وانت متردد لانك بتحس بالذنب


انا عارفة ان الاختلاف في اسلوب التفكير ممكن يخلي الحياة الزوجية صعبة بس ممكن تحاول تحل هالمشكلة خاصة انك تقول ان زوجتك تحبك .. بعدين هي حرمة عودة و اترملت قبلك فاكيد بتكون مستعدة انها تحاول المستحيل عشان تحافظ عليك و على زواجكم .. ممكن انت تستغل هالشي ... فاتحها في الموضوع بصراحة .. قولها كل الاشياء اللي تضايقك .. خبرها حتى انك فكرت تطلقها و انك مضطر تطلقها اذا ما حاولت تساعدك في انك تتفاهمون و تعيشون باستقرار و هدوء .... طبعا لا تستخدم اسلوب التهديد القاسي لكن في نفس الوقت اشرح لها كل احساسك و كل اللي في خاطرك و فكرت فيه ... مهم بعد انك تساعدها و تقدم لها بعض الحلول و الطرق اللي ممكن تخليها تتغير ... يعني لو كنت شايف ان الحل في انها تكمل دراستها قولها و اعرض المساعدة ... ابدا وياها ببعض الكتب البسيطة اللي تشرح اهمية الاستقرار الاسري ... علمها على استخدام الكمبيوتر و الدخول للمنتديات المفيدة عشان تفتح قدامها مساحة للحوار مع الاخرين و هذا بيكون له دور كبير في اتفتاحها العقلي و استعدادها للمناقشة .


صدقني في كثير من الحلول البديلة .... الطلاق ممكن يكون فيه ظلم كبير لها و لابنك و يمكن حتى لك انت .. عطها فرصة اخيرة بس المهم انك تتكلم وياها بصراحة عشان لو بعد هالفرصة تمت مثل ما هي و ما حاولت تتغير و انت قررت تطلقها بتطلق بدون ما تحس بالذنب لانك بتكون عارف انك عطيتها فرصة تتغير بس هي اللي ما حافظت عليك


صحيح ان وراء كل رجل عظيم امرأة ... بس عظمة المراة مو شرط تكون بالتعليم .. ممكن تكون عظمتها بحبها و حنانها و عطفها و فهمها لزوجها و تشجيعها له .... حاول معاها و ان شاء الله تتعدل امورك و تستقر حياتك

تحياتي