على حسب علمي هي في النمسا "الريف النمساوي" تقع بين النمسا والمانيا ويكفيها 4 ايام لكنها من اجمل واروع منااااطق العاااااااالم سبحان الخالق

---------------------------------

أهم الاماكن بفينا :
1- قصر شمبرون :قصر كبير لملك وفيها حدائق وغابات خياليه تدخل من سور القصر مجانا وتتجول في ساحاته وحدائقه لكن نفس القصر بفلوس وما انصح احد يدخل له لان اغلبه اصنام وخرابيط مالها داعي عليك بالحدائق والنوافير اللي ورا القصر وفيه عربات تجرها الخيول بس غاليه اركب بالعربه الكبيره سعرها حلو 8 يورو أوفر من الصغيره ب30يورو وجزء من غابات القصر يوجد حديقة حيوانات الله يكرمكم لكنها عاديه الدخول بما يعادل 130 ريال وصغيره ما فيها زود .
2- براتر: مدينة الملاهي وهي عباره عن ملاهي صغيره لكنهم مكبرينا بالشوارع ومباعدين بين الالعاب حتى تكون كبيره .
3- برج فينا منه تشوف فينا اسمه (دون ناوبارك ) احس ماله داعي لانك لو ركبت لعبة العجله (الدائره الكبيره )
بتشوف نفس الاماكن لانها عاليه جدا.

4- سي قروتي : وهي عباره عن مغاره مثل هيت اللي بالرياض كان هتلر يصنع فيها الطيارات ايام الحرب العالميه الثانيه وما احد يدري عنه وهي بارده جدا فيها صقيع لدرجة انهم ياجرون بطانيات احجامم صغيره تلفها على جسمك عم البرد .
5-حديقة لكسمبورج : هذي احسن مكان بفينا تستاهل يوم كامل حديقه كبيره جدا تحس بجو الادغال والاشجار الكبيره
وبوسطها بحيره مليانه بط وبجع وانواع الطيور وتقدر تستاجر قارب مشحون على الكهرب او قارب يدوي وتتمشى بالبحيره وتطعم الطيور.
6- شارع الكارتنر : شارع تسوق طويل ومهوب صاحي واغلب المحلات مسويه تخفيضات وبضاعته افضل شي

وفيه ناس تسوي استعراضات يني شحاذه بادب
7- شارع ماريا هلفر اعتقد اسمه كذا قريب من الكارتنر بس بضاعته وسط ورخيص .
8- مدينة التسوق الشوبنق سيتي :مبنى من دورين كبير جدا والله يسر لي طريقه اروح له وارجع بسعر خيالي بس 15 ريال لان التاكسي لو يوديك بيطق 400 ريال بالراحه لانه برا فينا الطريقه كالتالي تسأل عن الاوبرا وهي في بداية شارع الكارتنر مقابلها مكتب الخطوط المصريه والسوريه اقطع الشارع واجلس عند مكتب الخطوط كل ساعه يجي باص من مدينة التسوق خاص بشركة ايكيا ومكتوب عليه ايكيا دعايه لون ازرق اركب معه يوديك مجانا وللعوده اول ما توصل اطلع للدور الاول واسأل اي موظف ايكيا عن تذكرة العوده ياشر لك على الكونتر اللي يبيعها قيمة التذكره يورو وربع والاطفال مجانا .

بالنسبه للمواصلات المترو
والمترو بفينا سهل جدا انا ما اعندي لغه والحمد لله مشيت اموري وصورت بالكميره طريقة استخدام المترو حتى يتعلمون اللي ما يعرفون له .اشتريت تذكرة لمدة اربع وعشرين ساعه قيمتها خمسه يورو بس ما دخلتها بجهاز العبور خليتهامع بالبوك واركب من مترو لمترو والى الان جديده ما استخدمتهابس ترا الشرطه عندهم يسوون تفتيش عند المترو احيانا يسألون عن التذكره مر من عندهم وخلك واثق لاتناظرهم ما يسألونك ولو ارتبكت سالو عنها .
اول ما توصل الفندق اطلب الخريطه وبتلاقي فيها خريطة المترو وخطوط المترو اربعة الوان ازرق واحمر وبر تقالي واسود وكل خط له اسم يعني الاحمر اسمه U1وهكذا .
عند الفندق يجون المصريين ويعطونك كروتهم يودونك رحلات وتمشي لكن لاتروح معهم داخل البلد مثل البرج والملاهي والشمبرون ونهر الدانوب ورح معهم للاماكن اللي برا فينا مثلا السي قروتي يقولك ب80 يورو يوديك واذا شديت معه نزل للسبعين والسعر المعقول 60 يورو مثلا انا اخذت تاكسي مصري والله انه حبوب وداني للسفاره اسجل الجواز والسي قروتي وحديقة لكسمبورج وجالس ينتظرني لاطعه عند الحديقه بس بـ98 يورو لان ستين سي قروتي و12 للسفاره لان مبناهم الجديد بعيد نوعا ما عن وسط البلد و25 للحديقه وهذا هو المشوار الوحيد اللي ركبت فيه تاكسي غير المطار
بالنسبه للبرامج السياحيه القروبات غاليه نوعا ما .
وامر مهم جدا اذا وصلت للفندق حط بطاقتك الصراف بالسيفتي بوكس وخل معاك الفيزا عشان لو ضاعت محفظتك لا قدر الله يصير عندك سبير مجرد وجهة نظر شي ثاني خذ معك كاش لان بعض المحلات ما يحاسبون بالفيزا .
المساجد بفينا كثيره والنهار طويل جدا يمديك تروح لاي مشوار ببالك .

هذا عن فيننا باختصار :

الحجز بالقطار الى سالزبرج "الزيلامسي" سهل لان كل نصف ساعه رحله والطريق روعه صوره خياليه سبحان الله العظيم
سكنت بفدق ريسانس موقعه حلو لانه خطوات عن محطة القطار وجمبه مسجد جامع ومقهى انترنت بس الفندق للاسف خايس غرفه ولا بريال لكن المثل يقول كل دقه بتعلمومه ......


سالزبورج مدينه صغيره هاديه وحلوه ولاحظت ان شبابها مثل شبابنا بالسيارات يطيحون ويغيرون ملامح السيارات والنقاب فيها عادي جدا بس بعض القروبات اللي تجي لسالزبرج تحس بنظراتهم بس عادي ما عليك منهم المشي حلو حلو وممتع بسالزبرج صحيح الجو مشمس اغلب الاوقات لكن الاشجار كبيره امش بظلالها البلد القديم فيه شارع تسوق حلو والجلوس على النهر ممتع جدا وفي سالزبرج تاجير سياكل تلقى بمحطة القطار وعند البلده القديمه والايجار يبدا من ساعه الى شهروساعرهم معقوله القلعه اللي اعلى سالزبرج توصل لها من السوق والتاكسي لن تحتاجه في سالزبرج ابدا
يوجد حيقه فيها انواع الورود وتنسيقها حلو عند فندق كراون بلازا وتقدر تروح لميونخ من سالزبرج وترجع بنفس اليوم بس لاتنسى جوازك خله معك لانه قبل توصل ميونخ يفتشون الشرطه عن الجوازات .


الاماكن للسياحه فى سالزبورج واولها منجم الملح الذى سميت هذه المدينه نسبة اليه وكذلك توجد منطقة البحيرات وهى جميله ويمكن اخذ جوله بالقارب او ركوب العباره وهى افضل وتوجد حوالى 5 بحيرات ولكن توجد اكبرها وهى الافضل لانها متشابهه وسوف تجد محل للاسماك على جانب البحيره واكله جيد ولاتنسى قصر الالعاب المائيه وهو نسبة الى احد الملوك قديما والذى اوجد هذا القصر للتسليه والترفيه مع ضيوفه من نوافير ومقالب للزوار فيه . هذه هى افضل الاماكن فى سالزبورج والتى تذهب اليها بالقطار خلال 3 ساعات تقريبا من فيننا ولاتنسى ان تركب القطار السريع وهى نقطه مهمه واما الاقامه فيها فانصح ان تكون من يومين الى ثلاثه على الاكثر


بالنسبه للمواد الغذائيه انصح ان الواحد ياخذ معه اكله من هنا اوفر له واذا بغيت تشتري كوكا وماء انتبه تشتري من الاكشاك لانها غاليه جدا اسأل عن سوبر ماركت كبير تلقا كل شي سعره معقول ولاتنسى تطلب ريسيت من كل محل تشتري منه واذا رجعت بالسلامه تروح لمكتب الاسترداد بالخبر ويرجعون لك فلوسك من الضرائب ترى ابي الفايده للجميع ماهو داعيه للمكتب والله .

اشهر محلات التسوق بالنمسا وميونخ C&Aومحلات H M اسعارهم حلوه وبضاعتهم ممتازه

واذا تبي اجر الدنيا والاخره خذ معك مصاحف او كتيبات دينيه وحطها بالمساجد اللي تصلي بها خصوصا المسجد اللي بسالزبرج صليت فيه الجمعه عدد المصاحف فيه قليل جدا .
وانصح بعد ان تاخذ معك شنطه كبيره فاضيه عشان تحط فيها مشترواتك وما تتوهق.




منقووول للامانه من الرحاله

__________________