أنا عندي بنت وولد البنت 6سنوات والولد 3سنوات يعني في فرق معقول بينهم عشان أعطي كل واحد حقه .. في البداية كنت بصراحة اذا عصبت اصرخ على بنتي وأضربها أحيانا عشان تسمع كلامي بس اكتشفت أن زوجي يستخدم نفس أسلوبي يعني اذا صرخت يصرخ على البنت معاي واذا ضربت ممكن يضرب معاي .. فهني بصراحة كرهت نفسي لأني قاعده أشوف صورتي في زوجي وقلت في نفسي معقولة أنا وزوجي انربي بنتا شذي وهي بعدها صغيرة فمن يومها قلت في نفسي لازم أتغير وأغمرها بالحب والحنان والاهتمام واتبعت اسلوب النقاش والكلام والنفس الطويل يعني الضرب اخر شيء ألجأ له فكانت النتيجة أنه بنتي ما تتحمل أزعل منها وتسمع الكلام بدون ضرب والولد الحين اتبع معاه نفس الأسلوب وعلى فكرة بنتي اذا ضربتها تعتبر هالشي وايد كبير لأنها مب متعوده اضربها فتتأثر وايد وتبدأ تحاول بأي طريقة ترضيني .. ما أقو غير الحمد لله الذي هداني .. بس زوجي ظل على حاله بس هو مب من النوع اللي يهمل عياله بالعكس يدلعهم ويلعب معاهم ويطلع معاهم بس اذا غلطوا يكلمهم مرة وحده وبعدين على طول يضربهم بس بصراحة يخافون منه وهذا شي زين يعني في كنترول .. فأنا أقول كل أم تحاول تمسك نفسها عن الضرب لأن الضرب بعد فترة يستوي عادة واذا تعود الطفل على الضرب ما راح يأثر فيه وبعدين لا تتوقع الأم أو الأب أن التربية سهلة لا بالعكس هي وايد صعبة وتحتاج لصبر وبعدين انا ما حصلت النتيجة هذي مع عيالي بسهولة بالعكس عانيت من كثرة الكلام والحوار وأحيانا أحس اني ابغي أمد ايدي بس أمسك نفسي وأقول لأ لأ لأ يعني الأم اللي تلاقي طريقة ثانية غير الضرب لا تتسرع واتقول ان الطريقة ما يابت فايده لأن النتيجة تاخذ وقت لين ما تطلع .. ويم بتطلع النتيجة ايجابية بتشوفين كيف بتستانسين وبتنسين التعب اللي تعبتيه وبتبدين تخترعين عدة طرق لعدة مشاكل اتواجهينها مع العيال .