موضوع رائع وفكرة أروع..



امممم لما كنت طالبة طبعا كانو اهلي رافضين الزواج لكن ماكانو يجبروني ابدا انا متأكدة لو بينت لهم رغبتي بيغيرون رأيهم

لكن مشكلتي كنت مقتنعة بكلامهم مرررررررة انا من النوع اللي أتأثر بكلام امي كثير واحس انها هي الوحيدة اللي تعرف وش يصلح لي..

من يوم وانا صغيرة لين عمري 21 سنة وامي مربيتي على كلمة رجال عيب زواج عيب

لما صار عمري 15 طبعا انا من النوع اللي كل شي يدور معي بالمدرسة اقوله لأمي ولما اجيب طاري رجال تهاوشني بقووووووة

اتذكر كانت تقول يابنيتي ترى اهم مافي البنت سمعتها والبنت قليلة الحيا هي اللي تتكلم في الرجال

اي وحدة تتكلم في الرجال ابعدي عنها لو كلام عادي ابعدي عنها.. مافي بنت تجيب طاري الرجال الاقليلة حيا

قلتلها مرة لما كنت بأول سنة في الجامعة وش السن المناسب للرجال والبنت للزواج فيه؟؟ بغت تذبحني بغت تموتني على هالكلمة

من وين جايبة الكلام الوسخ هذا؟؟ عيب وحدة بزر تحكي في العرس لحد يسمعك يقول بنت ام فلان ماتستحي ان سمعتك تقولين الكلام هذا مرة ثانية قطعت لسانك!!

كانت كل ماسمعت بنت بتتزوج وهي طالبة كانت تطنز عليها وتضحك عليها وتقول هذي بنت ماتستحي تبي رجل!!

وبصراحة تربيت على هالكلام اتذكر لما كنت طالبة استحقر البنات اذا تكلمو في الزواج واشك حتى بأخلاقهم

ووأتهزأ على كل وحدة تنخطب ..الله يالدنيا الحين هم اللي يتهزون فيني !!

كل أنثى رغبتها الفطرية وحاجتها للرجل طبيعية جدا

أنا لاااااااااااا ماكان عندي هالإحساس.

كنت بنت حياتي اهتمام بالدراسة وبجمعة البنات وبالسوالف وبس!!

لما كنت بالجامعة يسولفون البنات وش مواصفات أحلامك كنت أتريق عليهم واروح اسحب لي اي وحدة من البنات واقول خلينا نتمشى بلا هالسوالف التافهة!!

واذا احد دق يخطب في بيتنا كانت تقول لي امي كنت افرررررح مو عشان الزواج لا!! عشاني اعجبت الحرمة ودقت!!

تفكيري كان غريب جدا لكن هذي التربية التربية

بآخر سنة بالجامعة بدت أمي تكلمني عن الزواج وبينت لي انهم خلاص راح يستقبلون اي خاطب

بدت تتفتح عيوني وبديت افهم الحياة واراقب الناس صرت اهتم بالجنس الآخر ودي افهم ودي اعرف

ويوم اشتغلت تغير تفكيري 360 درجة لأني صرت بمجتمع بنات ومتزوجات

طبعا أمي انقلبت الحين تماما 24 ساعة كلامها معي عن الزواج وتفكير ها تغير بعد!

بس كل هذا والعمر يمشي.. اذا فات الفوت ما ينفع الصوت <<< يعني هنا مافيه حل لمشكلتي

الحمدالله على كل حال


الله يجزاك خير اخوي سنون ومنون ويوفقك يارب

__________________
اللهم لك الحمد والشكر
"ولئن شكرتم لأزيدنكم"