أختي ريم مبروك الحمل وان شاء الله يكمل حملك على خير وتقومي بالسلامة

بالنسبة للمشكلة بصراحة مابعرف شو بدي اقلك
بس برأي حاليا في وقت طويل لتولدي ويجيك الطفل ان شاء الله فلا تتسرعي وتكبري المشكلة وتخبري أهلك أو أهله وطولي بالك وحاولي تفتحي معه الموضوع بوقت مناسب وتناقشيه ليش غير رأيه بعد ما كان موافق

لا تحسسي أبدا أن الدراسة أهم منه أو من حياتكن مع بعض قوليلي أنا ما بقدر أعيش من دونك وكمان بدي أكمل دراستي كتير علي الاتنين سوا
سألي اذا ما بدك أكمل دراستي لما بجينا أولاد ليش ما قلتلي كنا أجلنا موضوع الانجاب فترة لبين ما أخلص دراسة
(أنا ما عرفت منك اذا انت بآخر سنة ولا مشوارك طويل لتخلصي )بس اذا كنت بالسنين الأخيرة قوليلي بعد كل هالتعب والدراسة ما أكمل وآخد الشهادة ويضيع تعبي كله عالفاضي
لا تقليله هذا كان شرط زواجي وكأنه رأي مو مهم وما له أي أهمية أو معنى

حاولي تناقشيه بحل آخر يرضيه بخصوص الطفل ومين رح يعتني فيه أثناء دراستك

لازم مع كل الكلام السابق تحسسي إنك متمسكة بالدراسة وأن النقاش لإيجاد حل مو للتخلي عن فكرة إكمال دراستك

أهم شي ما تحسسي بالتحدي وإنك رأيك الي رح يمشي اقنعيه بالفكرة ودفعيه لياخد القرار بنفسه إنك لازم تكملي دراستك

أنا بعرف أن هذا الكلام ليس سهل ولكن عليك بالمحاولة والمحاولة حتى تصلي معه للحل

راقبي الوقت المناسب وطريقة الكلام التي لا تدفعه للتعصيب والصراخ وحاولي اقناعه

بالنسبة لترديده كلمة الطلاق قولي له هل أنت مستعد للتخلي عني بهذه البساطة ، هل المشكلة التي يكون لي راي فيها مختلف عن رأيك الحل هو الطلاق ، ليس عندك حل آخر ، سننسى هذه الكلمة لأن حياتنا ستستمر ان شاء الله ولن تنهيها أو تدمرها مشاكل بسيطة مثل هذه ، لنتناقش ونصل معا لحل يرضي جميع الأطراف

وبالنهاية أرجو لك التوفيق والسعادة وان شاء الله نسمع الأخبار الجميلة منك قريبا

__________________
لا إله إلا الله الملك الحق المبين