المهر يختلف حسب الدولة وحسب العادات السائدة
احنا مهورنا اغلبهم 70 الف ولا تاخذ 30 الف الا المطلقة او الارملة او اللي تتزوج من متزوج
و70 الف نصفها مخصص لشراء الذهب
وما ادراك ما الذهب
يعتبر هم للعروس
لان عندنا يوم لعرض الذهب ( يأتون الناس ليباركون للعروس واعطائها هدية الزواج قبل العرس بكم يوم وهذا اليوم يكون لعرض الذهب الذي يجب ان يكون من النوع الثقيل والغالي والا تفشلت العروس وسمعت كلمات /ثل ( ذهبكم مو شي- خفيف - الدقة مو حلوة - ليش الذهب شوية - ليش ما كثرتم من المسابح ومن هالسوالف)
ويخصص 20 الف فأكثر لشراء فستان الزفاف والناس اهم شي عندهم فستان الزفاف الذي يجب ان يكون من المحلات الغالية ويسألون عن اسم المحل وبكم وبعضهم استغفر الله من كثر ما تهمه هالسالفة يروح يشوف الفستنا في المحل قبل ان ينتهي ليتأكد فعلا فصلته عند هالمحل الراقي او عند محلات رخيصة
اما اللي تقوم بتأجير الفستان ؟؟؟ فشلة
ولا تنسى ماكياج العروس والله انه 200 ريال فأكثر
والمصورة اللي ترافق العروس وتصور لقطاتها لازم مصورة معروفة وهذي سعرها لا يقل عن 400 ريال مع تصوير الفيدو
وفيه دخلة العروس وهذي عاد يبالغون فيها العرايس لان الناس يهتمون فيها حيييل عندنا وسعرها يترواح ما بين 1500 الى 3000
ولازم العروس تشتري اكبر عدد من الدراعات ما اعرف شنو تسمونها (_ جلابيات) وهذي اقل وحدة وعادية تكلف 400 ريال
تخيل لو تشتري فقط 10 دراعات يعني 4000 ريال
غير الملافع والعبايات الغالية اقل عباية وكشخة فوق 300 ريال والملافع اسعارها ما بين 100 الى 200 الى 400 ريال
هذا غير العطورات والماكياج اللي لازم تشتريه كله ماركات ومن النوع الغالي لانها راح تحطها على التسريحة ويشوفونها الناس اذا زاروها لتهنئتها في البيت
غير البنطلونات والاحذية والحقائب والبوديات
وصبغ الشعر وبرنامج العناية ببشرة العروس
والله احنا عندنا تعقيد بالمهر
حتى لو العروس قبلت بمهر 30 الف تتضطر انها تاخذ سلف من اهلها لتكمل تجهيزها وتسكت الناس
لكن 30 الف تكفي العروس اللي راح تتحمل كلام الناس وتقوم بتجهيز نفسها بأرخص الاسعار وتقلل عدد المشتروات وتنسى شي اسمه كشخة وماركات
ادري عقدتكم لكن هذا اللي يصير بالمهر عندنا
