و الله مدري وش أقول
يعني أنا أفهم راي البنت
كوني تقريبا في نفس وضعها
بس عاد أنا بكلريوس و دراستي صعبه (9 ساعات دوام كل يوم و امتحانات متواصله على مدار السنه و أبحاث و مشاريع و كذا)
كنت دايما أقول مستحيل أتزوج قبل ما أتخرج لكن الحمد لله الحين حددنا موعد زواجنا بالصيف الجاي و يكون وقتها باقي لي 3 سنين بالاضافه الى سنة التطبيق
ممكن تسألون ليش غيرت رأيي؟؟اااااااااااا
هل لأن زوجي قال لي بينحرف؟؟ أو لأنه حاول يحسسني بالذنب بقوله إنتي تفضلين دراستج علي؟؟؟ حدد موعد و حطني قدام الأمر الواقع؟؟؟ بوز علي و زعل؟؟؟ استخف بعقلي و حاول يرشيني بهدايا؟؟؟؟؟ لا
أصلا لو سوا لي كذا كان قلت له بكيفك be my guest...يعني هو يوم أخذني داري بهالشي (و في حالتك مكتوب في عقد الزواج) يعني عجبه كان بها ما عجبه الباب يوسع جمل
هذا و أنا أحب زوجي و أموت فيه و بصراحه ما أقدر أتصور حياتي بدونه
بس أنا دراستي مهمة بالنسبه لي و زي ما هو يتوقع مني إني أهتم بشغله و مستقبله (اللي هو مستقبلنا) أنا بعد أتوقع منه يهتم بدراستي و مستقبلي (اللي هو مستقبلنا)

انت تقول ان هي ممكن تكمل دراسه بعد الزواج
و أنا أتفق معاك
بس أنا حاسه ان هي ما هي واثقه فيك (أقصد ماهي واثقه انك راح تسندها)
يعني أرجع لتجربتي
أنا واثقة 100% إن زوجي دراستي بالنسبة له مهمه مثل ما هي مهمه لي يعني من الحين (على فكره ترا هو يشتغل في مدينة غير مدينتنا حاليا يعني ما أشوفه غير خميس و جمعه) بس إذا عندي اختتبار ولا مشغوله مو هو اللي يصير يترجاني انه يشوفني أنا اللي أصير أترجاه يجيني يعني كم مره يقول لي ما راح أجي علشان تذاكرين و أنا أقول له طيب أبي أبرك نص ساعه تعال و ما يرضى و كم مره أبكي و يجي يجلس معي لحد ما أهدأ و بعدين يتركني و مؤخرا صار بعض الأحيان يجيب كمبيوتره ولا كتاب معاه و يجلس معي و أنا أذاكر
المهم قصدي أنا إن أنا واثقه ان هو ما راح يوم يشغلني عن دراستي
و أنا عارفه ان ان شاء الله زواجي ما راح يأثر كثير في دراستي (يعني طبيعي راح تتأثر بعد الزواج بس ان شاء الله مو بشكل كبير)
شي ثاني بالنسبه للأطفال أنا و زوجي متفقين ان ما راح نجيب أطفال الا بعد أنا ما أخلص كلشي الدراسة و التطبيق و هذا شي مرة مهم بالنسبة لي...مع ان زوجي يموت في البيبيز (كل ما شاف بيبي في السوق ولا شي يقول خل نخطفه ) و ساعات مسكين يكسر خاطري أقول له بيصير عمرك 30 و انت ما عندك عيال بس هو يقول لي لو أبي عيال على طول كان تزوجت وحده قاعده في البيت اخطبها اليوم و ما نكمل سنة الا و احنا مالكين و متزوجين كل شي و عندنا بيبي
فمثل ما قلت لك أنا متطمنة من ناحيته أدري انه بيصبر على العيال شوي و لو مثلا الله كتب و حملت قبل التخرج أنا عارفه ان هو راح يساندني لحد ما أخلص يعني هو دايم يقول لي البنت ما تضمن الا شهادتها يعني الدايم الله إذا ما ضل لها زوجها ولا أبوها ولا أخوها شهادتها هي اللي راح تجنبها الذل

عموما بغض النظر عن كلامي كله (يعني هذه تجربتي أنا) بس نصيحتي لك خذ السالفه شوي شوي يعني انتوا توكم ما صار لكم مملكين 4 أيام..يعني خل البنت تتعود شوي على حكاية ملكة و ما ملكه و بعدين تبدأ تفكر في زواج كذا
و أهم شي بين لها ان انت راح تكون سند لها خلال دراستها بالذات ان انت ناوي تكمل دراستك بعد قول لها احنا راح نسند بعض و كذا..و اذا هي خايفه من مسؤليات الزواج بين لها انك راح تسندها و تساعدها (بشرط تكون صادق يعني مو كلام في الهوا ) قول لها انكم راح تعيشون كم سنه عزوبيه و تتعشون سندويشات بيض و طماط على قول زوجي بس كل هذا في سبيل مستقبلكم بعدين تستقرون تجيبون عيال و كل واحد منكم عنده الماجستير و كذا

و لا تضغط عليها كثيريعني مهما كان توكم في البداية يعني انت الحين ممكن تحس انك تعرفها و تقدر تتفاهم معاها بسهوله...السالفه مو بيعه السالفه زواج حياة مشتركة عيال و عايله جديدة..و حط في بالك أي شي يحصل الحين ممكن يأثر علي بعدين..و 4 أي ام مو كافيه ان كل واحد فيكم يعرف نوايا الثاني..اصبر بس بعد شهر راح تكتشف انك في هالأربع أيام ما كنت تعرف عنها شي...و بعد 6 أشهر راح تعرف انك في الشهر الأول ما كنت تعرف عنها شي و بعد سنه نفس الشي..كل يوم راح تفهمون بعض أكثر و تتواصلون بشكل أحسن

أنا احساسي يقول لي ان هي تخرعت من اصرارك (يعني انت تقول أبي نتزوج بكرة فهي تقول لا أبي نتزوج بعد سنه..علشان بعد التفاهم (و أحيانا الهواش) تتفقون على بعد 6 أشهر :14: ) فاهم قصدي؟؟؟؟؟؟؟؟

اصبر عليها اسبوعين قفل على الموضوع و تصرف معها تصرف اللي توهم مملكين ولا تجي على طاري العرس..بعدين كذا يوم على رواق اسألها هي متى في بالها وقت الزواج المناسب..و اسألها هي ليش خايفه من الزواج وقت الدراسه؟...خلها تتكلم و انت تسكت و تسمع و أقصد تسمع جد مو بس تهز راسك و انت منت فاهم شي اذا هي ما تكلمت اسحب منها الكلام مثلا اسألها انتي خايفه مثلا من مسؤليات الزواج (الطبخ و النفخ و التنظيف و الكوي...الخ)...اذا عرفت بالضبط هي من أيش خايف يجي دورك يا شاطر تبدد مخاوفها...يعني حط في بالك ان إذا تبي تتزوج لازم تقدم تنازلات (يعني مثلا تتعشى بيض..تغسل الصحون..تكنس الصاله ) و اذا بتقول وراك دراسه هي بعد نفس الشي يعني اعتبرها يور روم ميت اليوم دورها في الطبخ و بكرة دورك
الحياة الزوجية (حسب خبرتي السطحية فيها) لازم لها تنازلات كثير يوم تسوي اللي في راسك و يوم تخليها تسوي الي في راسها و يوم توصلون لحل وسط

المهم ان شاء الله تستفيد شي من كلامي أو على الأقل تشوف الموضوع من منظور آخر
بس لا تنسى ان زي ما قلت لك أنا وضعي مشابه لوضها علشان كذا معظم الكلام إذا موب كله من وجهة نظري أوكييييييي؟؟؟ يعنيهذه طريقة تفكيري أنا موب ضروري هي نفس الشي طيب؟؟؟
و بالتوفيق ان شاء الله