انا اقولك طريقة كبستي.. بس ماظنها تشبه حق مضغوط ريدان هذا ماشفت كبسة مطعمهم بس عموما تقدر تاخذ فكرة من طريقتي..

اولا: قطع البصل صغير صغير وقطع الطماطم صغير صغير وممكن تقطع جزر شرايح صغيره خفيفه (عشان تعطي لون برتقالي اكثر للكبسه).

ثانيا: غسل الدجاج (ممكن بالخل) ويكون الدجاح قطع طبعا يعني فخذ وصدر وجناح وكذا.

ثالثا: جيب القدر اللي ناوي تطبخ فيه وحط زيت كمية تغطي قعر القدر وخلي الحراره متوسطه وبعدين ضيف البصل وقلب قلب قلب الين يلين البصل (بس انتبه لا ينحرق البصل ويسود) وبعدين ضيف البهارات (4 حبات هيل- 6 حبات فلفل اسود- 1 ملعقة صغيرة كمون- 2 ورقة غار- 1 عود دارسين او قرفه-1 ليمون اسود) وقلبهم كلهم .

رابعا: جيب الدجاج (بعد ما تكون غسلته مضبوط) وحطه في القدر معاهم وقلبهم الين يصير الدجاج استوى من برى بس.

خامسا: ضيف الطماطم المقطعه + 1 ملعقة اكل معجون طماطم.

سادسا : قلب الكل سريعا

سابعا : ضيف 3 كاسات موية متوسطة الحجم + 1 حبة ماجي+ 1 ملعقه صغيره ملح + الجزر المقطعه شرائح ثم غطي القدر واتركه لمدة نص ساعه .

ثامنا: خلال الانتظار جيب كاستين رز وغسلهم وانقعهم في الماء لمدة ربع ساعه.

بعد مرور نصف ساعه افتح غطاء القدر واخرج الدجاج وضعه جانبا ثم اضيف الرز ولازم تكون الموية اللي بقيت في القدر اعلى من مستوى الرز بقليل واذا لم تكن كذلك ضيف عليها شوييييي موية واعيد الغطاء واتركه 10 دقائق على نار متوسطه وبعد كذا كل شوي اكشف الغطاء وتاكد من نضوج الرز.

اما بالنسبة للدجاج فاعمل على جمب خلطة (كتشب+مسترد+ملعقه صغيره زيت) واخلطهم مع بعض ثم ضعها فوق الدجاج ثم ادخل الدجاج الى الفرن على حرارة 350 لمدة 5 دقائق الى 10 دقائق حتلاحظ لون الدجاج صار احمر بسبب الخلطه.


بعد نضوج الرز ووضعه على صحن التقديم قم برص الدجاج على سطح الرز وبالهناء والعافية.جربها وطمنا.



ملاحظه: 1)اذا ما حبيت فكرة الدجاج اللي بالفرن ممكن تخلي الدجاج مع الرز يطبخ يعني مافي داعي من شيلة الدجاج على جمب عند مرحلة اضافة الرز.



2) لا ترفع حرارة عين البوتقاز خصوصا انك لسه (عليمي) عشان لا يتلسع عليك الرز ويصير طعمه محروق التزم انه تكون الحراره متوسطه.


3) انت طلبت طريقة اكلات ثانية سهله عند المكرونه اسهل شي بس مادري اذا تحبوها او لا عندي كذا طريقه حلوه وسهله اذا حبيت اكتب طريقتها قولي وممكن كمان الاخوات يساعدونا.

__________________