شوفي كبريائي
اذا يمديك تفلتي من الجمعات والروحات والجيات للاقارب لا توفري
يعني من جد لا تروحي ولا تجي واقعدي في البيت احسن
حقيقي
شوفي معايا
لما تروحي لوحدة دايماً وتكونوا مرة قريبين من بعض البنت حتاخذ عليكي
وحتتشال الكلفة بينكم .. وبكذا ممكن انها تتكلم من باب انها خايفة على مصلحتك وو ... الخ
وكلامها ممكن يكون جارح
اما لو شلتي نفسك عنها .. وعزيتي نفسك وحفظتي لها كرامتها .. وما صرتي تشوفي البنت هذي الا فين وفين
كيف تتوقعي تستقبلك .؟ وكيف تتكلم معاكي ؟
كبريائي .. الدخلة الزايدة في الناس تخليهم ياخذوا عليكي ويتجرأوا .. ووجودك ماراح يكون له قيمة .. بالعكس
حيشوفوا نفسهم اهلك ومن واجبهم يتكلموا
اما اذا بعدتي عنهم .. وما زرتيهم الا فين وفين .. وقتها زيارتك هذي حيستقبلوها بالتهليل والترحيب ..
فهمتيني ؟
يعني باختصار خليك كانك غريبة .. وصدقيني ماراح تندمي
اما حكاية كلامهم المستمر رغم نجاحك .. فوالله ثم والله انه غيرة
تصدقي كبورة
لما اشوف الناس يحشوا فيا ويحاولوا يجرحوني انا او زوجي واهله افرح
تعرفي ليش ؟
لاني اكون متأكدة وقتها اني على سنقة عشرة .. وما قالوا هذا الكلام الا من باب الغيرة
اما اذا شفتهم متعاطفين معايا .. وقتها اعرف انه في شي غلط .. وانهم مبسوطين لاني ما كنت تمام .. فمالقوا حاجة
يمسكوها عليا
صدقيني كبورة .. هذي طبيعة أغلب الناس
اذا شافوا وحدة حلوة مستحيل يقولوا عنها حلوة
تلاقيهم يقولوا فلانة شعرها مدري اشبه .. فلانة جسمها مدري اشبه .. وزي كذا
لا تتوقعي في يوم يمدحوا حسناتك .. لكن اتأكدي مليون في المية انهم حيظهروا عيوبك ومساوءك
عشان كذا لا تتعبي نفسك وتهتمي بكلامهم .. واذا كان كلامهم يأثر عليكي فابعدي عنهم
اما بالنسبة للشوفة .. فانتي خليكي على الحياد
يعني لا تحطي في بالك انك حترفضيه .. ولا تقبليه
بالعكس خلي قلبك هوا اللي يختار .. اما عقلك فمعليش اعطيه راحة شوية
ولما تشوفيه قرري
لا تقرري رفضه من دحين .. مادام الشوفة الاسبوع الجي
ويلا يمكن ترجعي الجامعة ومعاكي خبر خطوبتك وتفرحي صحباتك
ونصيحتي .. حاولوا تعجلوا بالملكة .. وتأجلوا الزواج .. عشان يمديكي تاخذي عليه
بالتوفيق يا قلبي