السلام عليكم و رحمة الله و بركاته

و الله إني واقعة في نفس المشكلة ، جوزي لما بيزعل من حاجه بيخاصم فترة طويلة و أنا بحب إن أي مشكلة تحصل نواجهها و نتكلم فيها علشان تخلص و حاولت أتكلم معاه أكتر من مرة و أقوله إن الواحد لما بيكون زعلان و يفضل لوحده الشيطان بيدخله و بيفضل يكبرله في الموضوع و ممكن الموضوع يزيد جوه كل طرف . غير إن البعد و الخصام بيزيد فجوة الجفاء ما بين أي اتنين لكن مش كان في أي فايدة ، الخصام عنده هو الحل الأمثل لحل المشكلة بشكل مؤقت

لكن مش أكدب عليكم بعد تقريباً سنتين بدأت ألاقي حل ... جوزي مسافر يعني هو في بلد و أنا في بلد و ده طبعاً بيزيد المسافة و الفجوة ، المهم من غير ما أطول .. اتفقت مرة معاه و احنا في وقت رايق إنه مهما يحصل ما بينا في حاجات مش نقطعها و نفضل مداومين عليها و إن اللي هيبدأ و يقطعها يبقى هو اللي غلطان مهما كان الموضوع اللي حصل و وافق على الموضوع ده و الحمد لله رب العالمين حصلت كذا مشكلة لكن كانت الحاجات اللي متفقين عليها بتخلي في تواصل مع الطرف التاني غصب عنا ، و غصب عنا برده بيحصل احتكاك و بيبدأ النقاش مرة تاني و بالتالي بنتكلم في المشكلة اللي حصلت و الحمد لله رب العالمين بتخلص على كده

أما عن الحاجات اللي كنت متفقه معاه عليها ،، إحنا متعودين إننا نكتب إيميل على الأقل كل يوم لبعض و كمان متعوده إنه بيكلمني في التليفون على الأقل مرة في اليوم و لما كان بيزعل مني كان بيقطع الإيميلات و مش بيرد عليه نهائي ، و طبعاً بيقطع التليفون ... فاتفقت معاه إنه مهما يحصل يكون في ميل مني و منه حتى إذا كانت فيه كلمة واحده و حتى إذا كان مكتوب زي ما بيقوله من غير نفس ، بس أنا رضيت بالحل ده علشان يكون في حتى لو خيط بسيط ما بينا و ما بين بعض أبدأ (أنكشه منه) ، و يارب أكون فدتكم