دروس تعلمتها بعد الطلاق،وعقاب اهلي لي
بسم الله الرحمن الرحيم
بعد طلاقي أمس تعبت نفسيتي كثيراً لدرجة وصلت لاهمالي ببنتي ونفسي اليوم الصبح تعبت اكثر صرت أتقياً بعد أي لقمة صغيرة تدخل فمي(وهذه حالة تصيبني كل ما أكون في حالة حزن شديد)
كنت طوال الوقت أبكي فقط،احاول أجلس مع أهلي وأنسى همومي ولكنني لم استطيع النسيان أجلس معهم جسماً فقط وروحي معلقة في مكان آخر.
أمي(الله يحفظها)عطتني حبتين منوم الصبح لكي أنام وأرتاح لأنني لم أستطع أن أنام طوال الليل حتى انني أخذتهم على معدة فارغة فتعبت أكثر وتقيأت أكثر ولكن في النهاية نمت ولكن بعد معاناه
صحيت الساعة 12 الظهر على صوت يشبه صوت زوجي ينادي اسمي أفتح عيوني شوي اشوف شكل يشبه زوجي ارجع اسكر عيوني اقول هذا حلم أكيد (بس حلم حلو) اشوف يناديني مرة ثانية وثالثة وانا مسكرة عيوني افتح عيوني شوي من الصدمة برزت عيوني لبرا
هذا فعلا زوجي أمامي مش خيال ولا حلم وصار هالنقاش بينا:
أنا: (بوجه مرعوب) وش فيه؟
هو:عزرائيل وجاي آخذك(وجهه كان جدي )
أنا: لا بجد وش فيه؟؟؟وكيف بتدخل علي وأنا كذا؟انت مش مطلقني؟؟؟
هو: لا أنا عزرائيل و عادي أشوف الحريم بأي شكل،انا جاي اقبض روحك واطلع مش مهم شكلك (يستهزأ الأخ)
أنا: (بعصبية شديدة)عزرائيل الي ياخذك انت ،خلاص قول وش فيه ارعبتني انت بجد طلقتني او لا؟
هو: مستحيل تتغيرين بتظلك طول عمرك عصبية
أنأ: (برعب وبكاء)الله يخليك تعبت نفسيتي قول وش فيه
هو: (يمد يده يسلم علي،وأنا بكل بلاهة أعطي يدي) وقال: مبروك انت كنتي في برنامج صادوه ويضحك
انا : (بهدوء غريب وبلاهة أغرب) مين صادوه؟ بعدين كأني صحيت على نفسي وقلت: بجد وش فيه خلاص انت جننتني
صرخت أنادي أمي إلا هي تدخل الغرفة وتضحك بصوت عالي ويدخل اخوي الثاني ويطالع منظري ويضحك وصار يضحك زوجي وياهم
فجأة ما الاقي غير زوجي باس راسي وقلي انا مستحيل استغني عنك وأنا آسف على كل الي صار( الليلة آجي وآخذك جهزي نفسك،وخلي أهلك يفهمونك الموضوع)
طول الوقت وانا مصدومة بس اطالع فيه وأسأل هو ماصار الطلاق او وش الموضوع؟فهمووووني خلاص حتجيني جلطة بسببكم
طلع زوجي وهو يقول خلاص خلي اهلك يفهمونك الموضوع،بس المهم ألاقيك جاهزة الليلة عشان آخذك
بعد ما طلع هجمت هجوم كاسح على أمي واضحك بشكل غريب وأسألها فهموني الحين وبسرعة ماصار طلاق؟(الحمدلله ماشافني زوجي وانا اضحك كان مات بوقتها)
قالتلي الوالدة طيب هدي نفسك عشان اقدر افهمك الموضوع وهي مازالت تضحك
قالتلي انا لو علي كنت ما خلصت المقلب الا بعد ما تتربي زين انتي وزوجك
انا أسألها:طيب فهميني شو الموضوع الله يخليكي يا أمي الحبيبة
واخيرا حتتكلم الوالدة وقالت:"بعد مشكلتك انت وزوجك وشفنا الموضوع وصل للطلاق لقينا الحل جاه لوحده عندنا
لما روحتي من المدرسة وقلتي في استاذ عنا يبغاني في حال تطلقت طبعا نحن كنا رافضين الفكرة واصلا حرام تفكرين بالموضوع وانتي على ذمة رجال بس ابوك قلي مشي معها الموضوع لانه خطرت عباله فكرة انه يخبر زوجي بقصة المعلم الي خطبني وأنا على ذمته
وفعلا خبره انجن زوجي
وصار يقول لوالدي لا مين قال اني حطلقها؟(الغيرة اشتعلت فيه)
رد عليه الوالد:شلون يعني مش انت الي قلت خلاص حطلقها وماحد يفاتحني بالموضوع؟
قال:هاذي ساعة شيطان يا عمي وانا ما اقصد شيء
رد علي :انت برأيك زين الي تسويه في بنتنا؟كل شوي تهددها بالطلاق؟والمشكلة انك انت الي غلطان بآخر مشكلة
استحى زوجي منه وصار يقول لا عمي اوعدك ماراح اكررها رد عليه الوالد وقله:خلاص اترك الموضوع علي وان شاءالله خير
بعدين حضرات الوالد والوالدة اقتبسوا مني الافكار(من زمان قلتلهم عن قصة قرأتها انه وحدة كانت مصرة على الطلاق ومستحيل ترجع لزوجها عطوها اهلها ورقة طلاق مزيفة هي انهارت وماتوقعت يصير فعلا طلاق الا هي تتفاجأ بعد فترة انه كان مقلب من ابوها وامها ورجعت بيتها سعيدة وعاشوا بثبات ونبات وخلفوا صبيان وبنات)
بس طبعا كنت مستحيل افكر انه الورقة الي بعثها اهلي مزيفة او فيها اي شيء غلط لاني بحالة مستحيل افكر فيها بهالطريقة
فعلا ابوي زبط الوضع،لما قلتلكم انه شافه في عشاء ميت قبل طلاقي بيوم وكان طبيعي كان ابوي مش شايفه بس قال هالكلام عشان يخليني اتفائل برجعته وبعدين انصدم عشان اتعلم الدرس زين
وفي نفس الوقت كان يقول والدي لزوجي خلاص بنتي تبغى الطلاق وزوجي يرفض طبعا وقال مستحيل اطلقها قاله الوالد طيب المهم ما تبعث اي رساله حقها نحن نتولى الموضوع وكان يقول الوالد حقي نفس الشيء ما ابعث اي مسج حقه او اي اتصال عشان يتمموا خطتهم زين
ابوي طبع ورقة الطلاق بالشغل وبعثها مع اخوي أمس الصبح امي مثلت الدور تمام وصارت تحكيلي(لانه فعلا تخيلت انك فعلا تطلقتي والله أعلم كيف حيكون حالنا لو فعلا تطلقتي)
واتصل ابوي عزوجي وخبره انو سوينا مقلب مع بنتنا انه على اساس طلقتها عشان تعرف معنى الطلاق و بنفس الوقت تحس بقيمتك وانت كمان عشان تحرم تظل تهدد بنتي بالطلاق يعني تصور فعلا الطلاق صار؟شو كانت حالتك انت وبنتي؟؟
وقله خلاص روح عندها اليوم لانها كثير تعبت وما نبغى نطول بالمقلب بلاش يصير فيها شيء وفي نفس الوقت عشان دوامي بلاش اخذ اجازة اكثر
كانوا اهلي ناويين يطولوا بالمقلب لأسبوع كامل بس شافوا حالتي شلون هي وشفقوا علي للهسبب عطتني الوالدة حبتين منوم عشان اصحى على اجمل وجه بحياتي
والله يا جماعة الحين حسيت شو يعني طلاق صحيح الطلاق كان يوم وليلة بس شعرت انه كابوس
الله يعين كل المطلقات و يصبركم ويثبتكم ويعوضكم كل خير
وانا بتجربتي هذه احس حالي تعلمت دروس كثيرة الله يحفظ والديني ويخليهم لي وانا متاكدة الحين زوجي حيحرم يظل يهددني بالطلاق
وانصح اي رجال يعاني من كثرة طلب زوجته الطلاق او انه زوجته حردانة عند اهلها يتبع نفس الفكرة وان شاءالله تنجح عن تجربة
الليلة ان شاءالله اكون في بيت زوجي دعواتكم