السلام عليكم انا سبق طرحت بعض مشاكلي مع زوجي وحاليا بعد عشرة عشر سنوات انا في بيت اهلي لاول مره وحطوا تحت كلمة اول مره عشر خطوط

رغم كثير مشاكل وظروف مرت علينا ماعمري تكلمت فيه عند اهلي ابدا ابدا كنت احيانا اجيهم وانا متزاعله معه وارجع بيتي بدون ما احسسهم بشيء

هالمرة جت منه كان هاجرني اسبوعين وزعلان من موقف ماله حق يزعل طلبني فلوس قلت ماعندي وحقيقي هو مزنوق لكن انا شكو وقلت له كثر خيري ما اكلف عليك ولا اضغط عليك ديونك هذي انا مالي شغل فيها فسوى عمره زعلان وفعلا اسبوعين طفشني كرهني حياتي وفي الاخير قال يالله روحي عند اهلك انا ببيع البيت
لي هنا وخلاص شلت عفشي ورحت لاهلي ولي الان اسبوعين

من ثاني يوم ابوي دق عليه ورجع سالني ليش عمي يدق انتي ايش قلتي له
قلت ماقلت ولا شيء الا كلمة انك بتبيع البيت وانفجر وزعل تخيلوا كان متوقع اني بجلس عند اهلي واسكت مثل كل مرة بس هالمررة غيييييير
اول مره يطلعني من بيتي
ثانيا سالفة بيع البيت مو من حقه يبيعه وانا (مساهمه معه فيه بدون اثباتات خطيه ساهمت بالاثاث)

ومن وقتها يجلس اسبوع ويدق ولا ارد ويرسل يالله نطلع نفطر برى فقلت له مالي خلق
اختفى اسبوع رجع دق مارديت ارسل ابغى اسمع صوتك قلت له مالي خلق اكلم احد

الاخ ماشاء الله صار راضي علينا لما الموضوع كبر وصار عند اهلي واهله

يعلم الله اني انسانه واعيه كثير وماحب اطلع اسرار بيتي لاحد لكن هو حدني وعلمت ابوي على اكثر شيء ضايقوني اني ساهمت ودعمت وهو ماقدر وبرضه على سهراته مع اصحابه

وابويه انسان فاهم متعلم راقي يقول اذا فيه شيء زيادة قولي لما يحي لازم نتفاهم معه على كل شيء ونثبت كل شيء ورقي
وماترجعين الا وحقوقك راجعه لك وانت راضيه
ويشترط عليه مايسهر مع اصحابه بوميا لوقت متاخر احس هالشي لو ماجاء بطيب وقناعة مايجي بغصب تايدوني

اياعات اقول خلاص اتركه ويتزكني ويعيش مع اصحابه حر طليق وانا ماكون على ذمته لكن اطفالي مالهم ذنب ابوهم رائع معهم ولله الحمد

فانا عارفه زوجي يبغى الموضوع ينلم بدون مايتدخل احد وهالطريقة حاليا ماتنفع معاه
وغير كذا اخاف يحقد علي ويكابر اكثر واضح الي مو حاس انه غلطان والغلط راكبه من راسه
ياترى ردة فعل زوجي كيف بتكون لو ابويه حجر له وطلب كل شيء قدام ابوه واخوانه
هل بيعتذر بيعترف بغلطه والا بيحقد علي ويمكن ينتقم مني مع السنين
هو شخص عنيد جدا جدا جدا عصبي متهور متسرع

يعلم الله قد ايش صبرت وتحملت وعذرت وعطيت بس ماقدر كل هذا ولا بان فيه شيء للاسف